I love to cook .. love to eat .. and this is my kitchen

Category Archives: اطباق رئيسية

هالطريقه سريعه وما تحتاج تتبيل قبل بيوم .. الهدف من اضافه الزبده بالويه عشان يتحمر الدياي ويعطينا ويه محمر ويلد مقرمش .. اذا بتخففون الدسم الغو الزيده … البطاط بيتشرب من بهارات البطاط وعصاره الدياي وبيكون لذيذ جدا .. احب اقدمها مع عيش بالشعريه  وتبوله … الف عافيه

المقادير كلها تقريبيه :

ديايتين مقطعين بالانصاص ( يفضل الحجم يكون صغير او متوسط اقل من كيلو )

2 م ص لومي بودر

م ك بهار مخلوط

1 م ص هيل ناعم

نص م ص فلفل اسود

تقريبا 2 م ك ثوم مهروس مخلوط ب  م ك زيت زيتون

شرايح بطاط  حسب الكميه المرغوبه

ملح

وقطع زبده صغيره للويه

الطريقه :

نفرك الدياي بثوم مهروس والزيت وتالي نخلط بهار وهيل ناعم ولومي ناعم وملح وفلفل اسود ونتبله من الجهتين ونصفه فوق شرايح بطاط ونوزع زبدة بالويه وندخله الفرن ليما يتحمر بس ما نخليه اكثر من اللازم عشان لا ينشف وبالف بالعافيه


مادري هالاكله ليش اسمها جذي المسيكينه … ادري انها عباره عن مجبوس عادي يضاف له حلبه وثوم وحبه بركه ويعطونه النفسا ( الوالده ) وومكن تضيفون له لوبه.. مرح اتكلم عن سلق اللحم لاني ذكرته وايد بمواضيع متعدده

اذا ما تبونه بلحم تقدرون تسوونه بدياي بس بلحم انطع … اعتقد هالاكله حساويه لان مو الكل يعرفها .. وطبعا اذا ما تحبون السلق و مو متوفر تقدرون تلغونه

المقادير : تقديريه

جيله ونص عيش منقوع

حبتين طماط مقطعين خسب الرغبه

حبه بصل كبيره او 2 صغار او وسط

لحم تقريبا كيلو مسلوق ( ببهارات كامله مثل الدارسين والهيل وورق الغار وثوم وحبه بصل مع كركم وكمون حب وفلفل اسود حب وكزبره حب وعصفر و زنجبيل ناشف )

راس ثوم كامل او اقل حسب الرغبه .. مقشر

قفشه كبيره حلبه + حبه البركه  منقوعه بماي لمده ساعه ومصفيه ( عشان نتخلص من مروره الحلبه)

شده سلق مفرومه حسب الرغبه

ماي فوح ( سلق ) اللحم

بهارات ناعمه نص قفشه صغيره من كل من  ( كركم وبهار مخلوط  )

ملح

زيت او سمنه حسب الرغبه

الطريقه :

نحمس البصل بالزيت او السمنه ليما يذبل ومضيف له الطماط والسلق والبهارات مع الحلبه ونضيف فوقهم اللحم والثوم وماي الفوح والملح  ونتركه يغلي

نسقط عليه العيش المشخول ونتركه يتشرب الماي وبعدين نوطي عليه النار ونتركه يتسكر ويقدم بالف عافيه


الوصفه هجين من وصفتين وحده من الشيف اسامه السيد والثانيه من صديقتي الغاليه منى من موقع لقمه  هالوصفه تصلح للمبتدئات بالطبخ بالاضافه الى الامهات خاصه بالايام اللي الجدول اليومي يكون مزحوم واخر ما يي في بالكم شنو اسوي غدا حق اليوم … اعتقد ان في وصفات ذكيه ربه البيت تكون تلجا لها في وقت هذي منها لان مقاديرها اعتقد موجوده بكل بيت وتجهيزها ما ياخذ وقت وشواها سريع .. الحين انا اعتمدت طريقتين وكنت بشوف الفرق بينهم جزء شويته بالفرن  وجزء بجهاز الشوي .. بكلا الحالتين النتيجه كانت حلوه … الفرق بجهاز الشوي ان طلع لي غريل مارك .. رجاء مقادير التتبيل الزايده تنقط ما تردون تستخدمونها عشان لا تعرضون روحكم لخطر التسمم  وما انصح انكم تردون تمسحون فيها الدياي المستوي لانه رح يؤخر عمليه النضج… اكبر غلطه اشوفها الطبخ الزايد واللي يحول الدياي من قطع لذيذه وطريه الى قطعه من المطاط تتعب الفك من كثر المضغ

