المنتجات المفضلة بمطبخي

رح يكون التحديث اول باول ان شاء الله لبعض المنتجات وادوات الطبخ المفضله لي باذن الله 🙂

اخر تحديث :28/7/2021

*FOOD

خلاصه فانيلا رائعه معاها بذور الفانيلا موجوده بركن الذواقه بجمعيه الشاميه .. من افضل الانواع حتى الان

جبنه نابلسيه وايد لذيذه … ملحها معتدل تحتاج تحليه ساعتين الى 3 ساعات موجوده بمطحنه سمراء عدن وسوق الهلال المركزي وبعض الجمعيات التعاونية

خبز لذيذ ومشبع وصحي مستورد من الامارات العربيه المتحده متوفر باغلب الاماكن مثل مركز سلطان ولولوهايبرماركت وابروفد ماركت وسييفكو وغيرها .. لذيذ كقاعده بيتزا او كساندويش راب او محمص للتغميس

يعطي نكهه مدخنه عميقه بالبرغر وتتبيلات الستيك والفرن المشوي … احصله بلولوهايبرماركت وبعض الاحيان مركز سلطان

ميبل سيرب/ القبقب ممتاز سواء باللون او النكهه والسعر مقارنه بباجي الماركات … احصله بسيفكو

افضل حسوجاهز طعما … موجود عند ام خالد الهاجري واسم حسابها اعشاب طبيه

طحين الابيض الكامل …كل فوائد الطحين الاسمر بمرونه الطحين الابيض … هالطحين عجيب تحصلونه بلولوهايبرماركت بفترات معينه للاسف مقطوع من كذا سنه بالكويت لازم تطلبونه من الموقع بس سعر الشحن جدا مرتفع

احلى نوع توفي ويشبه المنزلي بدرجه كبيره .. تحصلونه بماركس اند سبنسر

خلطه جاهزه تبلون فيها الدياي او الربيان وعلى طول تعفرونها ببقسماط او شوفان او كورن فليكس مسكر او حتى بسكوت مملح مطحون وتقلونه او بالفرن ( ما يحتاج طحين وبيض قبل البقسماط )

احلى نوع زعفران جربته للحين … زعفران اسباني خنين

مطحنه سمراء عدن …وجهتي لشراء البهارات وكانت وجهه امي رحمها الله ووجهه جدتي ووجهه جدتي الكبري ( ام جدتي )

نزلت مواضيع عن البهارات هني وهني

اضيف لهم هالبهارات

بهارات مدخنه تقدرون تحطونها على اللحم والدياي المشوي او مع تتبيله الربيان حق الربيان المقلي او ترشونه فوق البطاط المقلي

حلو بالسلطات او مع الخضار بالفرن او فوق العجين قبل لا يدش الفرن

خلاصه الخضار واللحم والدجاج لا تحتوي على نكهات صناعيه ولا جليلاتن  حيواني ولا اجينموتو  …تجدونها في مركز سلطان

بهارات اسناد  من احد بهاراتي المفضله خاصه بهار متبل حار وبهارات السمبوسك و الدقه المديني والكاري المعتدل

*KITCHENWARE ادوات المطبخ

جهاز التخمير … ما كنت اعتقد اني احتاج هالجهاز الا لما شريته نتيجته رائعه رائعه بتخمير العجين اذا كان مطبخكم دافي ما تحتاجونه موجود بليكلاند وتقدرون تطلبونه من امازون

جهاز الضغط الكهربائي متعدد الاستخدام من ماركه انستانت بوت او غيرها من الماركات … مساعدي اليمين بالمطبخ خاصه بشهر رمضان استخدمه باليخاني والشوربات و خلاصه مرق العظام سواء البقري او الدجاج واطبخ فيه الحبوب مثل القمح والفريكه والجريش ما يحتاج مراقبه بمجرد ما اوقت وقت الطبخه واخليه يشوف شغله .. مريح جدا جدا

وعاء الاستبات مريح وحجمه مناسب وسهل التنظيف عيبه سعره يعتبر مرتفع .. موجود بتافولا

جهاز عجيب ما يحتاج لاستخدام كميه زيت كبيره فيه وممكن حتى تجففون فيه الفواكه والخضراوات

مجفف الخضار من لايكلاند مارينا مول بحدود 27 دينار

خيوط سيلكون تستخدمونها كذا مره مفيده بالمطبخ خاصه بالاسماك والدياي المحشي او الروستو

شاش يستعمل للبنه( بديل للغتره ) او كمصفايه دقيقه للسوائل او حتى للجبنه وانا استخدمها لما اسوي الفخذ المشوي بالفرن اغمسها بماي او زيت واغطيه فيحمر اللحم من غير ما ينشفه .. تحصلونه بمركز سلطان وانا ما استغني عنه

احلى ماركه سكاكين اسمها غلوبال من صنع ياباني … تحصلونهم بتافولا سعرها مرتفع بس تستاهل

احبه …اعشقه ..اي شي فيه خبز وبيتزا استخدمه.. ورائع جدا حتى بتسخين الفطاير .. فيه 3 درجات حراره وعمتي الغاليه يايبته لي هديه من تروفاليو

*BOOKS

كتب عبير الراشد

اصدارات المطاحن

بتول الكندري

Ina Garten

cookinglight مجلات

والاكثر بتشوفونه بصفحه mybookshelf

الإعلان