I love to cook .. love to eat .. and this is my kitchen

Category Archives: اطباق رئيسية

دياي بالفرن

استخدمت جهازي المفضل قيلبس ايرفراير لخبز الدياي .. هالوصفه حلوه للي يبي يحافظ على وزنه  وبنفس الوقت مشبعه … مرج اجذب عليكم الدياي طلع شوي ناشف يمكن لو قدمتوه مع صلصه او بطاط مهروس افضل من انه يكون بروحه مع البروكلي

المقادير حق 2 فيليه دياي

المقادير :

نص كوب لبن

 م ص بابريكا

نص م ص كمون او بهار دجاج

نص م ص اوريغانو

نص م ص اعشاب ايطاليه مخلوطه

نص م ص ثوم بودر

م ك خردل ديجون

ملح وفلفل اسود حسب الرغبه

بقسماط للتغطيه ( بانكو )

نص م ص زيت زيتون

الطريقه :

نخلط اللبن مع نص كميه البهارات المذكوره و ملعقه الخردل  ونتبل فيه الدياي ويفضل يوم كامل

نخلط باقي البهارات مع البقسماط وزيت الزيتون

نشيل الدياي من خليط اللبن ونلته بالبقسماط ونحطه بصينيه الفرن الساخنه او بالجهاز

دجاج بالبانكو قبل الخبز

اول ما يستوي الدياي ويتحمر نشيله ونقدمه وبالف عافيه

دجاج بالبقسماط بالفرن


اخذته قبل فتره وحبييييته جدا جدا .. اهو عباره عن فرن صغير نقدر نسوي كل الاطباق اللي نسويها بالفرن عاده بالاضافه الى تحمير بعض الاصناف اللي تنوكل عاده بالقلي مثل البطاط او النجتس او الهوت دوغ وغيرها

الجهاز حجمه صغير ..  يعني يسع حق كميه اكل تكفي حق شخصين ومع الجهاز عازل لخبز صنيفين بنفس الوقت … ينباع صينيه خاصه تدخل بالفرن للاشياء السائله اوخليط الرطب ( لان بقاعده الجهاز شبك فما ينفع لكل الاصناف )

اول الاصناف اللي جربتها فيها كانت البطاط ( طبعا !!).. وكانت النتيجه جدا حلوه لان الفرن ساخن فاستوت البطاط بوقت اسرع من الفرن العادي بالاضافه الى انه كسب قرمشه حلوه … مرح ابالغ واقول انه احلى من البطاطا المقليه لكنه شي لذيذ وبديل بنفس الوقت

بطاط صحي مشوي لذيذ

البطاط تبلته بملح واريغانو وثوم بودر وبابريكا واقل من نص قفشه صغيرة زيت زيتون … الربيان ملح وفلفل اسود وبهارات سمج وهم شوي زيت زيتون

النتيجه جدا مبهره وانصح كلي اللي يحب الاكل الصحي او انه يطبخ لشخص واحد او شخصين ياخذه


20121226_153043

 احب التونا و كل تغيير بسيط فيها يعطي طعم مختلف بالاضافه الى انه وجبه مشبعه وصحيه خاصه اذا بدلنا المايونيز بمكون ثاني … بالشتا انصحكم ترافقونها مع بطاط مشوي وبالصيف حطوها بساندويش والافضل توست محمص مع سلايس جبن اخف… البطاط خبزنه بجهازي المفضل اليديد philips airfryer

اذا تبون تقدرون تحسون التونا بالطاط بعد ما تفرغونه وتردون تدخلونه الفرن مره ثانيه … التونا المستخدمه ماركه قودي واهي افضل نوع تونه جربته للحين

المقاديروالطريقه :

نصفي علبه تونا  من الزيت تماما وبالشوكه تفتتها ونضيف عليها بصل  مفروم ناعم +فلفل ملون مفروم ناعم + قفشه كبيره زيتون شرايح ونبهر المزيج كله بملح وفلفل اسود وبهار شيلي ( مكوناته فلفل احمر وكمون وثوم بودر ) ورشتين تباسكو وديجون مسترد مذوب بشوي عصير ليمون وتقريبا م ص زيت زيتون عشان ينخلط بشكل اسرع مع التونا

نحط هالمزيج كله فوق شرايح من الخس المبشور  ونقدمه مع بطاطه مشويه وبالعافيه


باستا ربيان بالفلفل المشوي والجرجير

طرت على بالي الوصفه لمن قريت وصفه مقاربه لها عند جيمي اوليفر

http://www.jamieoliver.com/recipes/pasta-recipes/spaghetti-with-shrimp-arugula-spaghe

سهله وسريعه ولذييذه سويناها مرتين بنفس اليوم … انا استخدمت اسباجيتي الاسمر يعطي نكهه حلوة مع هالطبق واذا ما تحبونه او غير متوفر استخدمو اي نوع باستا… الجرجير ممكن تخلطونه مع الصلصه او تحطونه بالويه

باستا بالفلفل المشوي والجرجير

المقادير:

باستا مسلوقه  ثلاث ارباع سوا بالاضافه الى ربع كوب من ماي السلق

ثوم مهروس

نص م ص فلفل احمر مجفف

ثلث كوب فلفل مشوي منزوع القشر ومقطع

عصير ليمون حسب الرغبه

جرجير حسب الرغبه

تقريبا كوب ربيان مقشر ومنظف

اوريغانو حسب الرغبه

صلصه طماطم حسب الرغبه

الطريقه :

