فشلي الذريع بالتشيزكيك

الحين تاكدت وتيقنت ان المشكله فيني مو بالوصفات… خل اردكم معاي يومين  لحوار دار بيني وبين ام حسون 
انا: ام حسون مشتهيه التشيز كيك اللي تسوينها
ام حسون: مادري وين الفايل الاخضر صارله فتره ضايع  (( الفايل الاخضر هذا فايل ميمعين فيه وصفات امي الله يرحمها ومنها وصفه تشيزكيك عجيبه … وان ام حسون لها السبق بتطبيق وصفات الحلو اللي فيه منها هالتشيزكيك والبسبوسه))
انا: يعني شدعوه ما تذكرين شلون ؟؟ خل نروح كارفور ونشتري الاغراض اللي تذكرينها
ام حسون: كيفج بس انا ماذكر الا 400 غ جبن فيلادلفيا 

ونروح كارفور ونشيل كل شي يذكرها بالوصفه ( قيمر ،دريم ويب ، جيلاتين، كيك… الخ ) حتى الجبن بدال 400 شرينا 500 غ
بس ما عندنا وصفه… ولان تاريخي بالحلو البارد يفشل قررت استعين بكتاب المطاحن القديم بعدد مال رمضان وقلت خو كتاب المطاحن ما عليه كلام وصفات الحلو فيه مضبوطه

والنتيجه  
اللي تشوفونه… شكل حلو الطعم مااااااكو … جد من كثر الجيلاتين ماكو طعم جني اكل جلي ثقيل من غير طعم  ولا اكو حلاه ولا اكو شي
جربت وصفات وفشلت من قبل بس هذي تفوقت عليهم وتستاهل انزل فيها بوست كامل عنها … قمنا ناكل الكيك اللي بالقاعده مع صلصه البلاكبيري ونقط الجبن اللي اهو اساس الحلو  تخيلووو


خلاص اعتزلنا الحلو
ما غير الالبه والسينابون والمفن والكنافه والوربات والبراوني بو نوتيلا وكيك التمر والابل باي ..دام اني فالحه فيهم خل امسك مينوني ابرك


ملاحظه: مرح اعتزل قبل لا اجرب وصفه شاي الضحى كمحاوله اخيييييييييييره  وان شاء الله تضبط عشان ارد اعتباري النفسي حق نفسي هههههههههه
Advertisements

22 Comments اضافة لك

  1. الجودي كتب:

    صباح الخير حبوبة ليش تستعملين الجيلاتين أنا لما أسوي التشيزكيك بدل الجيلاتين أضيف جيلي يعطي التماسك و النكه تكون أحلى بس بصراحه أنا لما أسويه استخدم بايركس مو القالب إلي إنت مستخدمته يعني ما ني ذاكرة ثباته بالشكل إلي بالصورة عندج ولا يكون اشويه سايب بس لذيذ إذا تبين الوصفة ادورها لج و خيرها في غيرها إن شاء الله تضبط

  2. mellow كتب:

    ما غير الالبه والسينابون والمفن والكنافه والوربات والبراوني بو نوتيلا وكيك التمر والابل باي هو نعمة بعد إشتبين أكثر من جذي كاج ما شاء الله تبارك الرحمن تعرفين.تصدقين عاد آنا مااااااا أحب ماااااأحب أي نوع حلو فيه جيلاتين ، لا أحب أسويه ولا أحب آكله ، أول شي ما أضبطه و بعدين طعمه على قولتج يخلي الأكل ماصخ .التشيز كيك إلي بالفرن وايد وايد وايد ألذ وسهل …آنا ضبطته و قمت أفنتق فيه ما شاء الله …بس ضبطي حرارة الفرن على 140 درجة و خليه ساعة إلا ربع تقريباً و بس إن شاء الله يستوي.

