اطباق رئيسية · اطباق رئيسية -اسماك وماكولات بحريه · اطباق رئيسية- اطباق الارز او العيش · اطباق شعبيه

سمج مشوي جدر …


هالاكله لذيييييييييييذه بطريقه مو طبيعيه… يمكن لاني من عشاق السمج وايد احب هالاصناف من الاكل…

ماقدر اعلق على هالطبق اكثر من جذي… جربووه وبتحكمون بنفسكم

المقادير:
سمج زبيدي مقصوص صوب البطن ومنطف عدل بليمون وملح
بصل راهي
هيل ناعم
بزار
بهار برياني ( انا استخدمت ماركه مهران )
ثوم مهروس
كزبره وشبنت مفرومين لحشو السمج وزياده شوي عشان حمسه البصل
صلصه ماجي السائله
زنجبيل مهروس
طماط شرايح
فلفل اخضر شرايح
رز مغسول ومنقوع
بهارات سلق كامله ( بهار النجمه ودارسين وورق غار ومسمار وبهار الميس)
سمنه ( كلارا او BBQ او اي نوع تحبونه)
زعفران منقوع بماي دافي
الطريقه:
نتبل السمج بثوم وزنجبيل مهروسين وبهار البرياني وهيل ناعم ونحشيه كزبره و شبنت ونرش على الويه ماجي السائل وونتركه 10 دقايق وبعدين نقليه ..
نسلق العيش ببهارات العدله 4/3 سوا …
نحمر البصل مع شوي هيل وبهار برياني وبزار و ثوم وشوي كزبره وشبنت ونصف فوقه شرايح الفلفل والطماط والسمج المقلي وشوي من صلصه الماجي السائله والملح وبعدين نحط العيش فوقهم واذا طلع البخار نصب الزعفران و قفشه كبيره سمنه على الويه ويترك على نار هاديه ليكمل النضج…
وبعدين بعد ما يكمل سواه.. تقلبه بصينيه او صحن عود ويقدم بالعافيه…
Advertisements

One thought on “سمج مشوي جدر …

التعليقات مغلقة.