basic 101 · burgers · السندويشات · اطباق رئيسية · اطباق رئيسية- لحوم

احلى وصفه برغر …

 


تذكرون قبل فتره قلت لكم اني قاعده ادور احلى وصفه برغر… برايي هذي وصفه البرغر اللي كنت ادورها لاني  بعد ما نزلت الموضوع جربت 4 وصفات برغر وكلهم حلوين بس ولا وحده نفس هذي… للافاده تقدرون ترجعون حق الملاحظات اللي كتبتها في موضوع البرغر القديم

الوصفه اخذتها من عبير الراشد قللت مقدار البصل وزدتها ليكود سموك وبودره خردل ورشه اوريغانو وزدت كميه البقسماط وطلعت تينن

طبعا خلو هالمقادير الاساس وتقدرون تزيدونها باللي تحبون انا سويتها دبل تشيز برغر .. تقدرون تحشونها مشروم او جبن او بيكن مفروم او اي نوع خضار … تقدرون تزيدونها اعشاب او هالبينو او كتشاب او معجون طماط او اي شي تحبونه الخطوات تلقونها بهاللينك
المقادير:
500 غرام  لحم بقري مفروم
1-2 بصل مفروم حسب حجم البصله
ربع كوب بقسماط  ضيفو نص الكميه في البدايه وضيفو الباجي بالتدريج لين يتماسك
1 بيضه صغيره
1 قفشه كبير وسترشايرصوص
نص قفشه صغيره ليكود سموك
ربع قفشه صغيره بودره مسترد
ربع قفشه صغيره اوريغانو
ربع قفشه صغيرة ملح
ربع قفشه صغيره فلفل اسود
 زيت لقلي البصل

الطريقه:
 نحمس البصل بالزيت لين يذبل ويتغير لونه وبعدين نحطه بمشخل عشان ينزل الزيت ويكون ناشف
بالخلاط الكهربائي نضيف البصل والملح والفلفل الاسود ونوعين الصلصه والمسترد والبيضه والبقسماط نخلطه بالاول وبعدين نضيف اللحم ونخلطهم كلهم لين يتمازجون
نرد نعجنه باليد  شوي  ونضيف باجي البقسماط  حسب الحاجه ( حطو ببالكم ان كل ما زادت كميه البقسماط صارت اللحمه انشف بعد الشوي وان اللحم مالازم يكون جامد نفس الكفته وتقدرون تزيدونه قفشتين او 3 ماي عشان يخفف السمك او تزيدون بيضه صغيره )
نشكلها حسب الرغبه اما بجهاز البرغر او باليد بس اذا بستونها بايدكم حاولو يكون الوسط اخف سمك من الاطراف عشان لا تتقلص عند الشوي

تقدرون تشونها على طول او تثلجونها وبعدين تشونها
بهالوصفه وهي بمقلاه ضفت لها نوعين جبن تشيدر اصفر وخليتها تذوب
حمصت ويه الخبزه بنفس المقلاه عشان تمتص النكهه اللي نزلت من البرغر وبعدين مسحت كل ويه بمايوتشب وحطيت خس والبرغر وشرايح بصل ابيض وسكرتها واكلوها مع سلطه او بطاط مقلي وبالف عافيه
Advertisements

17 thoughts on “احلى وصفه برغر …

  1. ماشالله شغلج حده اينن ممكن سؤال عن البرغر انا بسوي ميني برغر حق حفله بس كميه ووودي اسوي طريقتج بس شنو مقياس اللحم شقول حق اللحام سيرليون وريب اي عدل بس شكثر ؟؟؟ ماعرف واقوله يفرمه مرتين وليكود سموم وين احصله ؟

  2. عاد امس كنت حدي مشتهيه برجر لي الساعه 10 بليل هههههههههه جان طرشتيلي :qتسلم ايدج وبالعافيه ومنكم نستفيد

  3. اولا : اللوك عجيييب وثانيا : البيرجر شكلها اعجب .. واي جان زين اتسووين وتبيعين .. عيزانه اطبخ .. اشرايج بالمشروع 🙂

  4. تسلم هالاياديانا مستانسه انج نشيطه هلالايامعسى دوم ان شاء اللهاموووووح

  5. ماشاءالله عاد انا مو حيل عاللحم شوقتيني عالبرجر ماشاءاللهزين بسألج من وين تاخذين اللحم ويفضل لحم غنم ولا بقر يكرم السامع لان احس لحم الغنم فيه نكهه وانا ما اثق بالمحلات الكبيره تبيع اللحوم احس مش ولا بد :)ادري انا وايد قرقه بس احب الطبخ

  6. Aisha
    ******
    حبيبتي مشكوووره :*
    اذا بتسوين كميه تقدرين تدبلين المقدار وتسوينه وتثلجينه قبل الحفله بيوم وتشوينه عادي مرح ياخذ وقت ان شاء الله
    هالوصفه ما تحتاج قطعه لحم معينه وعشان جذي احبها تقدرين تاخذين اي لحم عجل او بقر مفروم ناعم بس تاكدي انه مو خالي من الدسم عشان يمسك لج بالمكونات الثانيه ويكون جوسي
    وهم ما تحتاجين تفرمينه مرتين لانج بتردينه بالخلاط مع المكونات الثانيه فبينفرم مره ثانيه
    كل اللي عليج تقولينه للحام انه يغسل اللحمه قبل الفرم لان غسلها بعد الفرم بيخليها ما تتماسك معاج الليكود سموك تحصلينه بمركز سلطان شرق بس اذا ما حصلتيه مو ضروري

  7. fatto
    ******
    حببيتي مشكووووره… مسويه لوك يديد حق رمضان ههههه
    وانا فاااااشله بالمشاريع… بس متى ما حبيتي دزيلي عنوانج على ايميلي ويوصلج برسم الخدمه :>

  8. ri7ana
    *******
    هالوصفه انا استخدمت فيها بقر
    وغالبا اخذه عجل صغير لحمه يكون اترف
    الغنم مثل ما قلتي له نكهه وريحته قويه افضلها بالاكلات الشعبيه اكثر اللحم المفروم اخذه طازج من ملحمه الهدى بجمعيه بيان او ملحمه بينار بالشويخ او من لولو ماركت او من ملحمه الطهاره ببنيد القار وشغلهم الحمدالله نظيف اذا ما تحبين تاخذينه جاهز تقدرين تاخذين لحم من الكتف والخاصره وتفرمينهم بالبيت بس لا تشيلين كل الدهن
    ولا تتاسفين كلش حياج الله حبيبتي بكل وقت انتي واستفساراتج

  9. بعد جبدي والله تسلمين .. بس على شرط انا الي اييج مو انتي 🙂 اتفقنه :)) خلاص اشوفلي اكله من اكلاتج القتاله .. وبينه اتصال انشاءالله 🙂

  10. تسلم ايدييييييينك تدرين اني كل ماسويته والله ما انساك ادعيلك صرت مشهوره بهالبرجر وكل من عطيته الطريقه
    اوصيه يدعيلك ماشاالله اكثر من راااااااااااااااااااااااائع وعلى قولتك تررررف.
    وكل ماشفت بهار اسناد متبل حار مايطري على بالي الا انتي ودي ارسلك منه كرتون اذا تبينه تااااامرين لا يردك الا لسانك او حتى اي شي من السعوديه اماااانه معك .

    1. حبييييييتي ويعله هني وعافيه على قلبج ….ما تخيلين تعليقج شكثر اسعدني …شكرا شكرا شكرا من القلب :******

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s