  3. Fishah كتب:

    ههههههه ميخالف ميخالف لا يأس مع الحياهبعد شتسوين كنتو تبون تشيزكيك .. لاااا تخلون شي بخاطركم :)بس صح انا ماحب الجيلاتين .. احسه مااالق :<عليكم بالعافيه يا حلوه 🙂

  4. شاي الضحى كتب:

    شكل الكيكه يكسر الخاطر ههههه يالله محاوله بعد محاوله وكل شي يتصلح ان شاءالله انتي عكسي انا بالحلو اوكي بالطبخ مو اوكي هالأيام قاعده اتعلم ماكو الا انتي تاخذين دوره عندي وانا اخذ دوره عندج هههههههه جربي الكيكه وان شاءالله تعجبج 🙂

  5. Kurinkato كتب:

    بنت الديرة اخذي هالوصفة و جربيها و ان شاء الله تنجح معاج طبعا الطبقة الاولى كيك ، او دايجستف مع زبدة الطبقة الثانية 1 نستله كبير 1 دريب ويب ( كيس ) 1 قيمر 6 جبن كيري او علبة فيلادلفيا صغيرة 1 جيلاتين ( تذوبينه بماي حار- هالخطوة مهمة لان مرة حطيت الجيلاتين بدون لا اذوبه و صار ماي مايوه و شبعت ضغاط من اهلي ) الحين حطيها بالفريزر لمدة ساعة او ساعة ونص ليما تصك ما تاخذ وقت وايد الطبقة الاخيرة حسب اختيارج من الفلنغ اللي تفضلينه و قوليلي شرايج فيها بعد ما تجربينها

  6. Anonymous كتب:

    حبوبه ليش تضيفين جيلاتين انا ماضيفه كلش الدريم ويب والجبن راح يتماسكون ويعطونج النتيجه المطلوبه بس ماعليه ان شاءالله المره اليايه تظبط

  7. مـي كتب:

    التشيزكيك نوعين: بارد ، بيكد/ مخبوزالأول حلوبس الثاني أحلى..إذا تحبين اللي يدخل الفرن جربي وصفات عبير الراشد ، عندها تشيز كيك أصلي ، تحطين عليه أي خلطة ، وتشيز كيك أوريو بالليمون ، عجيب فنتوقي..

  8. bent el deera كتب:

    الجوديهلا صباح النور والانوارالجيلاتين ضفته لانه موجود بالوصفه ما توقعت يعطيني هالطعم …واذا ما فيها كلافه كتبلي وصفتج وان شاء الله اسويها وتضبط معايمشكووووره حبيبتي :****

  9. bent el deera كتب:

    mellow هلا ميلوووووميلو انا قصدي الاشياء البارده ما عرفها اي حلو بارد وسوالف ما يضبط معاي لازم شي مخبوز وبالفرن التشيز كيك اللي بالفرن اسويها وتطلع اوكي بس مو واااو … بحوس ببلوقج ادور وصفه التشيز كيك الجيلاتين حطيت عليه اكس …مادري وين يستخدم بعد بس اكيد مرح ادور وصفات موجوده فيه مشكوووؤره حبيبتي وفديت هالطله الحلوة :***

  10. bent el deera كتب:

    Fishahههههه شفتي .. شيني وقوات عينيايي الحمدالله جربناها والخدم الحمدالله كلوها يعني اشوه ما انقطت نعمه اللهوالله يعافيج حبيبه قلبي :*

  11. bent el deera كتب:

    شاي الضحىياااابعد جبدي مشكوووورهويالله متى الدورة؟؟؟ من الحين اقولج يبيلي دروس مكثفه ههههههالكيكه ان شاء الله بسويها بالويكند :> ادعيلي تضبط

  12. bent el deera كتب:

    Kurinkatoمشكووووره حبيبتي ما تقصرين… ان شاء الله بطبقها واقولجعاد كل مكوناتها متوفره :>مع اني خايفه من تجربه الجيلاتين بس بجربها :>مشكووره مره ثانيه

  13. bent el deera كتب:

    غير معرفمشكوره حبيبتي على النصيحه… انا طبقت الوصفه بحذافيرها وطلعت معاي هالنتيجهماعليه الدنيا تجارب:>مشكوووره مره ثانيه

  14. bent el deera كتب:

    مـيهلا وغلا فقدنا طلتج الحلوه :>تشيزكيك عبير الراشد جربته من زمان اول ما نزلت كتابها وكان حلو بس عيبه ثقيل شوي ويبيله تحضير طويل تشيز كيك الليمون والاوريو ماجربته بس على وصفج بجربه ان شاء الله :>مشكوره على هالنصايح الحلوه

  15. الجودي كتب:

