قوزي لحم يم يم يم ..

كنت متخيله ان القوزي شي كبير وصعب .. كنت متخيله اني لازم اطبخ خروف كامل ويبيلي جدر حسينيه … لما شفت برنامج مطبخ هنوف اكتشفت ان القوزي = مجبوس لحم … انا اصريت على  تسميته قوزي لان طريقتي بالمجبوس مختلفه وحتى الحشو مال المجبوس مختلف
انا استخدمت لحم فخذ صافي مقطع قطع كبيره مثل ما تشوفون عشان يكون اسهل بالتوزيع وجد جد جد طلع خنيييييين ويهبل ويرفع الراس
المقادير كلها على النظر بس نصيحتي.. اخذو عيش عدل .. واستخدمو زعفران عدل.. وكثرو البهار العدل بسلق اللحم واذا صارت نكهته ثقيله على ذوقكم تقدرون تخففون المروق بالماي

امس ابوي الله يطولي بعمره مسوي عزيمه حق عيال اخوانه والسفره كانت كلها حلوة بس ما قدرت اصور الا القوزي … وتبون الصج كان نجم بالسفره ههههه (( يا كثر ما مدحت هههه ))
 بحط لكم الخطوات بالتفصيل بالكتابه واذا سويته مره ثانيه انزل لكم الصور التفصيليه

المقادير :
بهارات عدله ( كزبر و فلفل اسود و مسمار وهيل ودارسين وحبه حلوه وهيل حبش و بهار والميس وورق غار وكمون  وخلطته مع خيوط عصفر ) 
زعفران منقع بماي حار اول شي واذا طلع لونه نزيده ماي ورد
هيل ناعم
كركم
زنجبيل فرش
بهار مجبوس ناعم ( من سمراء عدن )
دارسين ناعم
مكسرات حسب الرغبه ( صنوبر وكاجو و لوز انصاف و فستق شرايح )
كشمش اصفر
بصل مفروم بكمية كبيره حق الحشو وحق العيش
 عيش منقوع لمده ساعتين من ماي الحنفيه
لحم غنم مقطع حسب الرغبه ( انا اخذته هبر عشان يستوي اسرع وعشان بالتقديم شكله احلى بس تقدرون تستخدمون قطعيه كامله )
زبده
وطبعا ملح خشن


الطريقة :
ناخذ اللحم ونضيف عليه البهارات العدله والناعمه وماي ونخليه بجدر الضغط لين يستوي .. او تقدرون بنص مده السوي تضيفون ملح بس انا ابوي يحبه جذي
على ما يستوي اللحم نحمر المقله او الجدر ونحط عليها البصل ونحركه لين يذب وكل ما يلزق بالجدر نضيف ماي لين تطلع منه ريحته ويتغير لونه بعدين نضيف الزيت و الدارسين الناعم والهيل الناعم والملح وبهار الحشو او اللومي والكشمش وتقلبه قلبتين ونسكر النار عليه (( اذا تحبون تضيفون ماي ورد هم ممكن ))
تقلي المكسرات كل بروحه لين تشقر وبعدين نشيلها على طول لانها بتاخذ لون زياده بعد ما نشيلها
بعد ما يستوي اللحم نملح المروق ونشخله من البهارات ونخليه على كتر
ناخذ اللحم ونرشه بدارسين وماي ورد وزعفران وشوي هيل و نحط فوقه قطع زبده ونخلي شوي من مروق اللحم بقاع صينيه الفرن وندخلها الفرن لين تتحمش وتاخذ لون
نحمس البصل مع الكركم ونضيف عليه العيش ونقلبه شوي وبعدين نضيف المروق لين يغطي العيش بس مو وايد .. نحليه على نار عاليه لين يتشرب الماي وبعدين نوطي عليه تقدرون تضيفون جم حبه زبده صغيره على الويه او تخلونه من غير دهن وبعدين ترشونه بماي ورد والزعفران والهيل الناعم … نحط شوي مكسرات على ويه الجدر ونخلي الباجي حق التقديم وهم تقدرون تحطون البيض المفيوح و اللحم عشان ياخذ ريحه من الجدر  وتخلونه لين يتسكر العيش عدل وبعدين قدموه وزينوه بالحشو مع المكسرات والبيض المفيوح واللحم وبالف الف عافيه

Advertisements

10 Comments اضافة لك

  1. طز بالرجالة كتب:

    تسلم الايادياموح

  2. Anonymous كتب:

    حبيت اعلق علي البض نقليه بالدهن راح يكون لونه ذهبي وطعمه الذ

  3. ri7ana كتب:

    ماشاء الله تسلم ايدج شكله يشوق وريحته خنينه

  4. الوتيــــــــــن كتب:

    ماتوقعتها بهالسهولة *_* تسلم ايدج لزومن انبلغ الشيخ .. بجربها باجر باذن الله :*

  5. bent el deera كتب:

    طز بالرجالة*************الله يسلمج يالعزيزه والغاليه :>فقدناج …شلون صيامج في ربوع الفرنجه ؟وعساني ما انحرم من هالطله :****

  6. bent el deera كتب:

    غير معرف **********مشكوووره على الاضافه القيمه وان شاء الله بطبقها المره اليايه :>حياج الله :>

  7. bent el deera كتب:

    ri7ana*******الله يسلمج حبيبتي ومشكووروه :>عاد جربيه وان شاء الله يعجبج صج :>

  8. bent el deera كتب:

    الوتيــــــــــن*******************وي كنت نفسج من احد يقولي قوزي اتنافض عبالي شي يبيله سهر ايام وليالي ههههههههههالله يسلمج حبيبتيبلغي الشيخ وجربيه وان شاء الله يكون على ذوقج :>حياج الله يالغلا

  9. Anonymous كتب:

    شنو بهار الميس ؟ شلون شكله ؟؟؟

  10. bent el deera كتب:

    غير معرف***********بهار الميس اهو القشرة اللي تغلف جوزة الطيب تلقينه ينباع مجفف بقسم البهارات و بكل البهارات العدلة الخاصة بالبريانيتلقين صورته بهاللينكhttp://www.savoryspiceshop.com/images/mace.jpg

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s