كبه برغل مقليه …

اول شي شلونكم وشخباركم
ولهانه عليييييكم وايد

مطبخي كان بالنسبه لي ديوانيه او صاله تعرفت فيها عليكم ناس مثل العسل وكنت اتواصل فيها معاكم واحب اقول لكل من زارني اوترك لي تعليق او دزلي ايميل  او حتى فكر فيني شكرا  …. انقطاعي كان اجباري بس ان شاء الله انفض الغبار عن البلوق وهالكره ما تتكرر


نيي الحين حق الموضوع



رمضان على الباب على قوله فتافيت الله يبلغنا فيه ويعينا على  طاعته وعبادته…. وغالبا تبدي بعض الاسر بالتجهيزات عشان يخف عليهم لود المطبخ و لا يضيعون الوقت بالطبخ والنفخ ويضيعون فرصه  بركه اليوم بالطاعه والعباده

تصدقون انا احب هالتجهيز يذكرني بصغري مع امي الله يرحمها لما كنت اساعدها او اخرب عليها هههه … ولانا غالبا نكون صايمين باغلب شهر شعبان فسفرتنا المصغره بتكون  نسخه اوليه عن الاطباق اللي بنعتمدها بالشهر الفضيل

للحين ما دشيت بالموضوع هههههه

كبه البرغل… الوصفه شاميه حلبيه لبنانيه فلسطينيه..بس انا اعتقد ان كل بيت بالكويت يهتم انها تكون موجوده بسفرته….الحين احنا الكويتيات نتميز بشي وصلحولي اذا كنت غلطانه
لازم ناخذ كل شي و”نكوته”… باضافات وفناتق ما نحصلها الا بالديره هني… اذكر مثال كبه البرغل نحشينها لبنه وتبوله وساعات شاورما .. نحط بالحشوه رمان اوجزر وجني قريت وصفه فيها قشور برتقال بالعجينه وزرشك بالحشوه…  مره اذكر اكلت كبه تينن كانت حاطه بالحشوه حمسه مشروم وجبن ذايب ومعاها صلصه مثل البشاميل ..وهم مره اكلت كبه برغل حمره تشوق لان عاجنينها مع شمندر والاضافات لا تعد ولا تحصى

انا كنت ذاكره الطريقه الاصليه من فتره وتلقونها بالبلوق …. هالمره بذكر طريقه ثانيه  واي اضافه تحبونها تقدرون تزيدون عليها
الجريش ضفته عشان لا تتبطل الكبه بالقلي والسميد عشان القرمشه… انا ماحبها تقرمش بزياده واذا تحبونها زيدو السميد جم قفشه (( هالنصيحه اخذتها من اختي وحبيبتي منى صابوني من موقعها لقمه )) 

الحين الحشوه اللي بذكرها تيننن لذيييييييذه وناطعه … اخذتها من المبدعه ارتوس من منتدى شامواه  واذا تبون الرابط تحصلونه هني بس في ملاحظات احب اذكرها ..استحملوني لان المقدمه طولت بس هالملاحظات مهمه

  • البرغل عصروه زين بعد النقع والهبر لازم ما تكون فيه ولا نتفه دهن

  • لازم ولازم تعجنون البرغل مع الهبر زيييين اخذو راحتكم مو اقل من 10 دقايق بليز

  • بردو العجينه عشان لا تاذيكم بالتشكيل… اذا مستعيلين عليها بتلزق بيدكم

  • الماي المثلج صديقكم في تشكيل الكبه … لازم يكون باااارد وهو بيكون الاسعافات الاوليه حق كل مشاكل الكبه بس مو تخلونها تشرخ ماي

  • قد الامكان خلو جدار الكبه رقيق ..بتسالوني ليش؟؟… عشان تقرمش اكثر وعشان تحشونها من الحشوه اللذيذه اكثر وعشان تستوي على النار اسرع

  • بالقلاي حطو قفشه صغيره نشا  بالزيت عشان ما تتبطل الكبه ولا تحطون الكبه الا بعد ما تتاكدون ان النار حاميه ولا تحطون اكثر من 4-5 كبب بالمره الوحده

  • اي مقدار ما تلاقونه عندكم او ما تحبونه تقدرون تشيلونه بعجينه الكبه اهم شي يكون عندكم برغل وبصل ولحم هبر وحتى النسب تقدرون تخلونها على هواكم

الحين نبتدي بالمقادير بس بالاول شوفو شكل كبتي بعد القلي


اذا تحبونها شقره الغوا البرغل الاسمر وخلو الكميه كلها برغل اصفر… الكميه عطتني 60 كبه من هالحجم… طول وانا اسوي هالكبه كانت الغاليه طز بالرجاله على بالي  كنت اتمنى اوصل لها لاني ادري انها تحب الكبب … هالكبه حلوه سووها وبتدعون لي ان شاء الله