    هلا بنت الديرة هذه مقادير التشيزكيك إلي أسويه و إن شاء الله تعجبج أولا :كيكه سارالي أو أي كيكه مثلها اتقطعينها و اترصينها في قاع البايركس …ثانيا :الطبقه الثانيه مقاديرها 1 مغلف دريب ويب يعني مو علبه لآ بس جيس واحد 2 قشطه KDD أو أي نوع براحتج 1 جلي مشمش ( و أنا جربتها مره مع جلي لايم الأخضر و اعجبت أهلي و اسألوني عن طريقتها لآن اللون الأخضر غير الشكل والطعم فحسبالهم طبق يديد )6 حبات جبن كيري 1 علبة أناناس مقطع ( قوطي ) بدون الماي تخلطين المقادير كلهم بالخلاط الشيشه و اتصبينه على الكيك و تحطينه بالثلاجه و قبل التقديم اتحطين عليه الطبقه الثالثه ثالثا : الطبقة الثالثه تختارين حشوة الباي الجاهزة و يا تكون بلاك بيري أو بلو بيري الأثنين حلوين بس الأحمر مو ذاك الزود و بالهنا و العافيه و إذا سويتيه لا تنسين تقولين لي إنطباعج يعني أوكي أو لآ اوكيك (:**

  16. fatto كتب:

    خن اعطيج طريقتي صج صج لذيذه انا مشهوره فيها بالعايله .. في اي يمعه يطلبونها مني حدها سهله ولذيذه اول شي اتقطعين كيك سارالي ابيض وتصفينه بالبايركس وتشربينه تقريبا نص عصير اناناس كي دي دي والخلطه البيضه اهي :زبده كامله 3 قيمر كي دي ديجبن فيلادلفيا الوسط او العود كيفج7 قفاش شكروتحوسين هالمقادير بالجدر على نار وسط لمن اتبقبق وعقب اتصبينه بالبايركس وتحطينه بالثلاجه لمن يتسكر عدل .. يعني فوق 3 ساعات يستحسنوااخر شي عقب مايتسكر عدل لقمطيه بالصلصه الفراوله او الكرز فرغي القوطي كله ..وذا حابه التوت على راحتج بس لان التوت اشوي مر ما استخذمه الا حق عمي لأن يحبه 🙂 جربي وقوليلي النتيجه ملاحظه : لاتستخدمين اي ماركه ثانيه غير الي كاتبتهم لان الطعم الي ابيج تذوقينه راح يختلف اذا غيرتي النوع لان مره بنت خالتي قالتلي انا سويتها بس مونفس الطعم الي انتي امسويتها انتي احلا .. ويوم سألتها اثاريها مستخدمه ماركه نستله للقيمر .

  17. طز بالرجالة كتب:

    weenech?miss u

  18. bent el deera كتب:

    الجودي وفاتو مشكووووورين وايد سويت وصفاتكم وكل وصفه أحلى من الثانيه :***** طز بالرجاله …. حبيبه قلبي انتي ما تفقدين غالي بس حاليا أنا محتاجه نقاهه نفسيه وصحيه ومادري إذا برد أو لء :*****أدعولي بس تنحل على خير والخدور اللي بجسمي يروح واتحرك مثل قبل وأحسن ألحمدالله على كل حال وكل اللي يبه ربي حلو 🙂

  19. طز بالرجالة كتب:

    اوف اوفمريضة؟اجر و عافيةو الله اني زعلت جنه وحده من اهلي مريضةالف لا باسودي لو بيدي ايي اقوم فيج و اللهامممممحطمنينا

  20. طز بالرجالة كتب:

    اكتبي لي ايميلج في تعليق عنديما راح انشره بس ابيه

  21. cheese 7cake كتب:

    ويييييييييييه يالعكس الكيكه تهبل وشكلها لذيذ بعد ؛)ترا في لج HOME WORK في مدونتي حيااااج

  22. Basees كتب:

    أنا شخصياً مايهمني الشكل إنما الطعم. يعني حتى لو ماتضبط، إذا كان طعمها جيد فلاتزال تنوكل، وكل ماتحتاجه هو بعض التعديلات في الشكل وبعض الزخرفة هنا وهناك وتصير بيرفكت وأكلها بالعافية.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s