احب هالوصفه… ولذيذه بطريقه تخليكم تغوصون فيها… بكتب اسهل طريقه وعاده اسويها باكثر من طريقه… اذا سويت الطرق الثانيه رح اذكرها
هني نسيت اسلق الفقع مع اللحم فطبخته مع العيش واكتشفت طعمه صار احلى… تقدرون تحمسونه وتخلونه مثل الحشو وهم هالطريقه حلوة وان شاء الله انزل صورتها اذا سويتها .. وهذي صوره ثانيه للوصفه
نحتاج الى
المقادير:
فقع منظف ومغسول
لحم غنم
طماط مخلوط بالخلاط
بصل مكعبات
زيت
مكعب ماجي لحم حسب الرغبه
بهارات كامله ( هيل ودارسين وكزبره وعرج الهيل وفلفل اسود ومسمار و زنجبيل ناشف وبهار حب وحبه حلوه)
بهارات ناعمه ( بهار حشو (( اخذوه من سمراء عدن يهبل)) و هيل ناعم و بزار ولومي و دارسين )
عيش مغسول ومنقع بماي دافي وملح
الطريقة:
نسلق اللحم مع هيل و دارسين وحبه حلوه و شيبه اذا عندكم لمده 10 دقايق وبعدين نقط الماي
نحمس البصل بالزيت ونضيف له اللحم والبزار والبهار واللومي والبهارات الكامله بعد نفتحها شوي عشان تطلع نكهتها اكثر
نحمسهم زين وبعدين نضيف الطماط ونخلطه لين يثقل شوي
نضيف الماي الساخن ونتركه لين يستوي..حطوه بجدر الضغط اذا كنتو مستعيلين
نشيل اللحم ونرش عليه بهار وهيل ناعم ودارسين ولومي
ناخذ الماي الصافي ونزيد ملحه ونضيف ماجي اذا حبيتو ( انا ماحب اضيفه ) ونسلق الفقع فيه 5 دقايق تقريبا ونحط فوقه العيش ونخلييهم ينضجون سوا
نخفف النار بعد ما يشرب العيش المروق ونلف الجدر بقصدير ونخليه على نار واطيه لين يترسا
بالتقديم ننجب العيش مع الفقع ونصف اللحم فوقه وبالعافيه
My Kitchen 
حسيت الوصفة صج مالت غوص :)تسلم ايدج
ذبحتينيمن وين اييب فقع الحين وانا بانجلترا:)بالعافية وتسلم الايادي
شكله لذييييذيمي يمي
Fashionista ************الله يسلمج حبيبتي وحياج اللهانا عن نفسي اكلتها بيوم الاوف لاني ادري بخبص برجيمي لوول 😛
Manal *******ما طلبتي شي .. دزيلي عنوانج وما يصير خاطرج الا طيب يالغاليه :>الله يعافيج من كل شر وحياج الله غلاتي
غير معرف ********شكرا :>حياكم الله ولا تقاطعون