اعتقد قرقت بما فيه الكفايه .. ندش على الوصفه

المقادير :

500-700 غ فيليه دجاج ( استخدمت 3 علب فرش )

م ك ثوم مهروس

2 م ك مسترد

م ك معجون طماط

علبه روب = حوالي كوب .. هالنوع حلو بالتتبيل او ممكن تستخدمون روب منزلي  … وفي اقتراح يبدل الروب بنص كوب مايونيز بس ما جربته

2 م ك خل

1/4 كوب زيت زيتون او اي زيت نباتي

رشه جوز الطيب ( اختياري لان في ناس تستحرم تستخدمها )

1 م ص كركم

1/4 م ص بهار حلو او اي نوع بهار تفضلون

1/4 م ص فلفل احمر حار  .. اذا تبون الشيش طاووق سبايسي زيدو الكميه

1/2 م ص اوريغانو او زعتر مجفف  او خليط من الاثنين

ملح وفلفل حسب الرغبه

الطريقه :

نقطع الفيليه حسب مكعبات حسب الحجم المفضل  … نخلط مقادير التتبيله ونخلطها مع الدياي

نتركها تتبل جم ساعه وكل ما زادت الفتره كل ما طلعت اطعم .. انا سويتها قبل بليله  وحطيتها بالثلاجه  … شوفو لونها ينن

نشكها بالاسياخ الخشبيه ..عند الشواء نحاول نتخلص من التتبيله ونشويها اما بالفرن او بجهاز الشوي بس ما نبالغ بالشوي مجرد ما تستوي نشيلها وقدموها مع تبوله او عرايس دبس الفليفله او مع سلطه بطاط وهني وعافيه

 

 

الفرق بين شكل المشوي بالفرن و بالشوايه


وايد احب المجبوس بهالطريقه … الاساس اللي يطلع هالمجبوس الحماس على مهل  اللي بيخلي الفوح لونه  ياي على احمر مثل اللي تشوفونه بالطاسه

الطريقه وما فيها  لونه ونكهته وريحه كلهم على بعض رائعين … هذا مو مجبوس كويتي … اعيد واكرر هذا مو مجبوس كويتي عشان لاحد يزعل ويقول احنا ما نسويه جذي

البهار والمقادير كلها حسب الرغبه .. افضل تستخدمون جدر الضغط ليسرع عمليه السوا .. الطماط اذا مو احمر زيدوه معجون طماط … حشو البطاط معاه حلو وممكن تضيفون مكسرات  محمصه او خضار محموسه مع شعريه مسلوقه

المقادير:

لحم مجبوس مع العظم ( كتف او فخذ  غنم )

بصل مقطع حسب الرغبه ( بحدود 2 صغار او وحده كبيره )

طماط مقطع حسب الرغبه ( 2-3 كفايه )

قفشتين كبار او بمقدار خمطه  من خليط بهارات كامله للمجبوس ( هيل وورق غار ومسمار ودارسين و فلفل اسود وحب بهار وعرج الهيل وزنجبيل مجفف و لومي ونجمه اليانسون )

قفشه كزبره حب

نص قفشه كبيره حبه حلوة او شومر

قفشه صغيره عصفر ( خيوط مو بودر )

قفشه كبيره حب كمون

نص راس ثوم مقشر

نص قفشه صغيره هيل ناعم

نص قفشه صغيره كركم

قفشه صغيره بهار

بهار مخلوط حق ويه الايدام ( بهار ودارسين وهيل ولومي )

عيش

دهن او سمنه

وطبعا العيش ( رز )

حشو البطاط :

بطاط مقلي

بهار

بابريكا

ثوم بودر

اوريغانو

كزبره بودر وشوي من ماي سلق اللحم

الطريقه :

نحمس البصل لين يذبل تالي نضيف كل البهارات  والثوم ونقلبهم لين تطلع ريحتهم نضيف الطماط ونحركها لين تذبل  ناخذ راحتنا لان الحمسه اهي اساس النكهه  …نضيف اللحم ونقلبه والماي ونتركه لين يستوي ( بنص فتره السلق نضيف الملح عشان لا يعرد اللحم )

