توني انتبهت ان صارلي لي سنه من بطلت هالبلوق… كل عام وانا وانتو بخير… وسعيده جدا اني من خلالها تعرفت على ناس ذهب حدي سعيده بمعرفتهم :>… اقولكم لكم كلكم شكرا كبييييييييييييييييييييييييييييييييييييرهالتشيز كيك كنت ناويه انزلها بعد ما انزل جم وصفات قديمه حاطتهم على الهولد … بس بهالمناسبه بنزلها والباجي بنزلهم تباعا :>
هالتشيز كيك ماخذته من موقع كرافت .. وطلع تشيزي مثل ما يحبه اخوي ومن كثر ما عجبته طلب اني اسويها مره ثانيه حق الديوانيه … بالنسبه لي حسيتها ثقيله والناس اذواق :> ..وحسيت انها محتاجه كريما تخفف ثقل الجبن لقيت وصفه نفسها بنفس موقعهم بالضبط بس كميه الاوريو في البيس مع الزبده زياده و فيها ساوركريم بهاللينك… الصراحه ما ذقتها راحت سيده ديوانيه اخوي وعليهم بالعافيه… انا بذكر الطريقه الثانيه بس بحجم الاولى لان صينيتي وسط :>
المقادير:
-كوب اوريو مطحون ( اهم كاتبين 30 حبه )
– 2 م ك زبده ذايبه ( اهم كاتبين ربع كوب)
-3 حجم عائلي جبن فيلادلفيا ( 300 غ ) او 4 من حجم 8 اونص
-كوب سكر
-4 بيضات
– كوب كريمه حامضه
-1 م ص فانيلا
-20 حبه اوريو ارباع.. تقدرون تستخدمون بداله الميني
الطريقه:
نسخن الفرن على درجه حراره 170 … وانا اسوي خطوه احتياطيه تعلمتها من مارثا ستيورات اغطي القالب بقصدير عشان لا تطلع الحشوه برا من القاعده
ناخذ الاوريو ونضيف له الزبده ونحطه بالقاع ونضغطه بقاع قلاص عشان يثبت وانا ارده الثلاجه عشان تجمد الزبده بالاوريو
نخلط الجبن مع الكريما
نضيف باجي المقادير ونخلطها لين تتمازج عدل ( السكر والفانيلا والبيض )
نضيف الاوريو ونخلط بالقفشه او السباتشولا عشان لا يتفتت الاوريو
نحطه بالقالب وندخله الفرن من ساعه الى ساعه وربع.. السنتر مرح يكون ثابت 100% وعادي بيثبت بالثلاجه :>… بعد ما نسكر عليه نخليه يبرد قبل لا ندخله الثلاجه.. انا اخليها بالفرن بس ابطل الباب واخليها ساعه ونص تقريبا
ندخلها الثلاجه تبرد يوم كامل قبل التقديم .. زينوها حسب الرغبه وبالف عافيه
My Kitchen 
كل عام وإنتي ومدونتج بألف خير وصحة وسلاموعسى يا رب يرزقك سنين من التدوين الممتع واكتساب المزيد من الأصدقاء الرائعين الذين يضيفون إلى حياتك جمالا فوق جمالك وجمال روحك :))احنا اللي تشرفنا فيج واكتسبنا معرفتج :))واستفدنا ولا زلنا نستفيد من كرمك ومشاركتك لنا بالوصفات الرائعة :))الأوريو عذااااااااااب :))عندي هالوصفة بس بجرب التغييرات والإضافات اللي حاطتها حق اليهال بشهر رمضان إن شاءالله 🙂 تسلمين يا بنت الديرة ويعطيج ألف عافية على مجهودك 🙂
كل سنة وانتي طيبة .. وعقبال 100 سنةوإلى المزيد الأطباق الشهية و الأكلات اللذيذة بالتوفيق
كل سنة وانتي ومدونتج بخير ياربعسى نحتفل فيه دايما معاج كل سنةمتشرفين بوجودج معانا طباختنا المحترررفةومشكووورة وايد على الوصفات الحلوة اللي اتحطينها…نتعلم منجججججججججج 🙂
أنا بصراحة ويني عنج من زمان صج مو وايد مع الطبخ لكن المجهود الصراحة اللي قاعدة تبذلينة جبار …أسمحيلي أن أرفع قبعتي تقديرا لك "إن جاز التعبير"عسى الله يعطيج الصحة و العافية مدونتج بصراحة ملاذ المحتاسين و عقال سنوات و سنوات قادمة علشان نستفيد منج …بصراحة حبيتج أنتي و مدونتجمن أول نظرة ؛)…~*God Bless You*~
Yin مدام ********حياتي انتي :**صراحه احرجتيني مادري شردمشكووووره مشكووووره وايد
بوسند *****مشكور اخوي ما قصرت :>
نون النساء**********مشكوره حبيبتيوصدقيني اني اتعلم منكم اكثر حياج الله :>
خاتون******انربط لسانيسعيده جدا بكلامج الحلو والدعوه الاحلىماقصرتي ولج مثلها يا رب :>