شيخ المحشي او براويه اخرى كوسا بلبن او المخشي …


هالوصفه من الوصفات المشهوره جدا…
بكل مكان لها اسم بفلسطين اسمها المخشي بضم الميم…و بسوريا يسمونها شيخ المحشي وبلبنان كوسا بلبن…
الاختلافات بين الوصفات جدا جدا بسيطه
بالوصفه الاصليه تقلى الكوسا قبل او بعد ما تحطين الحشوه …انا لغيت هالحركه عشان تكون اخف وضفت شويه اضافات زياده
صديقات الرجيم … هالوصفه مناسبه جدا لان ما فيها دهن زايد … تقدرون عند تقوير الكوسا تخلون اطراف الكوسا اسمك عشان ما تاخذ حشوه اكثر وحصه الكوسا تكون اكثر هههه
تقدرون تبدولون اللحم بلحم البقر وتخلون الروب كامل الدسم بس قللو كميه النشا

انا غسلت اللحم المفروم عشان اخفف الدسم وتقدرون تلغون هالحركه

المقادير:

-25 كبه كوسا محفوره

-تقريبا نص كيلو لحم مفروم ويفضل غنم

-صنوبر ولاني احبه حطيت خمطتين

نص شده بقدونس مفروم

-نص بصله صغيره مفرومه

-قفشه كبيره تقريبا زيت او سمن

-5 روب قليل الدسم

-2 ونص قفشه كبيره نشا

-2 مكعب ماجي قليل الملح او ماي سلق دياي او اللحم

-2-3 كوب ماي

-اعشاب مجففه ( استخدمت ماركه اسناد اسمها اعشاب المحشيات )

-2 فص ثوم مقطع شرايح

-نعناع مجفف

-بهار

-رشه دارسين

-ملح

الطريقة:
نقور الكوسا وغسلها بماي مملح ونقلبها على ويها بالمشخل عشان تنزل الماي .. راس الكوسا اللي تقطعونه غسلوه وقشروه عشان نسكر فيه الكوسايات بعدين

نحمر الصنبور بالزيت ونشيله

نحمس البصل ونضيف له اللحم والدارسين والبهار لين يقارب على النضج ونضيف له الصنوبر والبقدونس ونخليه يبرد شوي

نغلي الماي مع مكعب الماجي او ماي سلق اللحم او الدياي مع شرايح الثوم

نحشي الكوسا باللحم المفروم ونسكرها براس الكوسا ونضيفها للمرق المغلي ونتركهم ربع ساعه او ثلث ساعه

نسخن الروب مع النشا ونضيف له ماي السلق بالتدريج لين يثقل ويوصل لي الكثافه اللي نبيها
نضيف الكوسا على خليط الروب مع النعناع ونتركها على نار واطيه لين تكمل باجي نضجها وبالعافيه

ملاحظه: اذا تحبونها مثومه تقدرون تحمرون ثوم بالزيت وتطشونه على ويه الجدر مع اضافه الكوسا للروب

15 thoughts on “شيخ المحشي او براويه اخرى كوسا بلبن او المخشي …

  1. يقول خاتون:

    يسلمو الأيادي … طبخة سهلة و قابلة للتطبق …و الحريم بالزوارة أمس يسلمون عليج و يقولون قواج الله بيرمضون على مدونتج الظاهر هههههعاد انا أحب الأكل الشامي كتير🙂

  2. يقول خاتون:

    عزيزتي بنت الديرة …بغيت أسألج جم سؤال و لا عليج أمر توصيني بالتسوق بأي جمعية …ووين أقدر ألاقي جبن بارمزان فرش (موجود بوصفات قديمة لج)و آسفة على الإزعاج:)و ياليت تنزلين بوست تعلمين العليميات مثلي شلون يتسوقون و أسرار التسوق و شكرا🙂

  3. يقول bent el deera:

    خاتون******الله يسلمج حبيبتي وسلمي لي على الكل وقوليلهم حياكم الله المدونه مدونتكم والعين اوسع من المكان :>بالنسبه للاكل الشامي انا بعد يعجبني وايد وتلقين وايد وصفات اسويها لاني تقريبا ربيت عليها :>اذا تبين موقع متخصص اكثر عندجl2ma.comاكلاتها حلبيه ودمشقيه روعه وصاحبته وايد حبابه :>بالنسبه للتسوق… تبين الصج ماكو اسرار انا كل مكان اروحاسوي لسته اسبوعيه عن الطبخات اللي بسويها واروح اشتري المقاضي من اي جمعيه.. واذا كان شي ناقص اروح مركز سلطان لانه يم دوامي:>ولا تشترين شي انتي ما تدرين شبتسوين فيه او لمجرد انج تتوقيعن انج بتسوين شي اخذي شي وانتي متاكده انج بتستخدمينه او على الاقل اكو وصفه ببالج عنه.. انا كنت شكثر اشتري سوالف مالها معنىشي يذكرني بمادري شنو كنت اكله باي هوب وشي يذكرني بمادري شنو شربته بالسوليدير واخر شي يتكودون الاغراض عندي واتوهق فيهم ههههبالنسبه للجبن البارميزان تحصلينه بجمعيه مشرف صوب الاجبان اللي بالكيلو او بمركز سلطان واتوقع تحصلينه بكارفور وجيان وسيتي سينتر.. حاولي تاخذين القالب لان طعمه احلى واقوى من المبشور بالعلبوترا ما فيها ازعاج حياج الله انتي واسئلتج باي وقت :>

  4. يقول خاتون:

    تسلمين حبيبتي على المعلومات و عساها بميزان اعمالج وايد تنقذين ناس و أقولها من صج حسب اللي أشوفه وايد أستفادوا منج🙂

  5. يقول Ļa ƒéммé:

    تسلمين اختي على الطريقه بس عندي سؤال اذا سكرنا الكوسا براس الكوسا ما تتبطل لما انحطها بالماي وكل الشكر لج

  6. يقول bent el deera:

    انتي اذا سكرتيها براس الكوسا مرح تطلع الحشوه لا تحاتين :>وحياج الله دوم :>

  7. يقول Anonymous:

    متابعه مشكوره علي الوصفه الحلوه أنا غسلت الكوسا بملح كثير وصفيتهعادي ؟؟ وحبيت أسال بعد ….أيش سبب غسل الكوسا بالملح ؟؟.

  8. يقول bent el deera:

    اشكر متابعتج وحياج الله دوم :>اي عادي ما في مشكله …اعتقد الهدف من غسل الكوسا بالملح تطريه اللب و تمليح الكوسا انا كنت اشوف امي الله يرحمها ويدتي يغسلونها بهالطريقه ومشيت عليها وما فكرت اسال شنو هذفها الا لما سالتيني ههههه

  9. يقول Anonymous:

    توني أفهم السببطبخنا صالونه وكانت الكوسه مره ففهمت من المويه والملح أنه يشيل المراره زي مانسوي مصقعه فيه الباذنجان لانه فيه حركتين ياينقع الباذنجان ياتزال الأجزاء البنيه بواسطه سكين فالكوسا قضيتها صعبه لانها مقورهكوكيز = متابعه

  10. يقول bent el deera:

    كوكيز******لا حبيبتي الكوسا تصير مره لمن تكون قديمه مالها شغل بالملح ونفس الشي ينطبق على الفليفله :>ومشكوره على هالمعلومه بالنسبه للباذنجان :>

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s