بان كيك مع التوت والريكوتا وصلصه التوت والفراوله

هالوصفه مو رجيميه بالمره مهما نحاول وندور هههه … امس اول مره اسوي بان كيك من السكراتش  وصراحه يم يم لذيييذه … الوصفه اخذتها من بوبي فلاي ببرنامج ثرو داون وطلعت الوصفه الاصليه من النت

انا سويتها بطريقتين جزء خليته ساده وقدمت انواع التوت يمه وجزء خلطت البلوبيري مع العجينه… طبعا تقدرون تحطون اي نوع فاكه تحبون معاها سواء مشمش مجفف او موز او تفاح دارسين او احتى شوكليت شيب

تعديلي عن الوصفه الاصليه باشياء بسيطه بدلت البترملك (( عباره عن السائل اللي يبقى من الحليب بعد ما يطلعون منه الزبده ))  بالروب والحليب وعصير الليمون وقللت الملح وضفت عود فانيلا بالاضافه الى الفانيلا السائله ولغيت بودره الترتار وثلجت الطاسه اللي بخفق فيها بياض البيض بدالها  واخيرا قليتها من غير الزبده واكتفيت باللي تنحط بالويه:>

المقادير راهيه تعطيكم كميه حق 8 انفار :


6 بيضات البياض مفصول فيها عن الصفار

كوبين حليب
كوبين روب
قفشتين كبار عصير ليمون
قشر ليمونتين
نص كوب حليب سائل اضافي


4 1/2 كوب طحين ابيض فاخر
9 قفاش كبيره سكر ابيض
3 قفاش كبيره بيكن باودر
قفشه ونص صغيره بيكربونات الصوديوم
قفشه صغيره ملح
عود فانيليا نفتحها من النص ونستخرج الحبوب
فانيليا سائله بمقدار قفشه صغيره
6 قفاش كبيره زيت ذره او اي زيت نباتي

جبن ريكوتا نخلطه مع شوي حليب كامل الدسم او كريمه


فواكه مشكله حسب الرغبه


مقدار صلصه التوت والفراوله:
جيس كامل توت وفراوله مثلجه
ربع كوب سكر
عود دارسين
25 غرام زبده واذا جبيتو تقدرون تضيفون عود الفانيلا بعد ماتستخلصون منه الحبوب
 

الطريقه:

 ناخذ كل مكونات صلصله التوت والفراوله ونخليها على النار لين تثقل وتكون صلصه 

نخلط الروب والحليب وعصير الليمون وقشر الليمون مع بعض وبعدين نخلط صفار البيض مع الفانيليا وعصير الفانيليا والزيت ونخليهم 

ناخذ الطحين ونخلطه مع البيكن باودر والبيكربونات والشكر والملح ليما يتداخلون مع بعض

نصب خلطه الحليب فوقهم ونخلطهم عدل ونزيد الحليب الاضافي حسب سمك البان كيك اللي تفضلونه

قبل لا نسوي كل هالخطوات نكون مثلجين طاسه بالفريزر عشان نخلط فيها بياض البيض بيما تتماسك ونصير شبيهه بالمارينغ ونخلطها شوي شوي مع خليط البان كيك

نترك البان كيك يرتاح شوي وبعدين نصبه بمقله غير قابله للالتصاق واذا حبيتو فواكه معاها خلطوها بهالمرحله :>… ونقلبها للجهه الثانيه اول ما الطبقه السفليه تتلون

نقدمها مع الزبده والسيرب وصلصه التوت وجبن الريكوتا وبالف عافيه

الإعلان