مربين ربيان طري …

عندي وايد وصفات حق هالطبق… وان شاء الله كل ما سويت طريقه يديده حطيتها هني…

الحلو بهالطبق انه لذيذ وسهل وما ياخذ وقت…

عاده يقدم مع دقوس طماط ودقوس صبار والاجار وخضار ورقيه وبصل…

يعني بالمختصر طبق يبيله يوع كافر لووول…

طريقه الدقوس جدا سهله بنزلها بموضوع منفصل اذا الله سهل مع كذا نوع من الصلصات اللي تقدم مع العيوش

الاجار… الصراحه انا ماعرف اسوي الا مخلل الشلغم واجار ثوم الجبل… والمخلوط اشتريه جاهز ما يسوا,,,

البصل … يقصص شرايح وينقع بليمون او خل مع زيت زيتون ( الكميه راهيه) وفلفل اخضر و سماق…

بعد ما خلصنا من المقدمات نبتدي بالطبق

ربيان طري

بصل مفروم

قلقل اخضر بارد ( فليفله ) مكعبات

فلفل اخضر حار ( علوب )

ثوم مهروس

زنجبيل مهروس

عيش مغسول ومنقع بماي وملح

ملح

بهارات ( بزار بحريني وكاري وبهار وهيل و كزبره بودر )

طماط مفروم صغار

لومي اسود

الطريقه

نحمس البصل ( الكميه راهيه ) مع الثوم والزنجبيل ونقط عليه الربيان ونخليه على نار متوسطه… نضيف البزار البحريني والكاري والهيل والكزبره ونحركهم لين تطلع ريحتهم

نضيف الفلفل البارد والطماط ونخليهم على النار لين يذبلون نشيل جزء ونضيف الماي ونقط علب الفلفل ولومي اسود عدل ونملحه … اذا غلى نسقط العيش ونتركه لين يتسكر عدل واذا نشف الماي نرش شوي دهن براس الجدر ونرش هيل ناعم وبهار على العيش

عند النجاب … نحط العيش ونحط فوقه باجي الحشو اللي شلناه وبالعافيه

Advertisements