basic 101 · burgers · السندويشات · اطباق رئيسية · اطباق رئيسية- لحوم · خطوة بخطوة

هوم ميد تشيزبرغر ..حياكم

 البرجر من الوجبات المفضله جدا جدا عندي ..حبيت اطبقها عندي في البيت  لان اغلب المجمد فيه نسبه من بروتين الصويا اللي يخلي طعم البرغر مطاطي..قريت وايد وصفات بدءا من النوع الكلاسيكي ونهايه بافضل وصفه برغر مكتوبه…سمحولي اطول بالمقدمه لان في اشياء حابه اشرحها قبل لا ابدي بالوصفه
اغلب الوصفات تتفق على شيين
 1- اللحم يجب ان يحتوي على نسبه دهن .. افضلها 80:20 .. وكثير من الوصفات تنصح بمزج اكثر من قطعيه لحم  (( سيرليون ، بريسكت ، ريب اي …الخ)) عشان النكهه وعشان تحقق نسبه الدسامه .. وتقدرون تخلطون اكثر من نوع تيركي ولحم ..غنم وبقر ..دياي وتيركي ..لحم وهوت دوغ وهلم جرا
2-من الافضل انكم تشوون برغر طازج يعني اللحم من اللحام الى الشوايه
3- هذي بطريقه الشواي نفسه المفروض متى ما حطيتو اللحم على الشوايه تخلونه ياخذ راحته وما تقلبونه الا مره وحده وما تضغطون عليه عشان  يحتفظ بعصارته ويكون جوسي
4- الملح ما ينضاف الا بالاخير
5-انا استخدمت جهاز عشان يشكل لي اياهم بالطريقه المعتاده (( الجهاز متوفر  بمركز سلطان وسعره ما يتعدا الدينار ونص )) اذا كنتو بتشكلونه بيدكم ضغطو بابهامكم بنص البرجر عشان  يحتفظ بشكله وما يصغر حجمه بالشوي

هذي صوره الجهاز اللي قلتلكم عنه

الحين ملاحظاتي الخاصه لهالوصفه … في البدايه استخدمت هالوصفه بعنوان BEST BURGER EVER   وتوقعتها احلى بوايد… فزدت عليها ونقصت لما صارت جذي وخواتي وايد حبوها … البيض بالوصفه ما يفرق بالطعم كلش بس يساعد البرجر على الاحتفاظ بشكلها على الشوايه… الفلفل والشوفان مرح تحسون بطعمهم بس من غيرهم اللحم بسرعه يتفتت.. بالنسبه الى اللحم حطيت نوعين ريب اي و سيرليون بنسبه 2:1
واذا عندكم وصفات ثانيه حق البرغر  مجربينها وحابين تجربونها ومتخوفين منها عطوني اياها حق الويكند الياي ونسوي مسابقة  حق احلى وصفه برغر ..شرايكم ؟ :>

الحين نبتدي بالمقادير :
750 غرام لحم مفروم مرتين ناعم ( نص كيلو سيرليون وربع ريب اي )
ربع كوب + قفشه كبيره شوفان ( اذا ما حبيتو الشوفان تقدرون تستخدمون بقسماط )
بيضه
2 قفاش كبيره  صلصله وسترشاير ( واذا تحبون نكهتها اكثر حطو حسب رغبتكم )
قفشه صغيره ليكويد سموك ( موضروريه اذا مو متوفره عندكم )
قفشه صغيره صلصه فلفل او شطه  ( مو تباسكو عشان لا تصير حاره )
قفشه صغيره فلفل اسود
كيس شوربه بصل واستخدمت ماركه ليبتون
ربع قفشه صغيره بهار ستيك
ربع قفشه ثوم بودر
ملح حسب الرغبه
جبن تشيدر
صمون همبورجر
خس مبشور
طماط حلقات
مايوتشيب
واذا تحبون مخلل او بصل او اي اضافه تحبونها
الطريقه:
نخلط اللحم مع البهارات وجيس الشوربه ونوعين الصلصه والشوفان والبيض ونعجنهم عدل ونقسمهم حسب الرغبه بالسمك اللي تحبونه
انا طلع معاي 8 قطع

وشكلتهم بالطريقه  المعروفه ورشيت على الجهتين ملح

شويتهم على نار حاره في البدايه وبعدين  متوسطه ونطرت 3 دقايق تقريبا قبل لا اقلبها على الويه الثاني
وبعد ما يستوي الويه الثاني تقريبا احط الجبن عشان يذوب ( انا استخدمت المايلد تشيدر باول مره وثاني مره شارب وكلهم حلوين )
نحمص الساندويش ونمسح عليها المايوتشيب والخس والطماط وونحط البرجر مع الجبنه الذايبه يم يم وبالف عافيه
انا قدمتها مع كولسلو وبالف عافيه
Advertisements

