عجينه البيتزا بطريقه اينا غارتن ( بيرفوت كونتيسا)

عجينه البيتزا سهله ولذيييذه … كميه الخميره فيها وايد عشان جذي ما تحتاج تخمر فتره طويله وتشكيلها وايد سهل… شفتها ببرنامجها barefoot contessa  على food network وطلعت الوصفه من سايتهم… انا ضفت لها بس قفشتين كبار حليب بودر بس هم حلوه من غيرهم لاني جربت العجينه كذا مره  بالاضافه الى اني خلطت كذا نوع طحين  لاني ابيه اسمرعشان الفايده  بس تقدرون تستخدمون الطحين العادي :>
 
 
وهذي ثاني وصفه اطبقها لها بعد وصفه الستيك ( ان شاء الله بنزلها قريب )…ومن كثر ما عجبوني وصفاتها طلبت 2 من كتبها الطبخ  بامازون 
تقدرون تضيفون اي حشوه تحبونها على ويه البيتزا….بس الجبن اللي تضيفونه تاكدو انه نوع زين… جربو جبن موتزريلا كرافت هالجبن كل ما استخدمه ادعي حق جندوله ينننن او اخذو ماركه GALBANI  بس هذي غاليه شوي  واذا ما حصلتوهم اخذو جبن قالب من المراعي وبشروه بالبيت :> 
 
بنزل لكم ان شاء الله نسختي من وصفه  WHITE PIZZA WITH ARUGULA  باجر :>…. هالوصفه اهداء حق اختي هيفاء المسيفر وان شاء الله تعجبج :> 
واذا سمحتولي بشرح لكم حسب خبرتي البسيطه الفرق بين انواع الطحين الموجوده عندنا بالسوق …. الطحين الفاخر يعتبر اخف انواع الطحين عندنا ويصلح للكيك  والسمبوسه  وشسوالف معجنات القلي وهالاشياء  لانه ما يحتاج خميره وايد  ولا عجن وايد وينفش بسرعه… الطحين الابيض العادي اقوى منه شوي ويصلح للعجن اكثر بالخبز والصمون والبيتزا وهالسوالف بس ما انصح فيه للكيك اذا تبونها خفيفه استخدمو الفاخر .. وطبعا الطحين المخمر خميرته منه وفيه ووايد حلو حق سوالف الدونت او الوصفات اللي تتطلب هالنوع من التخمير وجربوه مع خليط التمبورا او خليط السمج وايد حلووو … الحين الطحين الاسمر معروف  وهو اثقل من الطحين الابيض ويحتاج فتره عجن اكثر وتخمير اكثر عشان يرتفع وغالبا يكون ناشف بروحه عشان جذي ينخلط مع الابيض عشان يعطيه مطاطيه والطحين الكامل  نفس الطحين الاسمر بالاضافه الى النخاله وهو اثقلهم وما انصح تستخدمونه بروحه كلش . برايي  استخدمه كمكمل للمقادير عشان الفايده … عشان جذي انا وايد اخلط بين كذا نوع طحين اخذ من الفاخر المطاطيه والاسمر مع النخاله الفايده والقوه  طبعا تقدرون تستخدمون نوع واحد وانا الاحظ وايد ناس يحبون يستخدمون الفاخر بروحه لانه مطاط وينفش ويكون ترف بروحه بس حبيت اوضح لكم الخيارات الموجوده
 
في موضوع راااااااائع انا وايد استفدت منه بس حسافه الصور طارت من الموضوع حق دردشه مطابخ بعالم حواء 
وهم قبل جم يوم طحت على هالموضوع في المنتدى المتميز شامواه…. وعجبتني ولي رده عليه اقراه مره ثانيه بتمعن ان شاء الله
 
