لحم مع بطاط ومشروم بالقصدير .. طريقة اخوي الغالي

 

انقل لكم هالوصفه مباشره من مطبخنا :>…. الصراحه كانت خوش تجربه مع اخوي بالمطبخ اليوم هههه رجعني 20 سنه ورا لما كنا نلعب مع بعض 🙂


اخوي اسم الله عليه حسب علمي اهو الطباخ بين ربعه بالمخيم  واليوم مسوي لنا وصفه من وصفاته المشهوره …. دخلت معاه المطبخ وقعدت اجكجك هههه





اخوي يقولكم المشروم الفرش بيكون احلى بالوصفه وتقدرون تضيفون معاها فاصوليا هم بتكون حلوه وينصحكم اذا عندكم فرن مندي تحطونه على الفحم واللحم بيطلع ذايب  … حاولت اخذ منه المقادير بس يقولي مقداره كف ايده  (( طالع علي بهالسالفه ههههه )) بس شكلها يشوق وريحتها بعد واول ما تخلص بحط لكم الصورة النهائية....صديقات الرجيم انصحكم فيها مع سلطه خس مشكله وبالعافيه  

المهم المقادير:

لحم مقطع شقف ( خروف مو بقر )

فلفل اخضر مكعبات صغيره

بقدونس مفروم

طماط مقطع مكعبات صغيره

بصل مقطع مكعبات

بطاط مقطع مكعبات كبيره

مشروم  معلب انصاف

ثوم مقصص طولي

بهارات مشكله

 كمون

فلفل اسود

بهارات مجففه ( اوريغانو و زعتر و ريحان )

زيت زيتون
شويه مطري لحم لان القطع اللي عندنا كانت ناشفه

ملح

الطريقه:



نخلط كل المكونات ( عدا البطاط والمشروم ) مع بعض ونمزجها بالايد عشان تتداخل البهارات مع اللحم واخوي يقول لكم كل ما مزجتوها اكثر بتطلع احلى 


واذا شفنها البهارات اختلطت عدل نضيف المشروم والبطاط  وخلو البطاط حجمه يكون كبير عشان يستوي وما ينهرس على ما يستوي اللحم


ناخذ القصدير ونسكر جوانبها عدل ونضيف زيت زيتون بالجهتين عشان لا يلصق اللحم بالقصدير ونضيف شوي ماي عشان يكون لنا بخار ونسكره عدل وندخله فرن حار ليما يستوي او حطوه على الفحم مباشره وبستوي من البخار اللي ينزل من اللحم والخضار ويالعافيه


Advertisements

12 Comments اضافة لك

  1. Alaa Al Yaqout كتب:

    مشاء الله، كتاب طبخ كامل ..أنا عكسج عاد ما عندي خلفية بالطبخ كلش .. بس بودي أجربه !تسلم الأيادي

  2. bent el deera كتب:

    عزيزتي الاء أول شيء نور البلوق بزيارتج الأولى :)والطباخ سهل ابتدي بوصفات سهله وشوي بتشوفين روحج تتفنتفين :)وإذا عندج أي استفسارات حق أي وصفه موجوده لا تتردين بالسؤال :)بالنسبه حق هالوصفه وايد سهله وحبوها عندنا ان شاء الله تجربينها وتكون على دوقج :)حياج الله

  3. Mohammed كتب:

    والله مبين على الاكل لذيذذذ واخوووج شكله طباخ كككككانا بعد احب الطبخ واطبخ وفي مدونتي قسم food شوفي الطبخات اللي مسويهم بتعجبج ,,والله يخليكم لبعض ان شاءاللهانا من قبل ازور البلوق هذا بس اشوف وامشي بس اليوم قلت لازم اعلق عشان اشجكم بتميزكم ,,وودي اسألج من وين اقدر احصل الاله اللي تصنع الايس كريم وشكرااخوكم محمد ,,

  4. bent el deera كتب:

    أخوي محمد حياك الله ونورت البلوق :)مشكوووووور على الحجي الحلو وماقصرت و تسلم أيدك بالوصفات وان شاء الله الحين أزروها :)أخوي بعد يشكرك ويقولك حياك الله :)بالنسبه للجهاز تحصله بالغانم و يوريكا وأتوقع تحصله بعد بسيتي سنتر 🙂

  5. لمار كتب:

    انامادري شلون طوفت مدونتك مع اني اشم ريحة الطبخ من اميال والله خوش وصفة مع اني اسوي نفس طريقه اخوك بدون اعشاب بس بهارات واحطها بكيس الفرن لما تستوي افتح الكيس واخليها تتحمر من فوق مادري عندك كتاب طبخ مميز تعتمدين عليه ؟ دليني عليه.ويسلمووو

  6. Anonymous كتب:

    اطباقك بطله تسلم ايدك ويد اخوك

  7. Sn3a كتب:

    ماشاءالله عليهالعايله كلها فنانه بالطبخ الظاهرعاد قولي الصج وما افتنايهو اكله احلى انتي ولا اهو؟;p

  8. bent el deera كتب:

    لمار******عزيزتي حياج الله بكل وقت ونورتي المدونه بمرورج الاول :>انا اتوقع الاعشاب اخوي حطها لانها شافها قباله … يعني من وين بييب اعشاب بالمخيم ههههههبالنسبه للكتب …. انا عندي كتب وايد واغلب اللي اطبقه اذكر من اي كتاب استخدمته… وحاليا متجهه صوب الكتب الاجنبيه ووايد عاجبتني مجله COOKING LIGHT وهذي مجله شهريه بالنسبه للكتب العربيه عندج كتب عبير الراشد احبهم واطبق منها وانا مرتاحه ونفس الشي بتول الكندري احب سلطاتها مواقع الانترنت وايد فادتنيوعندي كتاب من امي الله يرحمها اسمه ENCYCLOPEDIA OF COOKING وايد قديم بس مفييييد ان شاء الله بنزل موضوع كامل عن كتب الطبخ اللي عندي :>

  9. bent el deera كتب:

    غير معرف*********الله يسلمك/ يسلمج وشكراااا :>

  10. bent el deera كتب:

    Sn3a*****شفتني شلون شكلي بضمه يكتب وصفاته حق البلوق بفتره نقاهتي وتبين الصج …. انا وياه نفس الشي خخخ:q

  11. CARNBERRY CANDY GIRL كتب:

    مشاء الله خوش طبخة تسلم الأياديياحظج أخوج يعرف يطبخ ، اه بـس لو واحد من إخـواني يـعرف يـطبخ ، بنـاخذ إجازة يوم بالإسبوع من الطبخ وبـخليه هو يطبخ ههههههبـعـطيهم هالوصفة وأخلـيـهم يتدربـون عليها>> ماعـندها وقت الإخت ^^بس بغيت أعرف شو هـو مطري اللحم؟؟

  12. bent el deera كتب:

    الله يسلمج عزيزتيدخلوهم المطبخ معاكم غصب ههههههعاد الوصفه سهله وما يبيلها شيمطري اللحم مثل الملح ينحط على اللحم او الدياي بغرض تطريته وهالاضافه كلش مو ضروريه :>اذا اللحمه عندكم فيها نسبه شحم مرح تحتاجون هالاضافه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s