38 thoughts on “هوم ميد تشيزبرغر ..حياكم

  1. تسلم ايدجعاد انا غرامي البورجر .. امس ماكله برجر فدركرز :)اممممممممممم بس وين اللي بتمشي على الريجيم؟ @@ مو جنه بتخربين البرنامج 🙂

  2. بشكل عام ماحب البرغر البيتي ابد ..ما استسيغة .. مع انه خواتي وجبتهن المفضلة ..بس عجبتني طريقتج ..بجربها لخوااتي ..الله يعطيج العافية خيتوو …

  3. أحب البيرغر لا صارت هوم ميد و متعوب عليها و لا كليتيها تلقينها جوسي و لحمتها "شوييية" تتفرفت.وصفتج شكلها وايد لذيذة …آنا جربت مرة أسوي هامبورغر بالبيت بس ما طلعت زود بس حبيت فكرة إني أسوي الهامبرغر بالبيت … متأكدة إن اللحم بدون البيض و البقسماط يتفلل؟لأني قلت إذا إن شاء الله بسويها مرة ثانية ما راح أحط فيها الـbindig factors بس بحط لحم و وبهارات و بشوف بيتغير طعمه بدون البيض و البقسماط ولا لأ.إعجبتي فكرة المسابقة علشان الواحد يوصل لين أحسن طريقة ، لو ما آنا مسويه هالأيام رجيم :((تعالي بسئلج …لحم السيريليون و الريب آب تاخذينهم مفرومين ولا تفرمينهم عندج بالبيت؟

  4. Fishah *******عليج بالعافيه :>طلعتي نفسي :>ممم تبين الصج اول مره اكلت ساندويشه كامله .. ثاني مره احترمت نفسي واكلت بس اللحم وحطيت عليه شوي A1 (( يعني مو مخربه وايد )) :pمشكوره حبيبتي وحياج الله دوم

  5. flaanh *******في كثير ما يستسيغونه ويفضلون الجاهز لان له نكهه وطعم غير :> جربيها لخواتج وان شاء الله يحبونها :>والله يعافيج حبيبتي وحياج الله :>

  6. mellow *******يم يم وصفج خلاني ودي اروح برايم اند توست واطلب لي برغر مع كراميلايزد اونين ههههههالوصفه حلوه وعجبت خواتي .. بالنسبه لي مو هذي اللي ببالي وللحين ادور الالتميت برغر ريسبي هههههساعات الوصفه تكون اوكي بس نوع اللحم يفرق ( انجوس ، واغيو .. الخ )البرغر من غير بيض ما يحافظ على شكله المدور ويتصدع ويصير فيه شقوق غير انه تقلص حجمه ( انا جربته من غير بيض وبقسماط )اغلب الوصفات تذكر هالشيين مع وصفه البرغر .. بس شفت وصفتين من غيره اذا تحبين احطلج اللينكشوفي انا اتوقع لو كان بس لحم ودسم وبهارات بيضبط الوضع ( لانه نفس الكباب ) فكره المسابقه موجوده وزهبت جم وصفه وناطره وصفات البنات بعد :>.. وحابه اطبق فكره المسابقه على اشياء ثانيه بعد هههه (( الله يستر على رجيمي المسكين ))الستيك شريته من مركز سلطان وقلت لهم يغسلونه ويفرمونه هناك مرتين عشان يصير ناعم :>

  7. شميت رييحة مسابقة ..؟؟شو هذي المسابقة ..وكيف..؟ومتى..؟ووين..؟وليش ..؟وحق شو..؟وعشان شو..؟يله جااااوبي ههههههه

  8. flaanh*******لووووووووووووول ولا يصير خاطرج الا طيب انا ذكرت ببدايه القرقه اني ودي اسوي مسابقه حق احسن وصفه برغر ..ان شاء الله كل ويكند بجرب وصفه واعطيكم تقييمها من وجهه نظري .. وطلبت منكم اذا عندكم وصفات مجربينها وحابين تجربونها تعطوني اللينك مالها عشان اسويها :>

  9. تسلم ايدج يا بنت الديرة دايما متميزة————————–بس عندي استفسارين ما عليج امر :اولا : اللحم ————من وين يايبته ؟و هل طلبتي منه ان يفرمه في درجة معينة و لا بس فرم اللحمثانيا : الصلصات ————ابي اسماء الصلصات بالانجليزي ووين احصلهم ———————————–و ما تقصرين يالغالية 🙂

  10. واااااااااااااي شتبين تسوين فينا حرام عليج …؟؟؟ما أقدر أعبر عن مشاعري :)شو لذيذ شو طيّب

