basic 101 · مشروم او الفطر او عش الغراب · المقبلات والاطباق الجانبيه · اطباق رئيسية- لحوم

شلون اسوي احلى ستيك ويكون جوسي مو ناشف؟


 هالسؤال فر مخي على ما لقيت له اجابه…. الستيك اللي اسويه الحين ناتج معادلات وتجارب كثيره .. بالنهايه مع المحاولات والتكرار والفشل لقيت الصيغه او المعادلة المناسبة… هالبوست اهداء للغاليه فلانه لانها تدور جواب حق هالسؤال :>

اللي يخلي الستيك ناشف وصعب المضغ 3 اشياء … واذا عندكم ملاحظات او اضافات بليييز كتبوها بالكومنت وانا رح ارد وارفعها بالموضوع الاصلي عشان تعم الفايده
  •  قطعيه الستيك اللي تاخذونها … كل ناس يحبون قطعه ستيك شكل بس هم كل قطعه ستيك لها طريقه شوي مختلفه… في اماكن الله يهداهم كل قطعه هبر مدوره سموها ستيك ومو هذا اللي تلقونه بالمطاعم بالاضافه الى ان قطعه الهبر الخاليه ( الا اذا كانت تندرليون )  تكون اكثرهم صعوبه بالشوي ومرح تكون تيستي  فانصحكم تاخذونها من اماكن عدله حتى لو يكون سعرها اعلى… الحين بالستيك نفسها اللي سمكها ضعيف ما انصح تنحط بالفرن لانها بتقسى اذا تحبونها مقليه  يا تقلونها بشويه زبده …يا تطقونها بالمطرقه و وتبهرونها وتغلفونها  ببيض وبقسماط او تغمسونها بلبن وبعدين طحين مع بهارات وتقلونها (( جربو طريقه بولا دين كنتري فرايد ستيك وايد حلوه او شوفو طريقه البفتيك موجوده ببلوقي )) او تسونها شرايح وتصير لكم بيف ستراغونوف او شاينيز او غيرها (( تقدون تشوفون طريقه الشاورما او ساندويش فيلي تشيز ستيك موجوده ببلوقي)) …او تسونها صينيه وتضيفون لها صلصات عشان لا تنشف عندكم (( جربو طريقه الستيك المشروم موجوده ببلوقي وايد لذيذه حق هالنوعيه))….واذا بتشونها ( مع اني ما انصح ) تشونها على شوايه حاره دقيقتين على كل ويه او اكثر حسب السمك ..
اذا ودكم بقطعه ستيك متينه وتبونها ول دن… تبلوها وغلفوها وحطوها بالفرن لانكم اذا بتشونها بالشوايه بتسود ويهها ومن داخل مو مستويه

واذا تبونها على الشوايه دورو القطعيات اللي تكون  فيها شحم لان الدهن اللي يخليها طريه وما تنشف بالشوي وتقدرون تحطون قطعه زبده على ويه الستيك وهو ينشوي يعطيها طعم وايد حلو وهالحركه دوم استخدمها
  •  الستيك  لازم ما ينشوي  اكثر من اللازم…  الستيك يعطي نتيجه افضل اذا ما كان بارد … يعني تبلوه وخلوه بدرجه حراره الغرفه قبل الشوي …ومو لازم الستيك يتكون قشره سوده من كثر الشوي وكل دقيقه ينقلب  اللي يمشي على البرغر يمشي عليه  … خلو الشوايه حاميه في البدايه عشان يطلع مارك الخطوط وبعدين قللوها شوي  بس لا تخلون النار خفيفه عشان لا تطلع العصارات من اللحمه
والتقليب الزايد اكبر غلط ولا تضغطونها بظهر القفشه هالحركه تخليها تنزل كل العصارات اللذيذه اللي فيها … حطوها وخلوها جم دقيقه وبعدين قلبوها على الويه الثاني …. انصحكم بشده اذا كنتو من النوع اللي يحب الستيك انكم تشترون شوايه حديد ثقيله ( حديد زهر ) صراحه شوايتي من شريتها ما فشلتني تعطيني النتيجه اللي ابيها .. تحصلونها بايكيا و المبروك  وهي تنحط على شعله الغاز عادي

