Pioneer Woman’s Cinnamon Rolls سينابون بدون عجن بطريقه ري ريموند


الصوره ماساه لاني مصورتها من البلاك بيري وكانت البطاريه تقريبا ميح وماكو فلاش … الصوره ظالمه لان السينابون رول ينن وايد حلو وهش بس من العيله حطيت الفروستنغ والسينابون حار والمفروض احطه وهو دافي بس لما برد ما بين الفرق وايد

وهذي اسمها صينيه فشوشه هههه واهداء خاص لها… هالوصفه تلقونها بسايت bakerella نقلا عن Pioneer Woman 
الحلو فيها ما فيها عجن وتخمير وايد وطعمها غير الوصفه اللي نزلتها قبل بهاللينك.. هذي اهش وايد والصلصه اللي فوقها يايه معاها حلوه 
ترا الوصفه سهله ومافيها خبصه وايد وطريقتها يديده.. انا بس غيرت شويه اشياء اول شي قللت كميه الزبده والشكر  لي النص وضفت ميبل بو طقه من طقه انت جمايما وربعها لان ماعندي نكهه ميبل وحطيت فانيلا بالصلصه… غير ذلك الخميره جافه عندي منتهيه صلاحيتها فاستخدمت الفوريه والنتيجه طلعت اوكي.. بالنسبه للوصفه الاصليه استخدمت فيه نوع واحد من السكر وهو الابيض بس انا احب استخدم الاسمر لانه يعطي نكهه احلى ويكون تشوي  فخلطت بين الاثنين

بسم الله الرحمن الرحيم
المقادير :
كوبين حليب كامل الدسم
1/2 ك  زيت نباتي وانا استخدمت كانولا ( طايحه فيه هالايام )
1/2 ك سكر
جيس خميره فوريه = 2 وربع م ص 
4  و 1/2 ك طحين عادي
1/2 م ص بيكنغ بودر
1/2 م ص بيكربونات الصوديوم
نص قفشه صغيره ملح
اصبع زبده = 100 غرام
نص كوب من كل من سكر اسمر وابيض
ثمن كوب او قفشتين كبار دارسين ناعم
مقادير الصلصه او الفروستنغ :
نص باوند سكر ناعم … مادري جم بالضبط لاني وزنته بالميزان
قفشه كبيره ميبل سيرب اي نوع
مقدار غطا فانيلا سائله
ربع كوب حليب
قفشتين زبده ذايبه
ربع كوب قهوه ( انا استخدمت نسكافيه )
رشه ملح
بيكان مبشور حسب الرغبه انا احب احطه يعطي قرمشه ونكهه حلوه 

الطريقه :
نسخن الحليب والسكروالزيت على النار لين يوصل لي  قبل مرحله الغليان ( يعني لما تشوفون تكون الفقاعات الصغيره  على اجناب الجدر طفوه ) ونطروه عيله يدفي …. انا طفيته ورحت تغديت وزفيت الخدم شوي وطلعت باجي المكونات ورديت له ههههه
نحط الخميره و 4 اكواب طحين  ونخلطه ونغطيه بفوطه ونتركه ساعه بالتمام والكمال عشان يخمر عدل ويرتفع (( اي نعم نخليه بالجدر )) رح يطلع شكله بعد التخمير جذي

مادري ليس طلعت مديوره عموما بعد ما تنفش جذي نحط باجي مقدار الطحين والبيكنغ باودر والبيكربونات والملح و ونخلطه رح تطلع حاجه تشبه جذي واذا حسيتو انها محتاجه بعد طحين ضيفو بس عشان لا تكون ملزقه وترا شكل العجينه جذي طبيعي لا تحاتون

نحطها بالثلاجه على ما نزهب باجي المكونات عشان تجمد شوي وتقدرون تستخدمونها على طول بس انا قريت من كذا ملاحظه انها لما تبرد تكون افضل
نذوب الزبده  ونتركها تفتر 

