اطباق رئيسية · اطباق رئيسية- لحوم

تكساس فرايز

يمكن تشوفون ان هالطبق يعتبر من المقبلات بس انا وخواتي ناكله كطبق رئيسي
طبعا انا مو حاطه هلابينو بالصورة لاني ما اكله بس كان موجود بالسفره واللي يبي يحط بمزاجه… والشي الثاني صلصه الرانش خواتي ما يحبونها وايد وانا نسيت اسويها
بس اهي وايد سهله تاخذونها من مركز سلطان على هيئه بودره وتخلطونها مع ساوركريم.. تهبل وهالنوع احلى رانش يمشي مع التكساس فرايز

بسم الله …

*المقادير :
طبعا اهي ما تحتاج مقادير محدده يعني كل شي حسب الرغبه

بصله
لحم مفروم بقر بس يكون شوي مدهن
نص فليفله خضره مقصص مكعبات صغيره
بهارات مكسيكيه ( موجوده بمركز سلطان بجيس انا خالطه 3 انواع واحد كساديا وواحد مال تاكو والثالث ماذكر مال شنو بالضبط بس مفرغتهم كلهم بعلبه البهارات اللي عندي )
شوي صلصه بيتزا ( مو ضرورية)
وثوم مدقوق شوي
بطاط مقلي ( بس ما يكون مقرمش خلوه لين شوي)
جبن مكسيكي ( كولبي ومونتري جاك)… واذا مو موجود حطو تشيدر مع موتزريلا
وماي
وملح

*الطريقه :
بنتفه كلش زيت حمسو البصل لين يفتح لونه وحطو اللحم وحمسوه لين ينشف مايه وبعدين حطو الثوم والفليفله و الملح والبهارات ( البهارات حطو كميه راهيه).. وقفشه صلصه بيتزا وبس .. انا اضيف تقريبا نص كوب ماي عشان اخليه يستوي عدل

الحين حطو البطاط وفوقه خلطه اللحم والجين وخلو الجين يذوب من حراره اللحم وعليكم بالعافيه

Advertisements

5 thoughts on “تكساس فرايز

التعليقات مغلقة.