نشخل الفوح نشيل منه شوي نسلق فيه البطاط وبعدين نقليها ونبهرها ونخليها للحشو

باجي الفوح نعدل ملحه ونضيف له معجون اذا نبيه احمر   .. وناخذ اللحم نبهره وندخله الفرن او نقليه حسب الرغبه

بشوي زيت نقلب العيش لين يتفلفل وتقدرون قبل تحمسون شوي بصل لين يذبل ويصير شفاف وتالي تضيفون العيش وتقلبونه ونزيد عليه ماي الفوح ونتركه ينشف .. نرش على الويه هيل ناعم وبهار ونخليه يتسكر على نار هاديه

يقدم مع باجي ماي الفوح اذا تحبون وبالعافيه


 

استخدمت نفس التكنيك اللي سوه فيه المجبوس بس غيرت الحشو …جربوه

اذا تبون الطريقه الاصليه تحصلونها بهاللينك

المقادير كلها حسب الرغبه :

دياي

بصل مقطع حسب الرغبه

طماط مقطع حسب الرغبه

ثوم عدل

بهارات عدله ( ورق غار و هيل ودارسين وفلفل اسود وكزبره ونجمه الينسون ومسمار وحبه لومي ) .. تقدرون تشترونها جاهزه من مطحنه سمراء عدن

بهارات ناعمه ( كركم وكاري وبهار مجبوس وهيل ناعم )

عيش

زعفران

سمن او زيت

حشو الدياي:

جبده

بقدونس مفروم

بصل

بهارات ( هيل ودارسين و ملح وفلفل اسود وبهار )

حشو المجبوس :

بصل مقطع

مكسرات حسب الرغبه واستخدمت اللوز

كشمش

شويه زعفران

بهار الحشو وهيل ناعم وفلفل اسود ودارسين ناعم

الطريقه :

او شي نسوي حشو الدياي ..نحمس البصل ونضيف له الجبده والبهارات  واخر شي البقدونس عقب ما نسكر النار ..و ممكن نضيف دبس رمان
ونتركه يبرد

نحشي الدياي بالحشو ونسكره او نخيطه وتالي نسلقه مع البصل والطماط والثوم ونوعين البهارات والملح ونتركه ليما ينضى الدياي

نشيل الدياي ونبهره ببهار وهيل وشوي زعفران وندخله الفرن او نقليه

نسوي الحشو … نحمر البصل بمقلاه ساخنه من غير زيت ونترك البصل لين يتغير لونه مع بخ المقله بالماي اذا است
دعت الحاجه نضيف لها البهارات واللوز المحمص والزعفران والكشمش اخر شي بعد ما نطفي النار

نشخل ماي الفوح ونعدل الملح وبعدين تحط عليه العيش ونتركه يتسكر واول ما ينشف نضيف الزعفران على الويه ورشه هيل ناعم

نقدمه مع الدياي والحشو وبالف العافيه

 


سويتها بالضبط مثل ما كتبها بالموقع … زدت بس شرايح  ليمون وطماط بالفرشه وعلى الويه  وشوي ماي بالصينيه …. بالعافيه

المقادير :

  • نقرور متوسط الحجم

  • شرائح بصل

  • شرائح فلفل اخضر

حشو النقرور:

  • نصف شدة كزبرة

  • نصف شدة شبنت

  • 2 حبة متوسطة طماطم مفرومة

  • حبة متوسطة من البصل المفروم

  • فليفلة خضراء متوسطة ومفرومة

  • ملعقة متوسطة ثوم مدقوق

  • ملعقة متوسطة زنجبيل

  • ملعقة متوسطة كركم

  • ملعقة متوسطة لومي اسود

  • ملعقة متوسطة بهار مخلوط (بهار سمك)

  • ملعقة كبيرة دبس الرمان

  • عصير ليمونة

  • ملعقة كبيرة ملح

  • علب فلفل اخضر حار

تتبيلة سمكة النقرور

  • ملعقة كركم

  • ملعقة بهار مخلوط

  • ملعقة لومي اسود

  • ملعقة ملح

  • نصف كوب من منقوع التمر الهندي المصفى (صبار)

  • نصف كوب منقوع التمر المصفى

الطريقة :