ونخلط الدارسين مع نوعي الشكر
وبعدين نرش رشه وفيره  من الطحين على مكان الفرد
ونحط المحروسه ههههه .. شوفو شلون شكلها تماسك شوي بعد التبريد
ونفردها انا طلعت معاي بالضبط 30 في 20 انش … طبعا تقدرون تقسمونها بالعرض بس انا خليتها راهيه عشان كنت بسويها حق ناس عزيزين :>….
نحط الزبده الذايبه ونمسح كل اطراف العجينه فيها…
ونرش كل كميه الدارسين والشكر رح تحسونها وايد بس ترا الكميه مناسبه  لان اقل من جذي مرح تحسون بطعم الدارسين انا رشيت بعد بيكان مبشور عليه
نلفها وهني شوي المساله صعبه لانكم بعمليه اللف لازم تاكدون انها مسموته عشان لا يصير شكلها نفس الاشكال الغريبه العجيبه اللي طلعت معاي

نقصصها بحجم انش او حسب المقدار اللي ترغبون فيه وبعدين صفوها بصينيه الفرن… انا هالمقدار المفروض يعطيني 3 صواني بس لاني مثل ما ذكرت مسويتهم راهين عطوني صينيتين بس … وبليز بليز لا تضحكون على الاشكال نخليهم شوي عشان يردون ينفشون.. انا خليتهم على ما سويت الصلصه


بالنسبه للصلصه نخلط المكونات كلها مع بعض ونخليها بالثلاجه او برا على هواكم…



يدخلون فرن حرارته 170-180 درجه تقريبا ثلث ساعه او اقل بدقيقه ولا دقيقتين  ليما يتحمرون 

والمفروض لما تدفى شوي نحط الفروستنغ فوقها بس انا حطيتها وهي حاره من اللقافه ونرش البيكان على الويه… رح يجمد الفروستنغ ويعطيه شكل حلو

23 thoughts on “Pioneer Woman’s Cinnamon Rolls سينابون بدون عجن بطريقه ري ريموند

  1. يقول شاي الضحى:

    ما شاءالله عاد انا ما احبها بس امي تحبها بسويها لها ان شاءالله :)تسلم ايدج وعوااااافي

  2. يقول bent el deera:

    هلا حبيبتي شاي الضحى..زين تسوين و الله يخلي لج الوالده وتعيشين وتسوين لها :)العجينه يمكن وي تضايقج بالفرد حظي لها طحين من فوق وتأكدي موجود ومغطيها من تحت عشان لا تلصق لأن العجينه هشه حيييل جربيها وان شاء الله تعجب الوالده وتسوينها مره ثانيه حق أختج لما ترد بالسلامه ؛)

  3. يقول Sn3a:

    اخيه من زمااان ماكليت سينابون ودي اجرب بس مشكله اخاف اكل الصينيه غدا;pتسلم ايدج

  4. يقول bent el deera:

    أخييييييه يا سنعه لا تثيرين المواجع صينيه كانت حق البيت والصينيه الثانيه قلت حق أخوي يوديها حق ربعه أنا ريجيم وابوي سكري يعني يا حلاتنا وقبالنا صينيه حلو هههههه وإذا تبين المقاومه تنعدم دشي المواقع الأصليه وشوفي شحلاتها

  5. يقول cheese 7cake:

    يمــي يمــي ماشاء الله تبارك الرحمن شكلها يشوق تسلم ايدج وانا من متابعين مدونتج وبقوه …يعطيج العافيه

  6. يقول bent el deera:

    Talita thank you for your comment :>you can find the origin recipe herehttp://thepioneerwoman.com/tasty-kitchen/recipes/breads/pioneer-womane28099s-cinnamon-rolls/or herehttp://www.bakerella.com/both are in english…and yeah its yummmmo

  7. يقول Q8-HANDICAP:

    تسلم الايادي والله شكله لذيذ على فكره انا على طول متابعه في مدونتج حته لو ماحط لج تعليق سامحيني اكون مشغلوه بس اصراحه طباخج لايعله عليه مشالله

  8. يقول Artos ~:

    ماشاء الله دائماً مبدعه ,, والأحلى دوم بمواضيعك هو السرد إللي قبل الوصفه ,, يحمس الوحده تجرب وهي متطمنه وواثقه من النكهه إللي تبيها ..الله يعطيك ألف ألف عافيه ..كنت ناويه أرسلك عالإيميل ولكن مادريت راح توصل لمين بالضبط !! , وهل هو خاص بالـ blogger أو لك شخصياً ..عالعموم هذا إيميلي :samesame_ksa@hotmail.comإذا ماعليك كلافه فقط أرسلي إيميلك , أبيك بموضوع .

