I love to cook .. love to eat .. and this is my kitchen

Tag Archives: نكهه وبهار مع القصار

باستا بطريقة القصار

الفرق بين تطبيقي والوصفه الاصليه اني ما استخدمت خضار لانها ما كانت متوفره عندي وزدتها بهار… وحطيت بدال الفلفل المقطع فلفل حار كامل وحطيته يطبخ معاهم وشلته قبل التقديم

اخذت الوصفه كوبي من موقع البرنامج وعدلت عليها حسب ما سويته .. اذا تبون الوصفه الكامله تلقونها بالموقع

http://alqassarshow.com

الباستا :

  • كيس معكرونة مسلوقه

  • 2 بصلات مفرومة

  • ملعقتين صغاراوريجانو (زعتر بري)

  • ملعقتين صغار بيزل (ريحان مجفف)

  • كيس لحم مفروم

  •  ملعقة كبيرة ثوم مدقوق

  • 4 حبات طماطم مقطعة بدلتها بطماط مهروس

  • علبه معجون الطماطم

  • مكعب خلاصة الدجاج

  • ملح وفلفل اسود وبهار

الطريقة :

صلصة البولونيز :

  • نحمر البصل مع 3 ملاعق زيت

  • نضيف الفلفل الاسود والاوريجانو والبيزل

  • نضيف اللحم المفروم

  • نضيف ملعقة من الثوم والبهار

  • ونترك الحمسة على النار

  • نضيف علبة المعجون وكمية الطماطم المقطعة

  • نضيف مكعب خلاصة الدجاج ونتركها على نار هادية


 

استخدمت نفس التكنيك اللي سوه فيه المجبوس بس غيرت الحشو …جربوه

اذا تبون الطريقه الاصليه تحصلونها بهاللينك

المقادير كلها حسب الرغبه :

دياي

بصل مقطع حسب الرغبه

طماط مقطع حسب الرغبه

ثوم عدل

بهارات عدله ( ورق غار و هيل ودارسين وفلفل اسود وكزبره ونجمه الينسون ومسمار وحبه لومي ) .. تقدرون تشترونها جاهزه من مطحنه سمراء عدن

بهارات ناعمه ( كركم وكاري وبهار مجبوس وهيل ناعم )

عيش

زعفران

سمن او زيت

حشو الدياي:

جبده

بقدونس مفروم

بصل

بهارات ( هيل ودارسين و ملح وفلفل اسود وبهار )

حشو المجبوس :

بصل مقطع

مكسرات حسب الرغبه واستخدمت اللوز

كشمش

شويه زعفران

بهار الحشو وهيل ناعم وفلفل اسود ودارسين ناعم

الطريقه :

او شي نسوي حشو الدياي ..نحمس البصل ونضيف له الجبده والبهارات  واخر شي البقدونس عقب ما نسكر النار ..و ممكن نضيف دبس رمان
ونتركه يبرد

نحشي الدياي بالحشو ونسكره او نخيطه وتالي نسلقه مع البصل والطماط والثوم ونوعين البهارات والملح ونتركه ليما ينضى الدياي

نشيل الدياي ونبهره ببهار وهيل وشوي زعفران وندخله الفرن او نقليه

نسوي الحشو … نحمر البصل بمقلاه ساخنه من غير زيت ونترك البصل لين يتغير لونه مع بخ المقله بالماي اذا است
دعت الحاجه نضيف لها البهارات واللوز المحمص والزعفران والكشمش اخر شي بعد ما نطفي النار

نشخل ماي الفوح ونعدل الملح وبعدين تحط عليه العيش ونتركه يتسكر واول ما ينشف نضيف الزعفران على الويه ورشه هيل ناعم

نقدمه مع الدياي والحشو وبالف العافيه

 


سويتها بالضبط مثل ما كتبها بالموقع … زدت بس شرايح  ليمون وطماط بالفرشه وعلى الويه  وشوي ماي بالصينيه …. بالعافيه

المقادير :

  • نقرور متوسط الحجم

  • شرائح بصل

  • شرائح فلفل اخضر

حشو النقرور:

