معكرونه باللحم والبطاط والمشروم ( اكلة البر )…

هالوصفه من الوصفات اللذيذه .. انا عن نفسي ما اشبع منها…

انا ماروح البر… بس دايما اسمع انهم دايما ياكلونها هناك.. وبما ان الحين موسم التخييم حبيت اشاركم بوصفتي

بهالوصفه احب استخدم اللحم المقطع مو المفروم.. احس يعطي طعم احلى…

واستخدم زيت الزيتون مو زيت الذره…

والبطاط اللي استخدمه اسلقه بدل لا اقليه بيكون اخف والنكهه نفسها ما تغير…

بسم الله نبتدي

لحم فخذ صافي مقطع حسب الرغبه… انا استخدمت تقريبا نص كيلو
2 بطاط مكعبات صغيره

علبه مشروم شرايح
2-3 بصل كبار مكعبات
3 حبات طماط مفروم
بهار
لومي ناعم
وبزار

وزنجبيل
وملح
وتقريبا جيس الا ربع معكرونه
زيت زيتون
وماي
وعلبه تقريبا معجون طماط
ورقه غار
دارسين صحيح
هيل حب بحدود 3 حبات

الطريقه:

اخذ اللحم واقصصه واسلقه بماي وانطر اشيل الغفو وبعدين احط فيه البهارات العدله ( دارسين وورق غار وهيل) لين ينضى اللحم… طبعا ماي السلاق تقدرون تستخدمونه بشوربه بدال ماجي او تقدرون تثلجونه ووقت الاستخدام تذوبونه على النار

اغسل المشروم عن ماي التعليب و اسلق البطاط نص نضج

اسلق المعكرونه بماي مملح بس ما يكون مستوي كامل

احمس البصل بزيت الزيتون لين يذبل وابتدي اضيف البزار والبهار واللومي والزنجبيل واذا شفت البصل بدا يلزق في القاع اضيف الطماط والمعجون ووباجي المشروم والبصل واضيف ماي شوي واخليها على النار لين تكون صلصه ثقييله

اخلط المعكرونه بالحمسه واردها على نار واطيه حتى يكتمل استواءها

وبالعافيه

ملحوظه :
طبعا تقدرون تضيفون اي نوع من انواع الخضار مثل البزاليا والجزر والكوسا وتقدرون تخلطون المعكرونه بالنهايه مع كزبره او بقدونس مفرومين لتجديد النكهه

الإعلان