  9. يقول bent el deera:

    ارتوووس يالغاليه شكرا جزيلا :)و وايد وايد أسعدني تعليقج وشهادتي فيج مجروحه …ودزيتلج الايميل :)وحياج الله بكل وقت

  10. يقول Fishah:

    يــــــا حلوج ويا حلو الاهداء .. كل شي منج حلووو .. تسلم ايدج حبيبتي .. ومشكوووووووووووووووره :***

  11. يقول bent el deera:

    فشووشه حبيبتي تسلمين :***طز بالرجاله… بعد جبدي انتي ولهت عليج العافيه وانا بعد ولهانه عليج :***

  12. يقول Anonymous:

    كوني ذكر أدري وضعي غلط هني بس أنا خذيت الوصفة , و ألحين الصحن بالفرن الله يسترو سؤال : دبس السكر مافي له بديل؟ مشكورة على الإبداع الجميل

  13. يقول bent el deera:

    غير معرف*********في البدايه حياك الله :> وزيارتك تشرفني ولا تنسى اغلب الشيف المشهورين رجالبالنسبه للسينابون تسلم الايادي ويعله مداخيل العافيهبالنسبه ( لدبس السكر ) اذا تقصد فيه السيرب .. ممكن تلغيه لان النكهه ما تظهر وايد ..او تقدر تزيد كميه الفانيلاواذا ماني غلطانة ….اعتقد ان هناك تعقيب ثاني بس حطيته بموضوع السينابون القديمعموما ضاق خلقي ان التجربه ما نجحت معاك بس وصراحه مادري وين الهلل لاني ما واجهت هالشي لما سويتهابس اعتقد ان السينابون كان يحتاج حراره اكثر بالفرن وفتره اطول لين يتحمرحياك الله اخوي مره ثانيه واتمنى الزياره ما تنقطع :>

  14. يقول Anonymous:

    أنا بجرب مرة ثانية بس عندي جم ملاحظة:- الخميرة مو جنها وايد؟؟.- بالنسبة لريح الليمون أنا أستخدم قشر ليمون مبشور.- و بالنسبة لدبس السكر (السيرب) شلون أسوي الكراميل من غيره؟.و شكرا

  15. يقول bent el deera:

    غير معرف*********ميخالف اخوي بس انا ضيعت اذا تقصد هالوصفهالخميره مو وايد لان نبيها تنفش …بس اذا حسيتها وايد تقدر تخففها خاصه مثل منت ملاحظ ما فيها عجن ريح الليمون اذا تقصد بالوصفه القديمه قشر الليمون اوكي بس مرح يعطيك بالضبط نفس نكهه ريح الليمون … عموما وجودها موضروري لاني وايد اسوي الفروستنغ من غيرهاالكراميل في عده طرق له … طريقه ذاكرتها ميلو بهاللينكhttp://joyinadish.blogspot.com/2009/05/pumpkin-cake.htmlوفي طريقه بهاللينك.. بس يبيلها تحريك مستمر حزه اضافه الكريماhttp://www.l2ma.com/content/view/66/2/او استخدم الطريقه اللي وصفتها بس عيبها انها تتكل فتضطر تشخله او تستخدم كراميل جاهز وانا انصحك بنوع ماركس لند سبنسر لان طعمه وايد قريب من الطعم البيتي

  16. يقول sara:

    ياهلا وغلا فيج حبيبتيالسينابون يجننننن مررهتسلم اناملك الحلوووةالله يعطيك العافيةاخوي رسل لي الطريقة وسويته و عجبه مرره والحين اعتمدت طريقتج مع بعض التغييرات البسيطة << لازم تزيد وتنقصالكل يسألني عن الطريقة عاجبهم مرره واعطيهم السايت يشوفوا الأصل ..بالتووفيق يالغلا

  17. يقول bent el deera:

    sara *****حبيبتي مشكووووووره :>شهادتج وسام اعتز فيه :***عليكم بالف عافيه وحياج الله :>

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s