فطور رمضان و ريوق و سفرات كاملة · مشروم او الفطر او عش الغراب · وصفات رمضانيه · المقبلات والاطباق الجانبيه · السلطات · اطباق رئيسية · اطباق رئيسية- اطباق الارز او العيش · رمضان

فطورنا باليوم الثاني بالشهر الفضيل …


ما شاء الله السفره امس متروسه.. بعد عمري مرت اخوي يابت لنا نقصه كراعين وعيش لوبه وبيتزا توست وورق عنب وهريس ومقالي تسلم اياديهم.. اذا عجبكم شي منهم قولولي واسالها عن الوصفه بالضبط :>

حلو ثاني يوم نفس حلو اول يوم عشان جذي ما صورته


**المقبلات:


-شوربه مشروم

وايد سهله.. اقطع المشروم صغار واحمسه بزبده لين يطرا اضيف له شوي بهارات ايطاليه وجوزالطيب واضيف لهم كيسين شوربه مشورم مذوبه بماي بارد واحركها لين تغلي وتوصل لي الكثافه المطلوبه


-سلطه خضار

سلطه عاديه ( خس وخيار وجزر وبقدونس وطماط .. الدريسنغ عصير ليمون وزيت زيتون وملح )

– سلطه روب وخيار بالنعناع او رايتا


احس الفرق بين الرايتا والروب بخيار الكمون بس… عباره عن روب وثوم وخيار منزوعه بذوره ونعناع طري وكمون وملح )

-سمبوسه جبن وزيتون ولحم بالخضار


-كبه بطاط محشيه جبن ابيض وافخاذ الدياي الكذابه وخبز عروق



-بيتزا توست


– ورق عنب بالزيت

**الاطباق الرئيسيه:


-نوعين تشريبه كراعين ولوبه وتشريبه من غير لوبه


-عيش لوبه


يعتبر من فخر الاطباق الحساويه هههه …عباره عن عيش مجبوس بماي السلق مضاف له طماط ومعجون.. واذا بيقدمونه للنفسا يضيفون معاه حلبه وحبه بركه

-هريسه (( ملكه السفره))


ابوي فديته معاه سكر فما نسطعها بالذوبه( الزبده او السمنه المذوبه مع مادري شنو ويحطون لها مادري اي بهار هههه ) ونخلي اللي يبي يضيف بالمقدار اللي يحبه

-كبه بلبن
وصفه الكبه وطريقه كبه بلبن موجوده بالبلوق… بهذي انا استخدمت كبه شاريتها جاهزه من وحده لبنانيه يعني مو شغل ايدي وتقدرون تستخدمون ماركه امريكانا او خزان لاني مجربتهم وما يفتلون بالروب
انا استخدمت اخر وصفه نزلتها عن كبه بلبن بس ضفت زياده مكعب ماجي بقر بالخلاط

-مرق دياي بالخضار

خواتي يحبونها خاثره واذا تحبونها خفيفه للتشريب قللو مقدار الطماط المهروس والمعجون

المقادير:
دياي مقصص لي 6 او 4 منزوع عنه الجلد
خضار بالكميه اللي تحبونها ( بطاط ، جزر، كوسا، قرع )
بصل مفروم
ثوم مهروس
زنجبيل مهروس
طماط مهروس
معجون طماط
بزار
بهار
لومي عدل وناعم
فلفل اسود ناعم
كزبره بودر
حبه فلفل حار

الطريقه: نحمس البصل مع الثوم والزنجبيل ونضيف له الدياي ونقلبه من كل اتجاه لين يقلب لونه وبعدين نضيف البهارات والمعجون ونخلطه شوي وبعدين نضيف الخضار ونحمسه معاهم لين تطلع ريحه البهارات .. نضيف الطماط ونتركه يغلي غلوتين وبعدين نضيف الماي والملح واللومي العدل ونتركه لين ينضج وبالف عافيه

