سمك مقلي

السمج المقلي ماكو اسهل منه… بنزله بالتفصيل الممل بناء على طلب وصلني من الايميل…واشكرج اختي على الكلام الجميل اللي قلتيه في حقي :>

هالصوره قديمه واستخدمت زبيدي بس تقدرين تطبقينه باي نوع سمج
تنظيف السمج ما عندي له صوره بس باول طبخه سمج رح اصورها وارد انزلها بالموضوع :>

قبل لا نبتدي بالمقادير بتكلم عن طريقه تنظيف السمج:
الحين باي مكان نشتري منه السمج تقدرون تقولين لهم يبطلونها وينظفونها طبعا الفتحه بالبطن او الظهر حسب الرغبه :>
وطريقتي بالتنظيف اذا رديت البيت  اول شي اسوي امرر عليه سجين السمج مال السفط بعكس اتجاهه عشان اتاكد انه مسفطها عدل (( والشي نادر لازم اكو قشور مو مشيوله )).. تقدرون تستخدمون سجين عادي او السجين مال  السفط وشكله مثل المشط وتحصلونه بسوق السمج بالمحلات اللي برا 
الخطوة الثانيه ارد اغسلها واقص الذيل واذا اكو زعانف بمقص خاص فيهم وتحصلونه بايكيا او اي مركز سلطان او حتى بالجمعيات بلوازم العائله
وبعدين ابطلها من داخل واتاكد ان ماكو اشلاء وبظهر السجين اطلع الدم الاسود اللي بالنص… في اماكن ماقدر اوصل لها فاستخدم لها فرشاه اسنان عشان اتاكد انها نظفت كامل لان الزفره غالبا تكون من هالشي
الحين بعد ما غسلتها انقعها تقريبا ربع ساعه بملح خشن وزنجبيل مدقوق وعصير ليمون ومو الا تستخدمون ليمون فرش انا استخدم غراش ليمون الربيع … صدقوني هالخطوه بتطير كل الزفره اللي بالسمج 
واخر خطوه اختياريه واستخدمها اذا حسيت ان السمجه قديمه او انها محتاجه تنظيف زياده .. افركها بطحين او بنخاله واغسلها الغسله الاخيره واتبلها استعدادا للقلي

لا تستصعبون هالخطوات ترا سهله 



المهم 
مقادير البهارات حسب الرغبه احنا بالبيت نحبهامتبله عدل
نخلط كركم و بهارات سمج مجدي وكمون وثوم بودر وملح واخليها ربع لي ثلث ساعه واذا تحبونها تقرمش زود تقدرون تغطونها بطحين قبل القلي ( عاده اسوي هالحركه مع النويبي والجنعد بس الزبيدي احبه من غير طحين )

طريقه القلي
نقلي بزيت  حار .. يعني اذا قطيت فيه قطعه خبز تصير ذهبيه
ونخلي الزيت بحيث يغطي نص السمجه
وفي طريقه تعلمتها من امي الله يرحمها احط شوي ثوم مدقوق في المقله قبل لا احط الزيت عشان يتنكهه من الثوم

السمجه اول ما احطها بالزيت اخليها شوي وبعدين اخفف النار عشان لا تحترق ويتم لونها ذهبي وما نستعيل واحنا نقلبها عشان لا تلزق وتتفتت
ونفس الشي اذا قلبناها
واول ما نشيل السمجه نرش عليها شوي ليمون وقدموها مع خبز او سلطه او عيش محمر وبالعافيه :>

13 thoughts on “سمك مقلي

  1. يقول أبوفلان:

    ايباااااااااه تسلم ايدج ماشاء الله والله هالسمج لو ننحرم منه مانستمتع بالأكل الله يديم النعمه ويعطيج العافيه

  2. يقول flaanh:

    تصدقين بنت الديرة ..عمري مافكرت اني اسوي سمج ..مافيني ع الزفرة ..بس بصراحه كبرتي ف عيني هههههههه عقبالنا ههههه..

  3. يقول nosa:

    السمج المقلي من أسهل الطبخات وألذهابالعافية… خاطري في صافي أو جنعد مقلي

  4. يقول bent el deera:

    أبوفلان*******حياك الله اخوي :>والله يسلمك من كل شر .. وعدل كلامك السمج من الذ الاكلات وما شاء الله اطباقنا زاخره فيها :>

  5. يقول bent el deera:

    flaanh********السمج في البدايه كان يعذبني بالتنظيف بس يمكن لاني احب اكله تعلمته وقمت اتفنن فيه على قد ما اقدرمشكلته مثل ما قلتي الزفر بس مع هالطريقه بتفرقينه وايد … كل من يقولي السمج اللي اسويه مو زفر :>

  6. يقول bent el deera:

    nosa *****صح سبحان الله مع انه سهل بس الذ شي السمج المقلي…والصافي اسمع عنه بس للحين ما ذقته…:>انا سمجتي المقليه المفضله زبيديه صغيره وتقرمش ههههه

  7. يقول طز بالرجالة:

    تفرشين اسنان السمكة؟زين مع سنسوداين ولا كولجيت؟و دو يو فلوس ات توو ؟و الله تكنولوجيا اليابان ما خلت شي

  8. يقول bent el deera:

    اول شيء يا هلا ومرحبا ومس يور كومنتسثانيا لوول يا حظي انا قلت ان في اماكن ما تنطف فاستخدم لها فرشاه خاصه صوب العمود الفقري🙂

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s