  • نصف شدة كزبرة

  • نصف شدة شبنت

  • 2 حبة متوسطة طماطم مفرومة

  • حبة متوسطة من البصل المفروم

  • فليفلة خضراء متوسطة ومفرومة

  • ملعقة متوسطة ثوم مدقوق

  • ملعقة متوسطة زنجبيل

  • ملعقة متوسطة كركم

  • ملعقة متوسطة لومي اسود

  • ملعقة متوسطة بهار مخلوط (بهار سمك)

  • ملعقة كبيرة دبس الرمان

  • عصير ليمونة

  • ملعقة كبيرة ملح

  • علب فلفل اخضر حار

تتبيلة سمكة النقرور

  • ملعقة كركم

  • ملعقة بهار مخلوط

  • ملعقة لومي اسود

  • ملعقة ملح

  • نصف كوب من منقوع التمر الهندي المصفى (صبار)

  • نصف كوب منقوع التمر المصفى

الطريقة :

  • تفتح سمكة النقرور من الظهر وتنضف جيدا

  • تفرك سمكة النقرور بالملح والكركم وتترك قليلا ثم تغسل

  • تدهن صينية الفرن بالزيت

  • تصف شرائح الفلفل الاخضر والبصل في صينية الفرن

  • ترش الشرائح بقليل من الكركم والبهار المخلوط والملح

  • نخلط مقادير التتبيلة مع التمر الهندي  بدون منقوع التمر

  • نتبل سمكة النقرور من الداخل والخارج

  • ندهن جلد السمكة بمنقوع التمر جيدا حتى تكتسب لونا وطعما جميلا اثناء الشوي

  • تفتح السمكة فوق شرايح البصل والفلفل بصينية الشوي

  • توضع الحشوة في بطن السمكة وتفرك اجزائها جيدا به

  • يوضع علب الفلفل بالنص

  • توضع بالفرن على درجة حرارة عالية مايقارب الساعة الى ان تتحمر جيد


نكمل باجي سلسه وصفات القصار وهالمره باليريش .. يختلف اليريش ( الجريش ) الكويتي عنم السعودي اختلاف كلي من اللون وطريقه الطبخ وحتى الطعم …وهالاكله تعتبر من الاكلات التراثيه المرتبطه في شهر رمضان  مع الهريس وكان الحريم ناقصين تعب  بهالشهر  هههه … عشان تسهلون عمليه الضراب ( الهرس )  استخدمو مضرب التحريك بالمكاين الكهربائيه او خلوه يطبخ فتره طويله لين ينهري من نفسه وعمليه الضرب بتكون سهله ومتجانسه … استخدمت نفس الوصفه اللي ذكرها القصار الا اني قللت كميه الجريش بنسبه كبيره واستخدمت جيله بدال كيلو …الشغله الثانيه اني استخدمت نصيحه صديقتي الانستغراميه njat80 وخليتها بالفرن بدال الجوله وكنت اطلعها كل 10 او 15 دقيقه اخلطها واردها مره ثانيه وميزه الفرن  انه ما يحتاج ماي وايد وانه ما يحكك بالجدر واخيرا مع كل عمليه تحريك قاعد تتمازج المكونات تدريجيا

نصيحه اخيره … خلو يمكم علبه شوفان احتياط اذا حسيتو ان الماي زايد ممكن تستخدمونها  وتعدل لكم سمك اليريشه بالطريقه اللي تفضلونها

رح انسخ الوصفه  من موقع القصار  من هني  .. ووصفات اليريش الثانيه تحصلونها هني وهني  وهذا اليريش المنهنه هني وهني وهني

المقادير:

  • دجاجة كاملة مقطوعة نصفان 900 غ

  • بصلتان مفرومتان

  • 4 حبات طماط

  • جيله حب جريش منقوع بماء فاتر لمدة لاتقل عن 3 ساعات ومصفى

  • علبة معجون طماطم

  • 4 فصوص ثوم

  • 3 ملاعق سمنة

  • بهارات مشكلة م ص من كل من (كزبرة , كمون , فلفل اسود , كركم , لومي اسود)

  • نص كوب روب حسب الرغبة يوضع وقت الضراب

  • كمية وفيرة من الماء للسلق ( 5 الى 6 اكواب )

الطريقة :