نسخن زيت زيتون ونضيف له الفلفل والثوم ونحمرهم وبعدين نضيف الربيان والاوريغانو والفلفل المشويوصلصه الطماط ونتركها لين يستوي الربيان … ممكن نخفف الصلصه بماي سلق الباستا

نخلط الباستا معاهم وقبل التقديم نضيف الليمون والجرجير ونقدمها مع جرجير بالويه


باستا بطريقة القصار

الفرق بين تطبيقي والوصفه الاصليه اني ما استخدمت خضار لانها ما كانت متوفره عندي وزدتها بهار… وحطيت بدال الفلفل المقطع فلفل حار كامل وحطيته يطبخ معاهم وشلته قبل التقديم

اخذت الوصفه كوبي من موقع البرنامج وعدلت عليها حسب ما سويته .. اذا تبون الوصفه الكامله تلقونها بالموقع

http://alqassarshow.com

الباستا :

  • كيس معكرونة مسلوقه

  • 2 بصلات مفرومة

  • ملعقتين صغاراوريجانو (زعتر بري)

  • ملعقتين صغار بيزل (ريحان مجفف)

  • كيس لحم مفروم

  •  ملعقة كبيرة ثوم مدقوق

  • 4 حبات طماطم مقطعة بدلتها بطماط مهروس

  • علبه معجون الطماطم

  • مكعب خلاصة الدجاج

  • ملح وفلفل اسود وبهار

الطريقة :

صلصة البولونيز :

  • نحمر البصل مع 3 ملاعق زيت

  • نضيف الفلفل الاسود والاوريجانو والبيزل

  • نضيف اللحم المفروم

  • نضيف ملعقة من الثوم والبهار

  • ونترك الحمسة على النار

  • نضيف علبة المعجون وكمية الطماطم المقطعة

  • نضيف مكعب خلاصة الدجاج ونتركها على نار هادية


IMG_20121202_155029

وايد سهله وخفيفه … الحركه اليديده مع هالدياي اني انقعه بماي بارد مضاف له شكر اسمر وملح وخل تفاح  جم ساعه او ما يسمى brining ..الهدف منه الاحتفاظ بطراوه ونداوه الدياي عند القلي او الشوي وهالطريقه تستخدم بعد بالتيركي او الريش واللحوم عموما او الجبن  … الاصل بالنقع يستخدم الماي والملح وممكن تشيلون اللي ما تبونه او تضيفون بهارات او اعشاب او اي شي ثاني لخيط النقع

النتيجه دياي طري ومو ناشف مع اني شويته من غير جلد … البهار المستخدم من دين اند دالوكا اسمه mediterranean بس طلع سبايسي فتقدرون تبدلونه باي نوع بهار ثاني حسب الرغبه

دياي مشوي

المقادير: ( حسب الرغبه )

صدر دياي بالعظم ومنزوع عنه الجلد

نص ملعقه صغيره بهار .. واذا كنتو بتستخدمون ناعم قللو الكميه الى ربع

فصين ثوم مهروسين

م ص زيت زيتون

ملح حسب الرغبه

بطاط مقطعه ارباع

خليط النقع :

نص لتر ماي

م ك ملح خشن

م ك شكر اسمر

ربع كوب خل تفاح

الطريقة :

مافي اسهل منها … ننقطع الدياي بالنقع لمده لا تقل عن 6 ساعات ومو اكثر من يوم .. ننشفها ونمسحها نص قفشه زيت ونفركها بالثوم ونرش البهارات من الطرفين .. باجي الزيت نرشه على البطاط ونرش الكل بملح

ندخله الفرن لما يستوي وبالعافيه

دياي مشوي 2


هالطريقه سريعه وما تحتاج تتبيل قبل بيوم .. الهدف من اضافه الزبده بالويه عشان يتحمر الدياي ويعطينا ويه محمر ويلد مقرمش .. اذا بتخففون الدسم الغو الزيده … البطاط بيتشرب من بهارات البطاط وعصاره الدياي وبيكون لذيذ جدا .. احب اقدمها مع عيش بالشعريه  وتبوله … الف عافيه

المقادير كلها تقريبيه :

ديايتين مقطعين بالانصاص ( يفضل الحجم يكون صغير او متوسط اقل من كيلو )

2 م ص لومي بودر

م ك بهار مخلوط

1 م ص هيل ناعم

نص م ص فلفل اسود

تقريبا 2 م ك ثوم مهروس مخلوط ب  م ك زيت زيتون

شرايح بطاط  حسب الكميه المرغوبه

ملح

وقطع زبده صغيره للويه

الطريقه :

نفرك الدياي بثوم مهروس والزيت وتالي نخلط بهار وهيل ناعم ولومي ناعم وملح وفلفل اسود ونتبله من الجهتين ونصفه فوق شرايح بطاط ونوزع زبدة بالويه وندخله الفرن ليما يتحمر بس ما نخليه اكثر من اللازم عشان لا ينشف وبالف بالعافيه



تابع

Get every new post delivered to your Inbox.

Join 1,016 other followers