اطباق رئيسية · اطباق رئيسية -اسماك وماكولات بحريه · اطباق رئيسية- اطباق الارز او العيش

مقلوبه الجنعد اللي صارت مفروشه هههه….


اليوم كان عندنا زواره وتعبت بالسفره .. فطوفو شكل التصوير لاني كنت مسويه كذا طبق ( سلطه شمندر وسلطه خضرا ومعجنات بيتزا وكيري وبطاطا حره وميد مشوي وريش بالفرن و فريكه دياي ومقلوبه جنعد وحلو) فكنت يادوب القط صوره مني ومناك ولا افكر لا بزاويه ولا شكل

المهم
نيي حق سالفه المقلوبه >> الله يعينكم على القرقه

نسيت الجدر وانا اسوي الفروت سلط .. عاد الخضره اللي المفروض تنزل مع السمج صارت حكوكه
فرشت العيش بالصينيه وخلطتها ببقايه الخضار الغير متضرره من عمليه الحكوكهيشن >> ماعرفت شسمي العمليه

اختي الصغيره ما قصرت نمقت وديكورت الطبق على نمط مادري شلون قايل

الحين بسم الله

المقادير:
سمج جنعد انا استخدمت 4 شرايح كبيره
عيش
بصله كبيره مكعبات كبيره
حبه ونص فلفل اخضر مكعبات كبيره
خمطتين شبنت مفروم
3 فصوص ثوم شرايح
3 طماطات وسط مكعبات كبيره
3 قفاش صغيره ( مالت الشاي مال اول) بهار سمج
نص قفشه صغيره كمون
قفشتين صغار كزبره بودر
وقفشه وسط لومي مطحون
ملح
ثوم وزنجبيل مفرومين وبهار سمج وملح لتتبيل السمج
سمنه للطبخ ( انا استخدمت سمنه نباتيه كلارا)

الطريقه :

نحمس البصل لين يذبل شوي ونضيف الفلفل والطماط والثوم والبهارات واخر شي الشبنت ونخليهم على نار واطيه عشان تذبل الحمسه

نتبل السمج بعد ما نغسله عدل بالثوم والزنجبيل وبهار السمج وبعدين نلته بالطحين ونقليه ربع قلي ونصفه فوق حمسه الخضار ونرشه بملح
نضيف العيش فوقهم ونضيف ماي يادوب نغطي العيش ونخليه على النار لين ينشف وبعدين نغطيه بقصدير ونخليه على نار واطيه لين يترسى العيش

وحزه النجاب قلبوه وقدموه واذا صارت نفس حالتي فرشوه وزينوه على بو طبق يديد لووول
وبالعافيه

Advertisements

2 thoughts on “مقلوبه الجنعد اللي صارت مفروشه هههه….

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s