  • يوضع البصل والثوم والسمنة وتقلب مع قليل من البهار

  • تضاف  انصاف الدجاجة وتوضع فوق البصل ويقلب الخليط لمدة ربع ساعة

  • يضاف الطماط المقطع وعلبة معجون الطماطم فوق الدجاج ويترك حتى يذبل الكل  , يضاف الجريش ويحرك مع الكل لمده دقيقتين ثم يوضع الماء الساخن واللومي الكامل  ويحرك حتى يغلي  ثم يوضع بالفرن ويترك لمدة ساعتين عالاقل مع التقليب كل 10 – 15 دقيقه

  • بعد ان تنضج الدجاجة ونصفيها من العظم ثم نرجعها الجريش ونضربها ونضيف الكمون المطحون والملح حسب الرغبة واذا احتاجت شوفان نضيفها بهلمرحله ونستمر بالتحريك والخلط حتى ينهرس وتتمازج كل المكونات مع بعض

  • يضاف كوب الروب وعصير نصف الليمونة ثم تسكب في ماعون التقديم وتدهن بالسمن العداني وتزين بالحشو وهو عبارة عن البصل المفروم المفروك مع اللومي الاسود


اختلفت المسميات للاكله اللذيذه … سواها بحلقه هيا الشعيبي اللي كان معاها اليريش المنهنه وتطبيقي للوصفه بتلقونه هني … نرد على الوصفه من الوصفات اللذيذه جدا  وسهله جدا جدا خاصه اذا عندكم ماي فوح لحم جاهز (( نصيحه اي مرق سلق او ماي فوح  يظل لكم من مجبوس او غيره صبوه بتبرويرات وحطوه بالفريزر بعد ما تلزقون عليه التاريخ ويتشوفون شكثر مفيد للزنقات ))  .. وانا استخدمت اللي ظل من المنهنه

ممكن تضيفون لحم مع طبقات الخضار وقدمو معاه روب وخيار وسلطه  وختموها بفيمتو باااااارد  واذا بتسونها اكله شتويه بدلو الروب بدقوس طماط والفيمتو بتمر وجرثي واحلى من جذي بعد مافي

المقادير :

شرايح بطاط سميكه مقليه

شرايح بصل

شرايح طماط

فلفل علوب

لحم مسلوق  وماي السلق ( لحم نسلقه بجم  فص ثوم وقطع بصل وطماط وكركم وكاري وبهار وبهارات صحيحه مثل الدارسين والهيل ونجمه الينسون وورق الغار )

بهارات : ملح وفلفل اسود وهيل ناعم وكركم وكاري وبهار ولومي ناعم

وزعفران منقوع

رز او عيش

الطريقه :

نزهب الجدر ويفضل تيفال ونسخن الزيت نصف البصل والبطاط والطماط وفلفل علوب ونرش عليهم البهارات  والملح ونتركهم شوي ياخذون من النكهه ( اذا كنا بنستخدم لحم نحطه معاهم )

نحط العيش ونصب فوقه ماي سلق اللحم ونتركه على نار متوسطه لين يشربه العيش تالي نحط الزعفران ونهدي النار ونتركه يتسكر  ويقدم بالف عافيه


هالوصفه بعد من الوصفات اللي ما نزلت بالموقع وموجوده باليوتيوب … ضيفه الحلقه كانت هيا شعيبي .. سويت المنهنه والعيش والنتيجه ولا اروع

هالمره بقولكم كلمته الشهيره ” عيونكم ميزانكم ” لاني ما التزمت بمقدار معين حطيت بالنظر

شوفو شحلات اليريش مفلفل

الحين نرد للمقادير :

تحتاجون لحم غنم مقطع حسب الرغبه

طماط مفروم

بصل مفروم

بهارات عدله ( دارسين وهيل و لومي و بهارات فوح المجبوس و نجمه الينسون وورق الغار ومسمار او قرنفل)

بهارات ناعمه ( كاري وكركم وبهار مخلوط وهيل ناعم ولومي ناعم )

وطبعا يريش (جريش )

فصوص ثوم عدل

معجون طماط

الطريقه :

اول شي نهنه اليريش او مثل ما يقول نشفشفه على مقلاه ناشفه لين يتغير لونه بس ننتبه انه ما يحترق  ونتركه يبرد  وبعدين نغسله ونتركه ينشف

