مجبوس دجاج بالشبنت



هالطبق اول مره اكلته بلبنان من 6 سنين .. طباخه خالي كانت مسويته على لحم ودازين لنا نقصه … اول ما شفته كنت معتقده انه عيش شبنت عادي ولما ذقته حسيت بالفرق وعجبني وايد وعلى مر 4 سنين كنت كل مره اسالها عن الطريقه تعطيني وصفه غير لين الحمدالله قدرت اكمل الكلمات المتقاطعه وطحت على الوصفه الاصليه لوووول.. عمليه قلي الادام مع البطاط حسب الرغبه انا افضل احمرها بالفرن عشان تكون اخف
هالوصفه حلوه ولذيذه .. الديكوريشن من ايد اختي الصغيره موتتني من الضحك شلون مجتفه ريول الديايه وصافه الثوم مع الغارنش ههههه.. ما حبيت اكسر بخاطرها وصورتها بلمساتها
المقادير:
دياي او لحم
طماطه كامله مقصوصه على شكل + لي نصها بس
بصل نفس الشي
بصل مفروم
بهارات السلق ( دارسين وفلفل اسود عدل و هيل عدل ومسمار و ورق غار ومستكه اذا حبيتو تضيفون لها )
زنجبيل
ثوم عدل
نعناع مفروم قفشتين او ثلاث ( المهم الكميه تكون تقريبا ثمن مقدار الشبنت او ربع مقدار الكزبره)
كزبره مفرومه
شبنت بمقدار ضعف الكزبره
فلفل اخضر مفروم صغار
فلفل حار اذا حبيتو
لومي اسود عدل
عيش مغسول ومنقطع
بهار حشو ( سمراء عدن )
بزار
هيل ناعم
بطاط حلقات سميكه
ملح
ماي ساخن
مكعب خلاصه الدياي ( ماجي )
زيت او سمنه حسب الرغبه
الطريقة:
ننظف الديايه ونسلقها مع الطماطه والبصل وبهارات السلق ومكعب الماجي والملح.. بنص النضج نضيف اللومي بعد ما نقضه و نضيف حلقات البطاط
عند سوا الدياي نشخل المرقه .. بيكون البطاط متماسك نقليه بعد ما نرشه بالبهار واللومي الناعم والهيل واذا حبيتو تقلون الدياي بعد او تدخلونها الفرن
نحمس البصل ونضيف له الثوم العدل والبزار والزنجبيل المدقوق والفلفل الاخضر و الخضار الورقيه (( في هالوصفه استخدمت شوي طازج وشوي مجفف )) ونحمسهم لين يتغير لونهم
نضيف مرق الدياي بعد ما نتاكد من ملحه وعند الغليان نضيف الرز وبعد ما يشرب مروقه نتركه على نا ر هاديه لين يترسى مع رش ويه العيش بهيل ناعم
وبالعافيه

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s