-برياني دياي


اهي المفروض برياني والعيش مخلوط بس لان فطومه كانت تبي حكوكه بطاط سويتها بهالطريقه

وصفه البرياني ماخذتها من كتاب “جنجر” والبرياني فيه وايد سهل وخواتي يحبونه



المقادير:
ديايه مقطعه على 8 اجزاء
علبه روب
نص شده كزبره خضرا
قفشتين كبار ثوم
قفشتين كبار زنجبيل
قفشه كبيره حبوب كمون
قفشه صغيره كركم
حبه فلفل اخضر حار او نص بارد
ملح
حبه ماجي
جيلتين عيش مغسول ومنقع
بهارت عدله للسلق ( دارسين وهيل ومسمار وبهار النجمه او اي شي ثاني تحبونه )
قفشه صغيره زعفران منقع بحليب حار
بصل مقلي حسب الرغبه
شرايح طماط
شرايح بطاط نص مقلي
اذا تحبون كازو مقلي وبقدونس مفروم للزينه

الطريقة:
نسلق العيش مع البهارات والملح نص نضج
نخلط الروب والكزبره والثوم والزنجبيل والكمون والكركم والملح والفلفل بالخلاط ونترك الدياي يتبل فيه فتره كافيه ( ساعه او اكثر ) .. وبعدين نخليه لي النار ونضيف له مكعب ماجي ونتركه لي ينشف ويتبقى صلصه ثقيله

نحط شويه زين بقاع الجدر ونصف البطاط والعيش وهو على النار عشان يتكون اساس الحكوكه
نضيف نص مقدار العيش ونضيف له شوي زعفران وبعدين الدياي وفوقه جزء من البصل المحمر وبعدين باجي العيش وجزء من البصل المحمر ونشيل الباجي للزينه ونصف شرايح الطماط ونضيف باجي الزعفران ونسكر الجدر بقصدير ونتركه على نار هاديه لين يكمل نضجه وبالف عافيه… بعد ما تخلطونه ترشونه بباجي البصل المحمر والبقدونس والكازو

هذي صوره قديمه لشكل البرياني بعد الخلط من غير الغارنش :>


Advertisements

24 thoughts on “فطورنا باليوم الثاني بالشهر الفضيل …

  1. بنت الديرة شلونج مبارك عليج الشهر وعسااج من عواده امس مريت المدونة الا حاطة بس صورتين قلت شفيها خربت ليما شفت التحديث اليوم اشوة عسى ربي يباركلج في هالشهر الكريم انتي واسرتج الكريمة بصحة وعافية عمل صالح آمين يارب

  2. سيحتي سعابيلي بنت الديرة ..بعدنا مافطرنا 😦 سفره عامره ان شاءالله ماشاءالله كل طبق أحلـى وألذ من الثانـي بالعافيـاااا 🙂

  3. عليكم بالعافيه ..بس بيتزا التوست شلونطريقتها لو سمحتي :)و شنو احسن صوص بيتزا جاهز العلالي زين؟

  4. maha *****هلا وغلا بالغاليهوعلينا وعليج يتبارك وعذريني تاخرت عليج بالتهنئهومشكووووور مشكووووره على هالدعوه الحلوه ولج مثلها يارببالنسبه للصور ورا الفطور الوقت يركض لا اله الا الله وما كان عندي وقت انزلهم كلهم مره وحده واكتب واسنع :>

  5. ام حسون سمبوسه*************هلا باختي الغاليه يا بعد جبدي ولهت على هالدعوه اللي محد يقولها غيرج :***ويييييين اللي بتكتب شنو فطورهم؟؟؟؟؟!!!! :@