بجدر فيه ماي فاتر نضيف اللحم والبهارات المذكوره فوق مع الطماط والمعجون والبصل ونتركه يفوح لين يستوي

نشخل ماي اللحم و نبهر اللحم بدارسين ناعم وهيل وبهار وندخله الفرن يتحمر او اذا تبون تقدرون تقلونه

نحمس بصل والطماط مع الثوم مع كركم وبهار ولومي ناعم  مع المعجون لين الكل يذبل  وتالي نضيف اليريش ونقلب الكل لين يتغلف اليريش بالنكهات الموجوده بالجدر

نضيف له ماي سلق اللحم على مراحل .. يعني نضيف جزء واذا نشف نرد نزيده مع التقليب عشان لا يلزق بالقاع .. واخر شي نغطيه ونتركه يترسى لمن تنفش حبته وتستوي وننجبه ويقدم وبالف عافيه


فيديو الحلقه موجود باليوتيوب .. سواها من غير مقادير كله بالنظر حاولت اقدر المقدار حسب ذوقنا  زيدو او قللو الشكر حسب هواكم .. عاده ما استخدم الدهن العداني بالطبخ  و لا اعرف اشتريه  فاستخدمت بداله الزبده  .. النتيجه ما تفرق وايد عن الطرق الثانيه بالبلوق بالطعم .. فانتو شوفو شلي تحبونه وطبقوه

اللي تشوفونه وياه هذي البطاط الودجز هم على طريقه القصار وان شاء الله بنزلها كامله مع الاسكالوب بالصلصه

المقادير :

نص جيس  شعريه   مكسره باليد

كوب ونص شكر

ماي ساخن يغطي الشعريه

جم حبه هيل عدل

هيل ناعم وزعفران منقوع حسب الرغبه

قفشتين كبار زبده او حسب الرغبه

قروص بيض ( بيض مخلوط مع ملح وفلفل اسود ورشه هيل نحطه بمقله حاره ويفضل تيفال )

الطريقه :

ناخذ جزء من الشعريه ونحمرها بالزيت لين تتحمر

نذوب كوب الشكر بالماي ونضيف له الهيل ونوعين الشعربه ونتركه يفوح ويقلب قلبتين ونشخله (  ما نطول عشان لا يلجج  )

نذوب الزبده بالجدر ونضيف لها الشعريه وباجي الشكر والزعفران والهيل الناعم ونخلطهم كلهم مع بعض  ونتركه على نار خفيفه لما يتسكر .. واذا احتاج زبده على الزيده نضيف لها

نقدمه وفوقه قرص البيض ونرشه بالهيل الناعم على الويه ويقدم بالف عافيه


الوصفه لذيذه وناطعه ما شاء الله …زدت عليها اضافات بسيطه واحتاجت مني ماي فضفتها …الكميه وايد راهيه ممكن تسوونها وتسوون نصف الكميه  والنص الثاني يتم لي ثاني يوم ما يضره

باجي وصفاته تحصلونهم بموقعه

نكهه وبهار مع القصار

المقادير :

نص كيلو لحم مفروم واستخدمت غنم

كوب ونصف  الى كوبين من طحين ابيض او اسمر حسب ما تحتاج الخضره

شدة كزبرة مفرومه = تقريبا كوب

شدة شبنت مفروم = تقريبا كوب

شدة بقدونس مفروم = تقريبا كوب وربع

شده كرفس مفروم = تقريبا كوب وربع

شدة بصل اخضر مفروم = تقريبا كوبين او كوب ونصف

شدة بقل  ( كراث ) مفروم  ( ما كان عندي فما حطيته )

كوب بصل مفروم

3 حبات طماط متوسطة مفرومة

3 فصوص ثوم مهروسه

2  فلفل حار مفروم

ملعقتين كبار متروسين نشا

ملعقتين كبار عصير ليمون واذا تحبون زود ضيفوه

بيضة واحدة كبيره

ملعقتين الى 4 ملاعق كبار  دبس الرمان

ملح  تقريبا ملعقه كبيره

والبهارات حسب الرغبه واللي ضفته

ملعقه صغيره من كل من  ( لومي ناعم و كمون و كزبر بودر وكاري)

