برياني اللحم والخضار…

هالوصفه اخذتها من كتاب المطاحن حلوة ولذيذه وايد.. غيرت بمقدار البهار شوي وبدلت بنوع من الخضار وزدت كميتها ..

استخدمت بهالوصفه لحم العجل ( هبر) .. بس اتوقع شقف الغنم بتكون ادسم واترف

المقادير:

لحم حسب الرغبه… انا نسيت اوزنه بس بحدود 750 غ اقل او اكثر

1/2 ك بصل مفروم

1/2 م ص زنجبيل فرش مبشور

1/2 م ص ثوم مهروس

1/4 م ص كركم

1/4 م ص بزار بحريني

1/2 م ص كزبرة بودر

1 م ص كاري

1/4 م ص فلفل اسود

1/2 م ص بهار برياني ( راجا او مهران او اسناد او مجدي او من سمراء عدن ..)

1/2 م ص لومي ناعم

1 م ص معجون طماط

1/2 ك طماط

1/4 ك كزبره مفرومه

1/4 ك نعناع مفروم

1 م ك شبنت مفروم

2 م ك بقدونس مفروم

حبه بطاط كبيره مقطعه مكعبات ومسلوقه

1/2 ك جزر مكعبات مسلوق

1/2 ك بصل مقلي

1/2 حبه فلفل حار

مكعب خضار

جيله عيش ( رز)

زعفران منقع بماي ورد

بهارات كامله : عود دارسين ، ورق غار، 5 حبات هيل، 5 حبات مسمار

زيت نباتي وسمنه

الطريقه:

يسلق اللحم لمده 3 دقائق بماي صافي وبعدين نغير الماي ونحط البهارات الكامله ونخليه يطبخ لي تمام النضج

نحمر البصل مع الزنجبيل والثوم ومكعب الخضاروباقي البهارات الناعمه والمعجون .. ثم نضيف اللحم والطماط والبطاط والجزرونحركها لمده 5 دقايق تقريبا عشان ياخذون النكهه

وبعدين نضيف الكزبره والنعناع والشبنت والبقدونس والبصل المقلي والفلفل الحار ونتركه شوي على النار ونعزله

نسلق العيش نص سلاق ( 6-7 دقايق وعلى حسب نوع العيش ) ونحط جزء منه بالجدر وحمسه اللحم وباجي العيش

نرشه بقليل من الزيت والزعفران ونغطيه بقصدير ونخليه على نار هاديه تقريبا45 دقيقه

نقلبه بصحن التقديم وبالعافيه

الإعلان