الخبيصه او البثيث…وصفتين …(( تحديث))

خبيصه تمر

الاخت Corpse Bride طلبت مني وصفه البثيث.. وانا اعتقد ان هذي اللي تقصدها… طبعا الناس الخبره يسوونها مفلفله اكثر
عاده هالاكله يعطونها بالنفاس يضيفون لها رشاد وفوفله وادويه الظهر (( تلقونهم بالحواي ))…
للاسف الوصفه من غير مقادير ثابته… اخذتها من يدتي الله يطول بعمرها جذي (( وصفتها تصلح للنفسا اكثر لانها حاره ومتروسه ادويات)).. عاد يبيلكم تقدرون على كيفكم كل اللي ادري عنه انه تستخدم طاقتين (( 2 كيلو تمر ))وعليهم 6 جيلات طحين محموس معاه وقرشتين زيت زيتون… مرت عمي تسويها طحين وتمر وزيت وتضيف بس بهيل وشكر وزعفران…خالتي (( خاله ابوي)) تضيف لها شكر وزيت مازولا بدال زيت الزيتون ولونها يكون وايد افتح وتضيف لها بس دارسين وهيل
عندي وصفه ثانيه بكتاب فاطمه حسين وبكتاب المطاحن وبكتاب منال العالم اعتقد… اذا تحبون ممكن اضيفهم ..
المقادير:
تمر اخلاص منزوع النوى
حلبه
دارسين
فلفل اسود
هيل نتفه
حسو (( اخذوه من سمراء عدن او من اي حواي لان ماعندي وصفه له ))
طحين اسمر
زيت زيتون
رشاد وفوفله و ادويه حق للنفاس طبعا هذيل حسب الرغبه
الطريقه :
نحمس الطحسن لين يصير لونه احمر غامج
نحمس الرشاد
ننقع الحلبه يوم كامل وبعدين نخلطها مع التمر على النار مع شوي ماي لين ينهرس التمر عدل وتذوب الحلبه بس من غير ما يغلي الماي … او تقدرون تضيفون ماي ساخن وتخلونه ينقع فتره مع قفشه صغيره بكربونات … خلوه على النار وقلبوه لين يتحمص وينشف عدل
نزيد عليها الطحين شوي شوي ونحرك ونضيف الزيت معاه بالتناوب او مره وحده .. ونزيد الرشاد والدارسين والحسو والفلفل الاسود وباجي الادويه… يدتي ما تحط شكر بس اذا تحبون ضيفوه
***********
الوصفه الثانيه…
المقادير:
2 كوب طحين اسمر
1 كوب تمر اخلاص
1 2/1 الى 2 كوب ماي
 سكر حسب درجه الحلاوه اللي تحبونها
ربع قفشه صغيره زعفران منقع بماي ورد
نص قفشه صغيره هيل
ممكن تحطون زنجبيل او دارسين او فلفل اسود حسب الرغبه ( نص قفشه صغيره)
نص كوب زيت
نذوب ماي وشكر على النار واذا ذاب كله وصار ساخن نحطه على التمر منزوع النوى وتحركونه عدل لين يذوب التمر
نحمس الطحين شوي ليما يتحمر ونحطه مع التمر فوق النار ونضيف هيل وفلفل اسود او دارسين حسب الرغبه مع زعفران منقع بماي ورد وزيت يضاف اخر شي وبالعافيه
مع ملاحظه ان مقدار الطحين لازم يكون ضعف التمر..
وتقدرون تحمسون الطحين وتضيفون فوقه التمر وتحمسونه وبعدين تضيفون الماي والشكر والزيت والبهارات 🙂
Advertisements

9 Comments اضافة لك

  1. Corpse Bride كتب:

    فديييييييتج…مشكوره وما قصرتي..ارد البيت واسويهاا..ماما عوده الله يرحمها كانت تسوي جدر عووود وتييبه معاها البر اول عشر دقايق ممسوح الجدر .. وصبيانا ماكلين منه قبل البنات..ما ادري ليش نحبه.. بس ما اظن انها كانت تحط حسوو..يعطيج العافيه خيتووو على سرعه الاستجابه:)

  2. bent el deera كتب:

    Corpse Bride *************هلا عزيزتييدتي تحط حسو وحلبه لانها ما تسويها الا بالنفاس بس كنا ناكل معاهموصج هالوصفه من الوصفات العجيبه..ان شاء الله تجربينها وتطلع على ذوقجبس نسيت اقولج حيلج بيطيح وانتي تخلطين التمر بالطحين هههههوحياج الله عزيزتي مره ثانيه

  3. bent el deera كتب:

    ومثل ما قلت لج اذا بغيتي الوصفه الحاليه اللي يغلب عليها الشكر والهيل بلغيني واييبلج الوصفه من عمتي او مرت عمي :>

  4. Corpse Bride كتب:

    عيل انتي كريمه وانا استاهل..تكفين حطيها اذا تقدرين..تعبتج معاي..

  5. Manal كتب:

    يا سلالالالالالالالالالالامدستي على وتر حساس الحساوية والتمرعورتي قلبيبس وصفة الولد هذيانا اسويه بس مع حمسة الطحين اسمر او ابيض بالزبدة الخضارية او زيت الذرةمع السمسم والجوزتسلم الايادي:)

  6. bent el deera كتب:

    Corpse Bride*************تستاهلين ونص .. حطيت لج الوصفه الثانيه :>وانتي تامرين امر وما فيها تعب .. Manal******الله يسلمج حبيبتي.. وانتي طلعتي نفسي اموت على الاشياء اللي فيها تمر.. واقدر اقول انه فاكهتي المفضله (( العرج دساس هههه))عجبتني طريقتج وايد وايد .. بس ولا عليج امر شنو الزبده الخضاريه؟؟ لاني مره سمعت عنها بس ماعرف شنو هذي بالضبط؟

  7. Corpse Bride كتب:

    مشكوووووووووووووووووووووووره..حمدلله على سلامتج واجر وعافيه..بس ما راح تكون متماسكه صح..يعني مو جنها عصيده لاا.. يعني كل حاجه مستقله بذاتها.. ما ادري شلون اوصف بس اعتقد ان هذي طريقتها..بجربها لي رديت من الدوام.. قبل المباراه .. عشان نستمتع فيهااا..وتسلمين والله يعينج على طللباتي..ترى ابطينيه واحب الاكل..:)

  8. Manal كتب:

    اي والله ضفتي العرج دساس:)الزبدة الخضارية هي عبارة شكلها شكل الزبدةوطعمها قريب وايد من الزبدة لكنها منتج من زيت الزيتون او عباد الشمس والذي يساهم في تقليل الكوليسترولوعادة ما تكون هذه الزبدة مدعمة باوميغا 6 المهمة للمخ وبعض الفيتاميناتان شاء الله تلقينها عندكم بالجمعية:)تحياتي حبيبتي

  9. bent el deera كتب:

    Corpse Bride ************العفو ولو والله يعافيج حبيبتي.. وايي تطلع مفلفله وكل فلفوله بروح ههه وانتي ضيفي طحين حسب رغبتج عشان تطلع بالكشل اللي تبينه … بس انا ماعرف اضبطها عدل عشان جذي متكلته.. ويعله عوافي على قلوبكم وعليج بالف وستميه عافيهومثل ما قلت لج لايردج الا كي بوردج وانا تحت امرج والله يعينا على حرق الاعصاب بالمباراة :> Manal *******مشكوووره حبيبتي على الاجابه… ووايد عجبتني هالزبده المفيده لاني احب هالسوالف … ماعتقد احصلها بجمعيتنا .. بجرب مركز سلطان باجر

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s