نص ملعقه صغيره  من كل من ( فلفل اسود و كركم )

ملعقتين صغار من البهار العادي

وشوي هيل ودارسين عن زفر اللحم

وربع كوب ماي احتياط اذا احتجنا

الطريقه :

نفرك البصل بالبهار  والملح وتالي نضيف له اللحم والخضار ونخلطهم عدل نضيف الطحين بالتدريج مع دبس الرمان وعصير الليمون والنشا ونخليه يرتاح بالثلاجه  بتلاحظون ان الخضره بتنزل ماي بعد بس اذا كان وايد ناشف نضيف الماي اللي عندنا.. قبل القلاي نطلعه  يفتر ونخلطه بالبيض  ( اذا حطيناه بالدهن وهو بارد بيشرب دهن وايد )

نسخن الزيت   ..نشكل الخبيزات باليد الممسوحه بالزيت او بالقفشه  ونقليه ويقدم بالف عافيه

ملاحظه :

  • الافضل انكم تتركون المزيج يرتاح فتره كافيه قبل القلي عشان تتمازج النكهات والنتيجه تكون افضل ( بالثلاجه )

  • ما يحتاج زيت غزير عند القلي  تقريبا ثلث المقله ( طاوه ) كافي

  • الزيت مايكون وايد حامي عشان لا يحترق الغلاف ويظل ني من داخل … تقريبا نفس حراره  دهن اللقيمات تقريبا


ما شاء الله عليه سليمان القصار .. الاكلات اللي يطبخها ببرنامجه ملح وبهار تشمون ريحتها من ورا الشاشه  وتشوقكم غصب على الاكل اللي يسويه لدرجه خلاني اشتهي الكراعين  بحلقه فاطه الطباخ وانا اصلا ماحب الكراعين خير شر … بحلقه امس زاغ قلبي على المحروق صبعه اللي سواه تبارك الله ..  وقررت اسويها وره البرنامج على طول ولان الناس صيام وموعد برنامجه قبل الفطور فما يمدي اسويها بدياي مثل ما سواها فسويتها بالخضار المتوفره عندي .. والنتيجه لذيييييذه جدا تسلم ايده على هالوصفه

ذكر اشياء مهمه للحصول على مرقه شهيه  منها ان المعجون ما ينحط مع  حمسه الطماط عشان لا يحترق ويطلع طعم مو مستحب ولازم الادام يطبخ مع البهارات او يتعرق مثل ما يقول قبل  اضافه السائل عشان النكهه واخيرا وليس اخرا اضافه نتفه شكر مع الطماط عشان يعطيه النكهه

لا تطوفكم كل وصفاته موجوده على هاللينك

المقادير : تكفي شخصين

بصله كبيره مقطعه مكعبات متوسطه

حبه قرع مقطعه كبار

حبه فلفل اخضر شرايح

حبيتين بطاط مقطعين كبار

جزرتين كبار مقطعين كبار

وطبعا اذا عندكم كوسا وبيديان ضيفوهم

نص راس ثوم

نص علبه معجون طماط

طماطتين كبار مفرومين ناعم

البهارات  :لومي  كاري وفلفل اسود وهيل ودارسين وبهار مخلوط وكركم

قفشه شكر

علب فلفل اخضر

مرقه سلق دياي او ماي مذوب فيه مكعب ماجي

جيس خبز خفيف مقطع ( استخدمت اسمر مثل اللي استخدمه  بالبرنامج )

الطريقه :

نحمس البصل بزيت نباتي ونضيف له البهارات  تقريبا  قفشه صغيره مالت الاستكانه القديمه ماعدا الهيل والدارسين رشه تالي نضيف الثوم والطماط  ونحركهم لين يذبل ونضيف الخضار  والملح حسب الرغبه والمعجون  والشكر ونقلبه شوي وبعدين  المرق ونتركه  يغلي ونضيف اللومي ونوطي النار لين تستوي الخضار

نضيف له الخبز المقطع وبين فتره وفتره نقلبه لين يشرب الماي و نقدمه وبالف عافيه



تابع

Get every new post delivered to your Inbox.

Join 982 other followers