اطباق رئيسية · اطباق رئيسية- لحوم · اطباق رئيسية-باستا او المعكرونه

معكرونه بالبشاميل…

ماكو بيت ما يعرف يسوي هالطبق… وكل بيت له اضافه خاصه فيه
انا اسويها بطريقه عاديه جدا …تعلمتها من امي الله يرحمها وما فكرت اضيف لها شي يديد… ومع هذا حبيت اشاركم فيها
نحتاج حق:
معكرونه حسب الاشخاص ( انا استخدمت كيس )
لحم مفروم نص كيلو … انا استخدمت غنم
بصل ( بحدود بصلتين صغار)
بهارات : بهار لحم و بزار و زنجبيل بودر وهيل وفلفل اسود
معجون طماط
ملح
ثوم مفروم
اعشاب مجففه حسب الرغبه ( اوريغانو – روزماري- ريحان مجفف – ميراميه.. الخ )
حليب بحدود لتر ( يمكن تستغربون مني بس انا لاحظت اذا سويته من حليب البودر يطلع احلى)
4 قفاش كبيره متروسه طحين
4 قطع زبده صغيره ( اعتقد 10 غرام )
رشه ملح وجوز الطيب وفلفل ابيض
جبن موتزريلا مبشور واذا حبيتو بعد بارمزان
الطريقه:
نسلق المعكرونه بماي وكميه وفيره من الملح وقفشتين زيت وتصفى
نسوي حمسه اللحم ( العصاج) اول شي نحمس البصل مع الثوم ونضيف له البزار والزنجبيل البودر
نضيف اللحم وباقي البهارات مع معجون الطماط ونخلطهم عدل… اذا حسينا ان اللحم نشف عدل نضيف الماي بكميه مناسبه مع الاعشاب ونخليه على النار لحد ما تثقل الصلصه ويستوي اللحم عدل نملحها ونضيف شوي شكر( سكر) عشان نكسر حده المعجون
الحين للبشاميل…
نذوب الطحين بالحليب ونحطه على النار واذا سخن شوي نحط الزبده ونظل نحرك بالمزيج لين يثقل… نضيف الفلفل الابيض والملح وجوز الطيب
بعد ما نسكر على النار نضيف نص كميه الجين بنشوف البشاميل يتمغط ويصير يهبل
الحين للتطبيق
ناخذ المعكرونه نحط نصها بالبايركس او صحن الفرن ونحط اللحم المفروم فوقها وبعدين باجي المعكرونه و نصب البشاميل لين يغطي المعكرونه كلها
نرش باجي الجبن وندخلها الفرن لين تتحمر الطبقه العلويه وبالعافيه
Advertisements

2 thoughts on “معكرونه بالبشاميل…

  1. اقدر اقول شي غير يا سلاموتسلم ايدج:)شهيتينيبس عاد انا مو من محبين المعكرونيا بالبشاميلبس هذي شكلها حلو:)

  2. هلا فيج بالغاليهقمت استانس لي شفت ردودجومشكوووره هذا من ذوقج العسلتدرين عاد انا بعد ماحبها وايد… يعني وجودها بالنسبه لي جدا عادييمكن عشان جذي ماحاولت اتفنتق فيها ههههوحباج الله مره ثانيه *%

التعليقات مغلقة.