  6. Sn3a*****حبيبتي تسلمين وعليكم انتو بالعافيه بد وتقبل الله اعمالكم :>ووناسه استانس لما اشوف سفر الفطور متشابهه ههههه

  7. The.One********الله يعافيج عزيزتي الغاليهواستانست ان السفره عجبتج…:>حياج الله دوم :>

  8. غير معرف*******هلا وسهلابالنسبه للصلصه الجاهزه احب ماركه بريغو والعلالي.. بس انا اضيف لهم بهارات ايطاليه وشوي كتشب او شكر عشان يعادل حموضه الطماط :>وبالنسبه لطريقه بيتزا التوست بطريقتياصف التوست واصب فوقه شوي كريما وجبن كرافت مبشور وبعدين احط طبقه توست ثانيه وارش عليها كريما عشان لا ينشف التوست وفوقهم صلصه البيتزا والخضار ونوعين جبن ( تشيدر وموتزريلا )البيتزا اللي بالصوره اسال وارد لكم الخر بس اعتقد عن توست ممسوح عليه مايونيز ومحشي جبن سلايس وعلى الويه ممسوح بالكتشب ومضاف له زيتون وجبن :>

  9. اهلا أختي ماشاء الله تبارك الله مدونة حلوة وتفتح النفس ..أعجبني اطار المدونة والقالب كله حلو ورايق …والطبخات مريت عليها على السريع وكل شيء فيها حلو .أختي انا عندي مدونه نفس تخصصك طبخات واشياء ثانية, بس ابي احد أشاوره واحد يعطيني رايه ويعلمني لان انا مافهمت البلوق مرة زين , لو عندك وقت وفاضيه ليت تساعديني.

  10. Najla ******من عيوني .. حطي اسئلتج عندي بالايميل ومايصير خاطرج الا طيبونورتي بزيارتج الاولى عندي بالمدونه :>

  11. يمال العافيه والله عساكم عالقوووهاعجبني البيتزا بالتوست كنت بسأل عن طريقته بس قريت ردك ..وان شاء الله راح اسويه ..الله يجزاك خييييييير يابنت الديره ..

  12. ندووي******الله يعافيج ويكافيج من كل شر يا سكره :>وان شاء الله تجربينها وتعجبج :>

  13. تسلم اييدج و مااااقصرتي على هالطبخاات الروووعهادري دااشه بالقديم حيــل بس لأني كنت بدور طريقة خبز العروق قلتي موجوده برمضان العام بس هم مو حاطه الطريقه عفيه كتبيلي الطريقه لان شكله نفس خبز عرووق يدتي الله يرحمهاا نفس اللون الغااامج و حدييييي احلم فيـــــــه نااطرتج 🙂

  14. تسلم اييدج و مااااقصرتي على هالطبخاات الروووعهوعيــدج مبارك مقدما 🙂 ادري دااشه بالقديم حيــل بس لأني كنت بدور طريقة خبز العروق قلتي موجوده برمضان العام بس هم مو حاطه الطريقه عفيه كتبيلي الطريقه لان شكله نفس خبز عرووق يدتي الله يرحمهاا نفس اللون الغااامج و حدييييي احلم فيـــــــه نااطرتج 🙂

  15. تسلم اييدج و مااااقصرتي على هالطبخاات الروووعهوعيــدج مبارك مقدما 🙂 ادري دااشه بالقديم حيــل بس لأني كنت بدور طريقة خبز العروق قلتي موجوده برمضان العام بس هم مو حاطه الطريقه عفيه كتبيلي الطريقه لان شكله نفس خبز عرووق يدتي الله يرحمهاا نفس اللون الغااامج و حدييييي احلم فيـــــــه نااطرتج 🙂

  16. أيامج سعيده حبيبتي ومشكوووووره على هالحجي الحلو أنا نزلت موضوع يديد في وصفه خبز عروق … وتلقين هم وصفه بموضوع تجهيز رمضان 🙂 إذا تبينه يصير غامج كثري الخضار الورقيه لأنها أهي تعطيه اللون 🙂 وإذا ما تحبين البطاط شيليه أنا احطه غسان يقرمش بس وان شاء الله تكون الوصفه على ذوقج وبشريني بالنتائج وعسا الله يرحم يدتج والمومنين والمؤمنات 🙂

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s