مشخول بطاط وكوسا وربيان تندوري…

هالاكله اعشقها… صج لذيذه و مو شرط اكلها مع الربيان .. احبها بروحها ساده… العيش بيكون حامض وستيكي شوي.. تعلمته من اختي بعد قلبي سوته مره وصرت ادمان عليه تقدرون تحمسون صدور الدياي وتكملونها مع الوصفه او تستخدمون الربيان الطري مع الكزبره…اما قصه الربيان فالتتبيله بدت معاي غلط وكنت بعدلها وطلعت بهالنتيجه وطلعت حلوة

للاسف مالي مقدار ثابت فيهم يعني كل مره ازيد واشيل شي…

المقادير:

كوب عيش مغسول ومنقوع

كوسا مكعبات

بطاط مكعبات

21 بصله صغيره مفرومه

ثوم مدقوق

زنجبيل مدقوق ( تقريبا 21- 1 م ص متروسه )

كزبره بودر

بزار بحريني

كاري

مكعب ماجي

استكانه عصير ليمون ( او مركز الحامض اللي يي بغرشه صفره)

مقادير الربيان:

ربيان طري

كمون

كزبره بودر

زنجبيل مهروس

ثوم مهروس

كزبره مفرومه

روب

بهار تندوري

معجون طماط

عصير ليمون

زيت زيتون شوي

الطريقه:

تخلط كل مقادير التندوري وينقع فيه الربيان

يسلق العيش 21 سلاق

تقلى مكعبات البطاط والكوسا

نحمس البصل والثوم والزنجبيل وشوي كزبر بودر وبعدين نضيف البزار البحريني بكميه معقوله والكاري ومكعب ماجي مذوب بشوي ماي ونحط البطاط والكوسا وعصير الليمون ونقط فوقه العيش على طول نخلطه عدل ونتركه لين يكمل نضجه ويستوي على نار واطيه

ندخل الربيان بالفرن الحار بصحن فخار لين يستوي وتثقل الصلصه

نقدمهم مع بعض وبالعافيه

الإعلان