وصفات رمضانيه · اطباق رئيسية · اطباق رئيسية- لحوم · اطباق شعبيه · خطوة بخطوة

جريش لقيمي ( مضروبه )…

 

هالاكله احبها وايد .. عموما انا من محبي الاكلات الشعبيه
عاده انا ما اطبخ بمقادير ثابته… بس بهالوصفه سويتها اول مره برمضان الله يعوده عليكم وعلينا بكل صحه وعافيه…
خلطت بين 3 وصفات… من كتاب المطاحن و كتاب اكلات كويتيه لفاطمة حسين و شرح يدتي (( طبعا يدتي الله يطول بعمرها صار لها فتره ما تطبخ .. بس انا اخذ منها اساسيات التطبيق منها ))…
استخدم بهالوصفه الجيله ( وهي لغير المتحدثي باللهجه الكويتيه علبه الاناناس المعلب ).. وهي تعادل تقريبا كوب ونص الى كوب و ثلاث ارباع


رح نحتاج صفريه ( وهي الجدر المستخدم للهريس والجريش )… ممكن تستخدمون اي جدر بس هذا ميزته انه يساعد في الضراب ( عمليه الهرس ) واكيد نحتاج معاها المضرابه… واللي ما يبي يتعب روحه وعنده كينوود او كيتشن ايد يقدر يستخدم ال k في الخلط بس انا عندي بالمضرابه احسن
.. لوصفات ثانيه لليريش تحصلونها هني وهني


المقادير :
500 غ لحم عجل هبر.. ويفضل انه يكون طازج… يعني ذبح نفس اليوم وما يكون مبرد او مثلج
1 ك بصل مفروم
1/2 1 ك طماط مفروم
1/2 جيله جريش = يعني تقريبا كوب
3 م ك معجون طماط
2 لومي اسود كامل
1/4 ك سمن ودهن مخلوطين
ملح
بزار
بهار
كمون
فلفل اسود
كزبره بودر شوي
ماي ساخن
وكويكر للطواريء

الطريقه:
يغسل الجريش عدل وينقع لمده ساعه ونص تقريبا

يحمر البصل بالسمن والدهن و يبهر بالبزار والكمون والبهار والفلفل الاسود واحط فوقه اللحم واتركه يتحمر شوي

وبعدين احط الطماط واتركه شوي لين يذوب الطماط وبعدين اضيف المعجون والجريش والماي الساخن واحطه على نار واااطيه مع التحريك بين فتره وفتره عشان لا يلزق بقاع الجدر ( تقريبا ساعتين لي 3 ساعات على حسب لهب النار) .. واذا لاحظتو ان اللحم استوا واليريش انتفش بس الماي وايد زيدوه كويكر وردوه على النار لين يثقل شوي

وبعدين عمليه فرد العضلات تبتدي..حكرو جدوكم بزاويه وضربوه بطريقه ارفع اطحن اهرس ههههه لين تتمازج المكونات

وبعدين نجبوه وزينوه بالسمن او الدهن العداني للي يحب .. انا احبه مع بصل مقرمش.. وما ذكرت اصور لين اكلت قضيت على نصه لوووول

 



Advertisements