الباستا وايد وايد سهله بس مراحلها طويله شوي… نحط المكونات بالعجانه ونتركها تعجن فتره ( كل ماطالت الفتره احسن) .. انا نزلت الوصفه الاساسية لاني ناويه انزل باستا خضار مع الفريدو لذيذه وحلاتها بالهوم باستا
انا ازيدها سميد لاني احبها قاسيه.. يفضل ان جهاز الباستا يكون متوفر عندكم والا بتعبون بعمليه الفرد والتقطيع … بالصوره مبينه وهي عجبنه وبعد ما تقطعت لي شرايح واخر شي بعد ما سلقتها… الريحان والبرمزان اضافي بس بيعطي نكهه وطعم حلو
المقادير :
1 2/1 ك طحين
2/1 ك سميد
3 بيضات
رشه جبن بارميزان
2 م ك ريحان مفروم
1 م ك زيت زيتون
رشه ماي
الطريقه:
نخلط المقادير كلها عدا الماي ونعجنها واذا شفناها للحين قاسيه نرش عليها ماي ونرد نعجنها وبعدين نلفها بالنايلون الشفاف ونحطها بالثلاجه او برا فتره نص ساعه لي ساعه بالكثير
نقصصها ونفردها شوي وبعدين ندخلها بالجهاز ونفردها لي السمك اللي نبيه واما نقطعها بالسكين او نردها بالجهاز ويطلعها شرايط
ننشرها ليتن تنشف
وبعدين نسلقها بماي مملح عدل و نتفه زيت… تاخذ وقت اطول من الباستا المعلبه
My Kitchen 