المقادير:
200 غ برغل اصفر ناعم
50 غ برغل اسمر ناعم
100غ جريش ناعم
200-250 غ لحم هبر عجل
حبه صغيره بصل
نص قفشه كبيره ملح
ربع قفشه صغيره حبق ناعم او ريحان ناعم
رشه مرقدوش ناعم
ربع قفشه صغيره بهار كبه من سمراء عدن
ربع قفشه صغيره دارسين
رشه سماق
رشه فلفل اسود
رشه كمون
3 قفاش كبيره سميد خشن
ثلج
ماي مثلج


الحشوه:
حبتين بصل كبار مفروم
نص كيلو لحم مفروم خشن
قفشه كبيره كمون ( انا حطيت اقل )
نص قفشه كبيره دارسين
نص قفشه صغيره هيل
نص قفشه صغيره فلفل اسود واذا تحبون زيدو
ربع قفشه صغيره بهار كبه من سمراء عدن
قفشتين كبار سماق( وهذي من عندي بس تعطي طعم حموضه لذيذ )
ملح حسب الرغبه
كوب صنوبر( انا خلطت صنوبر مع جوز مفروم خشن )
زيت او سمنه
وزيت للقلي


الطريقة:

نغسل البرغل ونصفيه من الشوائب وننقعه حوالي ربع ساعه لي نص ساعه مع الجريش الناعم وبعدين نصفيه زين ونعصر السوائل المتبقيه فيه

ناخذ الهبر ونفرمه ناعم ( واذا عندكم خلاط حطوه مع حبه ثلج وخلوه يصير ناعم مثل المرهم )

نفرم البرغل والجريش مرتين على الفرامه مع البصل  ونخلطه مع الهبر الناعم ونضيف له السميد و بهار الكبه والفلفل الاسود والدارسين والحبق والمرقدوش الملح والكمون  ونرد نفرمهم مره ثانيه  واذا حستوها ناشفه وملزقه ضيفو لها جم حبه ثلج بالفرامه ونعجنهم عدل وبعدين نبرده بالثلاجه


نسوي الحشوه : بدايه نحمر البصل بسمن او زيت مثل ما تحبون وبعدين نضيف له اللحم مع البهارات لين يستوي
نحمص الصنوبر ونضيفه فوق حشوه اللحم مع الجوز ونسكر على النار وننطره لين يبرد

انا ما ذكرت اصور الا باخر دفعه تقريبا




بعد ما تبرد الكبه ناخذ جزء منها ونشكلها بالطريقه العاديه .. تقدرون تسونها بالحجم العادي او الحجم المتوسط نفس اللي سويته او الميني وبعد ما نشكلها نمسح عليها بالماي المثلج عشان تاخذ الشكل المرغوب وما تتشقق طبعا مع التعب قمت اسوي اي شي… وبعدها ثلجوها واقلوها بالف عافيه


اذا عندكم قوالب الكب كيك الصغار غلفوها بورق نايلون ورقو العجينه داخلها وثلجوها وبعدين اقلوها واحشوها باي شي تطلع حلوه انا ما زاد عندي عجينه فما سويتها
Advertisements

8 Comments اضافة لك

  1. ChuBBy-Doll كتب:

    Glad ur back posting again …thnx 4 the recipe

  2. bent el deera كتب:

    ChuBBy-Doll*************مشكوره سويتي وحياج الله دوم :>

  3. طز بالرجالة كتب:

    الحمدلله على السلامةمكانج شكبرهالله يرحم الوالدة ان شاء الله و يغمد روحها الجنة يا ربالله يعطيج العافيه

  4. bent el deera كتب:

    طز بالرجالة*************sweeeeeeeeeeeety thank u waid :*****

  5. ri7ana كتب:

    ولكم باككنت اتابع مدونتج من بعيد لي بعيد خوش كبب وانا احبها باللبن :)عسى ايدياتج ماتمسهم النار

  6. bent el deera كتب:

    ri7ana *********مشكوووره حبيبتي :>انا بعد احب الكبب وكبه بلبن نوعي المفضل :>تصدقين انا احب سوالف الفناتق بالكبب بس ابوي الله يطول بعمره ما يحب فاضطر اسوي الطرق التقليديه وعند التقديم العب فيهم شوي ههه :>

  7. إيمان صالح كتب:

    بسم الله ما شاء الله عليكي معدله وشاطره وروحك حلوه كتير،ربنا يعطيكي الصحه والعافية ولا يحرمني من رسائلك أتمنى أن نتواصل وكل التوفيق أتمناه لك يا عزيزتي ..فلسطينية محبه للكويت

    1. bent el deera كتب:

      حبيبتي مشكوره للكلام الطيب وانا افتخر فيج واتشرف بمتابعتج :***

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s