  11. حل من الحلول المقترحه أن يتم عمل محميات طبيعية لهذه الذئاب تتكاثر في حدودها و نتركهم يعيشون عيشة صلعم النبي من حيث تعدد الزوجات و الغلمان و منع الكهرباء عنهم لانه اختراع كافر و السيارات الى غير ذلك …. المهم أن نضمن عدم خروجهم من هذه المحميات لان الذئاب لا يمكن أن تعيش في المدينةhttp://geek-muslim.blogspot.com/2009/11/blog-post_7204.html

  12. om comment kuwait *******************تسلمين حبيبتي :>اللحم اخذته من مركز سلطان ستيك استرالي وطلبت منه يفرمه مرتين ناعم :>الصلصات تحصلينهم بمركز سلطان واي مكان حتى بالجمعيات بالانجليزيliquid smoke وانا اخذت هالماركهhttp://avidityfitness.net/wp-content/uploads/2008/09/liquid-smoke.jpgوالثانيهWorcestershire sauceوانا اخذت هالماركهhttp://www.slu.edu/blogs/rehan/files/2008/12/lea-perrins-worcestershire-sauce.jpgوحياج الله دوم:>

  13. يعطيج ألف ألف عافية بس ما عليج امر عندي سؤال …ليش لما شويتي شويتي على نار حارة بعدين متوسطة ؟اذا ما عليج كلافة ابي اعرف طريقة الشوي بالتفصيل الدقيق والشواية اللي تنصحين فيها وجم سعرها ووين ألقاهاويزاج الله خير 🙂

  14. غير معرف********حياج الله والله يعافيج من كل شر الشوايه بديت بحراره عاليه عشان تطلع الخطوط على البرجر مثل ما تشوفين وبعدين وطيت الحراره عشان تستوي على راحتها اذا بسويها على حراره مرتفعه بتحترق برا ومن داخل بتظل نيهبالنسبه للشوايهاذا تبينها كهربائيه انا اخذت شوايتي من محل الصانع بالاوقاف وسعرها ما يتعدا 10 دنانير وموجوده بعد بسيتي سنتر ..وبالنسبه للشوايه اللي تنحط على الغاز اخذتها من ايكيا (( وهذي انا احبها وتكون من حديد الزهر وثقيله )) وهم تحصلينها بالمبرور على اكبرللاسف ما عندي علم باحسن انواع الشوايات بس انا مرتاحه من اللي عندي :>بالنسبه للشوي اذا بتشوين دياي او لحم انصحج بان الحراره تكون عاليه وبعدين تخففينهاالسمج تكون على حراره متوسطه من البدايهالربيان على نار عاليه وما يطول عشان لا ييبساتمنى اني جاوبت على استفساراتج :>

  15. السلااام كنت بسألج عن الوصفه الي حاطتها ور ق عنب 3 كتبته هني عشان قدييم يمكن ما تشوفينه D: ممكن تحدديلي جمم مقدار دبس الرمان الي نحطه مع الحشوه ؟؟؟؟

  16. ابصراحه حبيت بلوقج اول مره اقراه مع ان زميلاتي (افيونكات) يقرونه من زمان ومتابعينج المهم ابي اعرف من وين تشترين ابهاراتج وخصوصا ابهارات الاعشاب وين القاها روزماري واكليل الجبل لانه انا مره شريتهم كانو يابسين ويقزون البلعوم كنت حاطتهم في سلطه =)واشكرج

  17. جاردينيا 2000 **************حبتج العافيه حبيبتيوانا بعد احب بلوقكم واتابعه :>بالنسبه للاعشاب المجففه تحصلينهم بالجمعيات او بدين اند دالوكا او المطاحن و اذا تبين فرش تحصينهم بشتلات بمركز سلطان ولولو ماركت :>

  18. طز بالرجالة*************يا هلالالالالالا والف مرحباااااااانورتيصج لج وحشه:>اختفائي الفتره اللي طافت من الظروف الصحيه ومن اللويا اللي كنت اعيش فيها ..وكنت مطنشه هالبلوق على حساب الثانيوان شاء الله باجر بسافر اسبوع تقريبا وراجعتلكمحياج الله حبيبتي ولا تقاطعين :>

  19. Hanan******الله يعافيج حبيبتي :>طز بالرجالة ************حبيبه قلبي ما تفقدين غالي وعيدج مبارك وعسى ايامج كلها اعياد :**ام مود*******حبيبتي ما تفقدين غالي بس حاشتني وكعه صحيه بعد ردتي من الشفر ومشكوره يا قلبي على السؤال :*

  20. مرحبا اختي

    انا جربت وصفتك هذي وطلعت شئ خيال خيال الطعم ولا اروع
    بس شئ زودته ملعقة ماسترد وترى الغيت شوربة البصل لأني مالقيتها
    وشويته بعد مامسحت عليه شوية زبده
    بس صدق الطعم كان روعه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s