بلاليط وبيض …

هالطبق اكيد الكل يعرفه…

من الاطباق الشعبيه الحلوة.. وعاده تنوكل بالشتا

واهي طعمها سويت…يدتي الله يرحمها كانت دايم تسويه لنا وعشان جذي وايد احب هالطبق لانه يذكرني بطفولتي

سويتها اليوم على العشا… ونقلتها لكم على طول

بعض البيوت تحمس الشعريه او تحمصها بالفرن عشان تكون حمره…بس انا احبها تكون صفره والذوق يرجع لكم

المقادير:

من 6-7 كور شعريه
من 3/4 الى كوب سكر ( انتو تحددون درجه الحلاوة حسب الذوق )
2 حبه زبده صغار
هيل ناعم حسب الرغبه
3 بيضات
ربع قفشه صغيره زعفران منقع بماي دافي وماي ورد
ملح وفلفل

الطريقة:
تسلق الشعريه بماي حار لمده 5 دقايق او اقل حسب نوع الشعريه… المهم انها ما تستوي كامل
تشخل بمشخل ويوضع الشكر فوقها وهي حاره ويرش الهيل الناعم وتخلط
ترد بالجدر وتوضع فوقها حبه الزبده والزعفران وتترك على نار واطيه حيل ليت تتستوي عدل

في هالاثناء تخلط البيضات عدل مع الملح والفلفل الاسود وتقلى بالزبدة على هيئه قرص وتوضع فوق البلاليط

هذي صوره البلاليط بعد ما استوى قبل وضع البيض

الإعلان