كبه بطاط …

 انا عاده بحشوه كبه البطاط احمس بصل ولحم وملح وفلفل اسود وبهار ومرات اضيف ماجي واخر شي اضيف اما كرفس مفروم او بقدونس مفروم بس هالمره حشيتها من الحشوه اللذيذه مالت الكبه وطلعت تينن… مثل ما قلت لكم انا بحط الوصه الاساسيه اي اضافات تحبونها تقدرون تضيفونها .. اذا تحبونها حمره شوي تقدرون تضيفون قفشه كبيره معجون طماط وتقدرون تضيفون الوان اكل وتقدرون تزيدون بهارات او انواع جبن مبروشه مع البطاط او خضار مثل الشبنت  …. الحشوه تقدرون تغيرون فيها كثر ما تحبون وجربو حشوه المشروم اعتقد اني ذاكرتها بموضوع تجهيزات رمضان

الحين كميه العيش على حسب نوع البطاط .. في انواع ما تحتاج اضافات عشان تتشكل  فاحسن شي  ازهب المقدار واضيف بالتدريج ليما احسها اوكي

انا متعمده ما اضيف بهارات بعجينه البطاط واللي تحب تقدر تضيف ماجي او كاري او اي نوع بهارات … زادت عندي من العجينه فحشيتها جين تشيدر… للاسف ما صورت كبه البطاط بالجبن بعد القلي بس اتوقع شكلها بيكون واضح

حق كبه البطاط  هالكميه بتعطيكم بحدود 25 كبه و تحتاج :

3-4 اكواب بطاط مقطع مكعبات ( انا سويت بطاطتين جمبو )

3/4 كوب عيش

ربع قفشه صغيره كركم

ملح وفلفل اسود حسب الرغبه

بيض

بقسماط

الحشوه ذكرتها في موضوع كبه البرغل بس من غير سماق

الطريقه:

نسلق البطاط  بماي مغلي مملح  لين يستوي

نفس الشي نسلق العيش 4 دقايق بماي مغلي مملح ونضيف له كركم

نفرمهم بالفرامه مرتين ونعجنهم مع فلفل اسود ونتركهم بالثلاجه لين يبردون عدل

وبعد ما تبرد نشكلها ونحشيها بالشكل المرغوب  وبين فتره وفتره مسحو ايدكم بزيت او ماي مثلج عشان لا تلزق

غلفوها بالبيض ( خلطو معاه فلفل اسود عن الزفر ) والبقسماط وثلجوها وبعدين اقولها  وبالف عافيه

الإعلان