ايس كريم فراوله …

ماكو احلى من الآيس كريم او البريد بالصيف وماكو احلى من البريد المنزلي  لانه ما يشابه اللي موجود بالجمعيات … وعمليه صنعه وايد سهله خاصه اذا عندكم الجهاز الخاص بالايس كريم بس حتى لو ما عندكم تقدرون تسون الخطوات وتخلطونهم وتحطونهم بالفريرز وكل نص ساعه تقريبا تطلعونه وتخلطونه وتردونه بالفريزر لين ياخذ شكل الايسكريم المعتاد
بما ان الفراوله احد الفواكه المفضله عندي فاحب اقتنص فرصه توفرها واسوي فيها كل شي احبه… بس تقدرون تستخدمون اي نوع فواكه في الايسكريم وتستخدمون مزيج الكسترد اساس لها  او تقدرون تخلطون كذا نوع مثل موز وفراوله … توت وليمون … فانيلا ومنجا… ككاو مع حبوب شوكليت شيب ونعناع ..الخ
  الحين بنتكلم عن انواع الايسكريم ….. حسب علمي اكو طريقتين لصنع الايسكريم ( وانا هني ما اتكلم عن السوربيه )  الطريقه الاولى اللي بذكرها الحين واللي يستخدم بالاساس فيها بيض وهذي الاشهر … وهذي نفسها تنقسم الى قسمين يا ينضاف البيض ني او انه ينطبخ مع الحليب والكريمه لما يكون هيئه كسترد
بالنسبه لي ماحب اشجع الاكل الني فلجات الى الطريقه المطبوخه… الطريقه الثانيه اللي نسوي فيها الايسكريم بالبيت تكون عباره عن شكر وكريمه والفاكهه المرغوبه يعني بالضبط ( ايس كريم ) وهالوصفه ان شاء الله اذا الله عطانا عمر رح انزلها لكم بوصفه ايسكريم الفانيلا
بتسالوني شنو الاحلى بين الاثنين ؟؟…. الجواب : يعود حق ذوقكم ورغبتكم
الوصفه اللي استخدمتها ماخذتها من الانترنت من زمان واللي عجبني فيها اني اقدر استخدم بيض كامل فيها لان اغلب الوصفات اللي كانت عندي يستخدمون فيها 5-7 صفار بيض  وهذي حسيت انها اخف… الوصفه اول ما جربتها ماكانت على ذوقي بالمره وعدلت عليها مثل ما حبيت واستخدمت النصايح الموجوده بالتعليقات ( يعني ضفت لها حليب  بنص مقدار الكريمه وزدت كميه الفراوله  وشلت الخل البلسمي وقللت عصير الليمون وقللت الملح وزدت الشكر ولغيت الفودكا طبعا  ونقعت الفراوله بالشكر وما شخلتها بعد ما هرستها)… بالنهايه تغيرت الوصفه 180 درجه بس صارت من الوصفات اللذيذه جدا واللي ما افكر اغيرها بوصفه ثانيه من وصفات الايسكريم المحتوي على بيض
تقدرون تخففون الكالوري بانكم تضيفون حليب نص دسم وتبدلون الشكر بتروبيكانا او سويت اند لو بس انا ماحب ” الافتر تيست “
في ملاحظتين احب انوه عليهم… مقدار الشكر حددوه بحسب رغبتكم ذوقو الفاكهه او الفراوله اذا حستوها ناضجه وفيها حلاوه خففو مقدار الشكر اللي يي معاها بمقدار ربع كوب واذا حسيتوها حامضه التزمو بالمقدار … اذا تحبونها حاليه وايد ضيفو شكر زياده يعني خلو مقدار الشكر اللي بالكسترد ثابت ولعبو باللي بالجزء الثاني
واشلي الثاني الفراوله نفسها اذا تحبون الايسكريم يكون ناعم ومافي قطع فراوله هروسو المقدار كله  بالخلاط بالنسبه لي احب القطع واحس ان تعطيها احساس منزلي حلو
المقادير رح تعطيكم تقريبا لترين :
بيضتين كاملين
كوب شكر
كوب حليب ( انا اخذت ربع كوب حليب تموين وكوب ماي )
 4/3 كوب كريما سائله
رشه ملح
شوي من عصير الليمون ( ربع  قفشه صغيره )
ربع قشر ليمون وتقدرون تستغنون عنه
فانيلا سائله بمقدار غطا العلبه
فراوله مقطعه 3.5-4 اكواب يعني تقريبا نص كيلو
الطريقه:
اول شي نسوي الكسترد لانه يحتاج يبرد… نخلط الحليب مع الكريما ونخليهم على النار لين يسخنون .. نشوف اول ما تتكون الفقاعات على جنب الجدر نطفي النار
نخفق البيض مع نص كوب سكر وقشر الليمون ونضيف له مزيج الكريما والحليب بالتدريج لين يتمازج وبعدين نرده على نار واطيه ونحركه لين يثقل بس من غير ما يغلي وهالملاحظه وايد مهمه
وبعدين نصبه بطاسه ونتركه لين يبرد او تقدرون تحطونه فوق طاسه فيها ماي وثلج اذا كنتو مستعيلين عليه
ناخذ باجي مقدار الشكر ونرشه على الفراوله ونضيف الفانيلا وعصير الليمون ونخليه بالثلاجه لين يبرد الكسترد عشان ينزل عصيره ويساعدنا بعمليه الهرس
ناخذ 3 اكواب من الفراوله ونخلطها بالخلاط  وباجي الكوب نهرسه بالشوكه او باداه هرس البطاط بس اخلي فيها قطع عشان تكون عندي ظاهره بالايسكريم
تعليمات الجهاز اللي عندي احتاج اثلج الطاسه اللي تخلط المكونات 24 ساعه قبل الاستخدام وهالشي يختلف من جهاز لي الثاني …. اطلعها من الفريزر واشغلها واخلط كل الكسترد الفراوله المهروسه بالخلاط والفراوله الثانيه واضيفها مره وحده بالخلاط واتركها من نص ساعه لي ساعه كامله على حسب برده الجهاز وبروده المكونات واخيرا اثلجها حتى وقت الاستخدام وبالف عافيه
Advertisements