وهذا موضوع عن الخمائر وانواعها بشكل مبسط  من  موقع JOY OF BAKING
 
انصحكم تقرونهم اذا تحبون تفهمون اكثر عن آليه العجين

بسم الله الرحمن الرحيم نبتدي 
المقادير :
4 اكواب طحين …. انا استخدمت كوب طحين كامل وكوب طحين اسمر والباجي طحين العادي
ملعقة كبيره عسل
3 ملاعق كبار زيت زيتون
ملعقتين كبار حليب بودر
ماء دافي لخلط العجين بحدود كوب وربع
كيسين خميره فوريه ( بحدود 4 ملاعق صغار ونصف )
ملعقة صغيره ملح
 
الطريقه:
بطاسه العجانه الكهربائيه نخلط الخميره مع الماء ونضيف له الزيت و العسل ( عشان لا تلزق الملعقة والمقدار يكون مضبوط )..ونحركها ونتركها ثواني و  نضيف 3 اكواب طحين والحليب البودر  ونتركها تختلط   و نضيف الملح و  الطحين بالتدريج لما نحصل على عجينه مطاطه  وكل ما عجنت اكثر احسن ( انا اخليها تعجن على ما اجهز الحشوه والصلصه )
 ونسكرها  مثل الكره ونتركها تخمر …  شكلوها مثل ما تحبون :>

وعليكم بالف عافيه 
 
Advertisements

16 Comments اضافة لك

  1. شاي الضحى كتب:

    يميي احب البيتزا شكلها يشوق تسلم ايدج وعوافي 🙂

  2. bent el deera كتب:

    حبيبتي شايونه الله يسلمج ويحفظج من كل شر 🙂 ودام انج تحبين البيتزا جربي هالعجينه وان شاء الله تعجبج … أهي مبدئيا بتعطيج تقريبا 6 قطع حجمهم كبير أو درزن ونص من حجم البيتزا الصغير … وتقدرين تجربين نص المقدار 🙂

  3. cheese 7cake كتب:

    الله فناااتق بس كثرة الخميره ما تطلع طعم خميره بالعيين ؟؟؟زما تتفخ البطن .؟؟تسلم ايديج

  4. bent el deera كتب:

    لا تحاتين حبيبتي لأنج مرح تخمرينها وايد فمرح تكون ريحتها خميره أنا أول مره سويتها كنت متخوفه من هالشي بس الصراحه بالعكس هالعجينه تينن وسريعه

  5. هيفاء المسيفر كتب:

    تسلم يدج اختي بنت الديرة ومشكورة على الوصفة والله روووووعة وبجربها بأقرب فرصة وبخبرج بالنتيجة جزاج الله خير خليتيني احب اسوي المعجنات

  6. N كتب:

    واي توني اطيح على مدونتج روعه تهبل شغلج يونس كوووووووووووووووووول

  7. Yazz كتب:

    قررت أسويها الأسبوع الياي بس عندي سؤال، كم من الوقت تحتاج بالفرن و كم درجة حرارة الفرن، تسلم أيديج و الله يعطيج العافية

  8. Yazz كتب:

    قررت أسويها الأسبوع الياي بس عندي سؤال، كم من الوقت تحتاج بالفرن و كم درجة حرارة الفرن، تسلم أيديج و الله يعطيج العافية

  9. bent el deera كتب:

    هلا حبيبتي :>الحراره حسب سمك العجين وحراره الفرن بس عموما اهي ما تطولمثلا ب 200 لمده 10 دقايق واذا اصغر تحتاج وقت اقل بحراره اقل اذا تحبينها رقيقه وتقرمش تكون بحراره اعلى ووقت اقلوهكذا :>

  10. yasmeen كتب:

    روعة العجينة تبارك الله، قمت ما أخاف من تحضير العجاين و الخبز و أنا أتبع شرحج ماشاء الله لا إله إلى الله واضح و مظبوط
    ما تقصرين على روائع الوصفات

    1. bent el deera كتب:

      مرورج وتعليقج عندي اهو الاروع :>

      الله لا يحرمني من طلتج الحلوة
      وعليكم بالف الف عافيه وتسلم الايادي :>

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s