كبه بلبن او كبه بلبنيه

وايد وايد احب هالاكله … وكل مره اسوي اللبن المطبوخ بطريقه

بحط لكم الطريقه اللي تنطبخ فيها بالرز… وفي طرق بالنشا .. وفي طرق نضيف لها البيض.. وكلهم لذييذيين

كبه ( بذكر طريقتها بعدين… او جاهزه حسب الرغبه)
3 علب روب
ماي بمقدار علبه روب وحده
طبقه يد رز مصري او صنوايت مغسول ومنقوع .. اللي ما يحب الرز يقدر يستعيض عنه بنشا
3 فصوص ثوم او حسب الرغبه
نص شده كزبره صغيره او حسب الرغبه
قفشتين كبار زيت زيتون
ملح وفلفل حسب الرغبه

الله يسلمكم تحتاجون كبه 8-10 حبات…
نسلق الكبه بماي مضاف له فقشه تحويجه الكبه ( عباره عن مرقدوش وريحان ومادري شنو بس اعتقد كمون ) وشوي نشا عشان لا تتبطل الكبه واول ما تصعد لي فوق شيليها
وحطيها بصينيه بالفرن عشان تتحمر ( ممكن تمسحين الكبه بزيت قليل ) او اذا تحبونها تكون مقرمشه اقلوها وخلوها تنشف

في هالاثناء اخذي لج علب روب وصبيهم بالجدر وصبي بعلبه وحده ماي والملح والفلفل وحركيه على نار متوسطه ليما يفور .. بهالمرحله لا تهدين اللبن قعدي حركيه على طول

اول ما يفور وطي النار وحطي الرز ( اذا كنتي تستخدمين نشا ذوبيه باللبن وهو بارد).. وحركيه شوي وبعدين حطي الكبه وخليها على النار ولا تحركينها عشان لا تتبطل
بمقله على كثر سخني زيت الزيتون وحمسي الثوم والكزبره وصبيها على الكبه وهي حاره.. حركي الكبه مره وحده وخليها على نار واطيه ليما تستوي.. انتي بتشوفين اللبن ثقل ومارح يكون محبب وطعمه لذييييييييييييييييذ

طبعا هالوصفه تقدرون تغيرون تفاصيل صغيره فيها وتكون مناسبه للرجيم لان مثل ما تلاحظون الكبه مو مقليه

وممكن تستيدلون الروب بروب قليل الدسم بس لاحظو ان الروب رح يفرط شوي لان نسبه الدسم مو كافيه فيه بس الطعم مرح يتغير 🙂

الإعلان