23 Comments اضافة لك

  1. شاي الضحى كتب:

    مره امي سوت لنه ايس كريم فانيلا بعدها تووووووبه نسويه بالبيت كان يلوع الجبد لووووول بس هذا شكله يمييي تسلم ايدج وبالعافيه 🙂

  2. Her كتب:

    shakla yshaweg 🙂 ya36eech el3afya

  3. Ļa ƒéммé كتب:

    تسلم ايدياتج يارب وشكرا على الإفادة …خاطري اسوي برد من زمان والحلو بالموضوع انه يكون طبق حلو جاهز ممكن الإحتفاظ فيه بالفريزر للزيارات المفاجئه بس الجهاز من وين وشنو نوعيتة؟؟ وشكرا

  4. bent el deera كتب:

    شاي الضحى ***********هههههه نفس تجربتي الأولى بهالأيسكريمسلمي لي على الوالده وتسلم أدياتها 🙂 والله يسلمج حبيبتي

  5. bent el deera كتب:

    Her حبيبتي مشكوره 🙂

  6. bent el deera كتب:

    Ļa ƒéммé الله يسلمج حبيبتي ومشكوره عالدعوه :)الجهاز مأخذته من الغانم وماركته كينوود واعتقد انه ب 15بس مو ضروري تأخذين نفسه أخدي من أي ماركه لأن كلهم نفس الشي بس الفرق في أجهزه لازم تثلج الطاسه قبل وأجهزه ما تحتاج ان شاء الله تسوينه ويكون على ذوقج وان شاء الله بنزل طريقه أيسكريم الفانيلا غسان يكون عندج أكثر من وصفه له 🙂

  7. طز بالرجالة كتب:

    حبيالله يسلم كي دي دي و الا هالعباله شحقهالقوطي بخمسين فلسهههه

  8. flaanh كتب:

    ماشاءالله علييج ..بس صدقهن يا كثر الايسكريمات بالسووق ليش التعب ..كسااالى عاارفه ههههالله يوفقج خيتوو..

  9. bent el deera كتب:

    طز بالرجالة*************هههههه طعمه غير صدقيني وبعدين احب اسوي هالسوالف :>

  10. bent el deera كتب:

    flaanh*********كلامكم عدل بس حطيت هالوصفه للي يحب يجربها وطعمها شوي غير عن اللي برا :>

  11. طز بالرجالة كتب:

    حبيبتي انت شاطره و كل شي من ايدج غيراكيد شغل البيت طعمه لذيذبالعافية

  12. aisha كتب:

    عجبتني اوي وصفة الايس كريم بتاعتك و حابة اجربها بس كنت عايزة اعمل ايس كريم بالشوكولاته او الفانيليا ، هل ممكن تقوليلي وصفة ليهم ، و شكرا على الوصفات الجميلة دي

    1. bent el deera كتب:

      شكرا جزيﻻ عزيزتي وباﻻمكان اﻻستغناء عن الفراوله وزياده الفانيﻻ لعمل ايسكريم فانيﻻ اما بالنسبه للشوكﻻته ما جربتها

  13. امينة كتب:

    السلام عليكم جزاكم الله خيرا انا جبني بزاف بزاف رب يحفظكم وشكرا

    1. bent el deera كتب:

      شكرا جزيلا اختي 🙂

  14. امينة كتب:

    انا حبية انظم الكم وانا ما بعرف كيف اتسجل

    1. bent el deera كتب:

      بيمين الصفحه تكتبي اﻻيميل وتشتركي تلقائيا

  15. امينة كتب:

    ما بعرف انتم من اي بلد

    1. امينة كتب:

      ارسيلي موقعكم لكي اشترك معكم انا جزائرية وانتم مو خليجيين انا بموت في كلامكم واحب كلامكم

      1. bent el deera كتب:

        حبيبتي امينه شكرا على ذوقج 🙂
        واتشرف

  16. امينة كتب:

    انا بحبكم وايد مو تقولون هيك

  17. امينة كتب:

    السلام عليكم بدي اتعرف عليك في الفيس بوك

    1. bent el deera كتب:

      اكاونتي بالفيس بوك aklatiq8

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s