تبوله…

هالتبوله صارت بعد محاولات وتجارب حق كذا وصفه يالله صارت اللي بمزاجي
انا احب التبوله تكون حامضه و الخضار فريش مو ماي

السر بهالتبوله تعلمته من صديقتي وحبيبتي من حلب هو قشر الليمون وانا وايد تعلمت اسرار من موقعها l2ma.com.. والسر الثاني تعلمته من صديقتي رحاب وهي سوريه عايشه بالكويت هو السماق مع البصل

المقادير :

3-4 شدات بقدونس
شده نعناع كبيره
3 عواد بصل اخضر
ربع كوب برغل ناعم او نص اذا تحبونه وايد
3 طماطات
ليمون حسب الرغبه انا احط تقريبا ربع كوب او اكثر شوي
زيت زيتون نص قلاص
سماق
نعناع يابس
رشه بابريكا ودارسين ( حسب الرغبه )
وملح هم حسب الرغبه

طبعا الخضار كلها مفرومه بالسكين مو بالبروسسر

الحين التطبيق

البرغل ينغسل بس و ضيفي له بشر ليمونه وحده و يتنقع بجم قفشه كبيره ليمون وماي بمقدار ربع كوب للكل و حطو الملح و رشه بابريكا ودارسين كلهم على البرغل ( مو ضروري البهارات انا ماحط دارسين خواتي ما يحبونه ) .. وبعد ما يشرب البرغل الماي حطو نص كوب الزيت .. جذي لما تاكلين التبوله تحسين بنكهه البرغل تهببببل وماكو سوائل بالتبوله نفسها

ونفس الشي البصل لما تقطعينه رشي عليه باجي كميه الليمون مع السماق وضيفي الطماط و الخضار والنعناع اليابس .. واخر شي حطي البرغل وخلطيه وقدميييه بالعافيه

يمكن الصورة ما تعجبكم لاني للاسف ما زينتها بس ترا والله هالتبوله تسوا لانها لذييذه وايد

الإعلان