  • تفتح سمكة النقرور من الظهر وتنضف جيدا

  • تفرك سمكة النقرور بالملح والكركم وتترك قليلا ثم تغسل

  • تدهن صينية الفرن بالزيت

  • تصف شرائح الفلفل الاخضر والبصل في صينية الفرن

  • ترش الشرائح بقليل من الكركم والبهار المخلوط والملح

  • نخلط مقادير التتبيلة مع التمر الهندي  بدون منقوع التمر

  • نتبل سمكة النقرور من الداخل والخارج

  • ندهن جلد السمكة بمنقوع التمر جيدا حتى تكتسب لونا وطعما جميلا اثناء الشوي

  • تفتح السمكة فوق شرايح البصل والفلفل بصينية الشوي

  • توضع الحشوة في بطن السمكة وتفرك اجزائها جيدا به

  • يوضع علب الفلفل بالنص

  • توضع بالفرن على درجة حرارة عالية مايقارب الساعة الى ان تتحمر جيد


نكمل باجي سلسه وصفات القصار وهالمره باليريش .. يختلف اليريش ( الجريش ) الكويتي عنم السعودي اختلاف كلي من اللون وطريقه الطبخ وحتى الطعم …وهالاكله تعتبر من الاكلات التراثيه المرتبطه في شهر رمضان  مع الهريس وكان الحريم ناقصين تعب  بهالشهر  هههه … عشان تسهلون عمليه الضراب ( الهرس )  استخدمو مضرب التحريك بالمكاين الكهربائيه او خلوه يطبخ فتره طويله لين ينهري من نفسه وعمليه الضرب بتكون سهله ومتجانسه … استخدمت نفس الوصفه اللي ذكرها القصار الا اني قللت كميه الجريش بنسبه كبيره واستخدمت جيله بدال كيلو …الشغله الثانيه اني استخدمت نصيحه صديقتي الانستغراميه njat80 وخليتها بالفرن بدال الجوله وكنت اطلعها كل 10 او 15 دقيقه اخلطها واردها مره ثانيه وميزه الفرن  انه ما يحتاج ماي وايد وانه ما يحكك بالجدر واخيرا مع كل عمليه تحريك قاعد تتمازج المكونات تدريجيا

نصيحه اخيره … خلو يمكم علبه شوفان احتياط اذا حسيتو ان الماي زايد ممكن تستخدمونها  وتعدل لكم سمك اليريشه بالطريقه اللي تفضلونها

رح انسخ الوصفه  من موقع القصار  من هني  .. ووصفات اليريش الثانيه تحصلونها هني وهني  وهذا اليريش المنهنه هني وهني وهني

المقادير:

  • دجاجة كاملة مقطوعة نصفان 900 غ

  • بصلتان مفرومتان

  • 4 حبات طماط

  • جيله حب جريش منقوع بماء فاتر لمدة لاتقل عن 3 ساعات ومصفى

  • علبة معجون طماطم

  • 4 فصوص ثوم

  • 3 ملاعق سمنة

  • بهارات مشكلة م ص من كل من (كزبرة , كمون , فلفل اسود , كركم , لومي اسود)

  • نص كوب روب حسب الرغبة يوضع وقت الضراب

  • كمية وفيرة من الماء للسلق ( 5 الى 6 اكواب )

الطريقة :

  • يوضع البصل والثوم والسمنة وتقلب مع قليل من البهار

  • تضاف  انصاف الدجاجة وتوضع فوق البصل ويقلب الخليط لمدة ربع ساعة

  • يضاف الطماط المقطع وعلبة معجون الطماطم فوق الدجاج ويترك حتى يذبل الكل  , يضاف الجريش ويحرك مع الكل لمده دقيقتين ثم يوضع الماء الساخن واللومي الكامل  ويحرك حتى يغلي  ثم يوضع بالفرن ويترك لمدة ساعتين عالاقل مع التقليب كل 10 – 15 دقيقه

  • بعد ان تنضج الدجاجة ونصفيها من العظم ثم نرجعها الجريش ونضربها ونضيف الكمون المطحون والملح حسب الرغبة واذا احتاجت شوفان نضيفها بهلمرحله ونستمر بالتحريك والخلط حتى ينهرس وتتمازج كل المكونات مع بعض

  • يضاف كوب الروب وعصير نصف الليمونة ثم تسكب في ماعون التقديم وتدهن بالسمن العداني وتزين بالحشو وهو عبارة عن البصل المفروم المفروك مع اللومي الاسود



تابع

Get every new post delivered to your Inbox.

Join 997 other followers