انا جربت المقالي العاديه من تيفال وغيره اللي تكون مخططه  وما عجبتني النتيجه احس انها تصلح حق شوي الربيان اكثر 

واذا ما تبون تقدمون الستيك على طول … قللو وقت الشوي وحطوه بقصدير وسكروه 10 دقايق وهو رح يكمل سواه لي الدرجه المطلوبه ورح يكون اطرى عند التقطيع

  • النقطه الاخيره  التتبيل…. تبلو القطعه مثل ما تحبون ولا تخافون من انكم تجربون اشياء يديده  والاعشاب العطريه مع الستيك تعطي نكهه وايد حلوة.. اذكر حطيت سفن اب مره  وكانت النتيجه وايد حلوة و تطري اللحم …الملح يعرد اللحم فحاولو تحطونه قبل الشوي …. الخل ما انصح فيه  اذا بتبل اللحم  بفتره طويله اوقبل بيوم لان الحمض اللي فيه يطبخ اللحم … مطريات اللحم تقدرون تضيفونها وتعطي نتيجه… بذور البابايا عجيبه تطري اللحم عدل  بس لانها مو متوفره طول الوقت ماقدر استخدمها دايم 

واخر شي اقولكم  حتى لو ما كان الستيك بيرفكت الاضافات اللي معاه تغطي عليه… حطو يمه خضار وغطوه بصلصه سواء جاهزة او انتو مسوينها مع بطاط مهروس  وسلطه خاصه لما تكون سيزر ههههه وبتطلع لكم الذ وليمه ان شاء الله
عليكم بالعافيه مقدما واجازة نهايه اسبوع سعيده :*

Advertisements

7 thoughts on “شلون اسوي احلى ستيك ويكون جوسي مو ناشف؟

  1. لألألأجد جد ادمنت مدونتج :)اتصدقين انا اخاف من الستيك ..ما اجربه ولا اسوي فيه ولا شيلان بكل بساكه تجاربي فاااااشله معاه .. حتى طباختنا مو داايم يضبط معاها ..شكرا من اعماق قلبي ..لي فضيت بجربها ^_^

  2. هلا وغلا بنت الديرهانا ماتفق معاج من ناحيه الخلالخل الابيض وايد زين يطري اللحم ويخليه سهل بالمضغ بس مايتنقع فيه فتره طويله يعني بو نص ساعه وراح تشوفين الزفره والزنخه تطلع من اللحم جربي مره بالخل وراح تدعيلي 🙂

  3. العاب*******شكرا وحياج حياك الله :>وشكرا للتشجيع :>~حَدِيـثُ الفَـجْـر~****************كنت نفسج وايد كنت اخاف منه بس لا حياة مع الياس ولا ياس مع الحياه قلت بتعلم يعني اتعلم هههههه :>حبيبتي والله :> ان شاء الله متى ما فضيتي تجربينه ويعجبج ان شاء الله :>شروق****حياج الله عزيزتي شروق… ملاحظتج في محلها وانا وياج اشوف الخل وايد حلو بالتتبيله بس يمكن ما وضحتها عدل… انا ما افضل احطه بالتتبيلات اللي تتطلب تتبيل من الليل لي ثاني يوم احسه ينشف اللحمه مادري شلوناشوه انج نبهتيني ان جملتي ممكن ما تنفهم عدل … ان شاء الله اعدلها الحين مشكوووره … وربي يعطيج كل اللي تمنينه ويسخر لج عباده :>Hanan whatever***************الله يعافيج حبيبتي :>

  4. حبييييبتي والله انتي ..ماعرف كيف اشكرج ..صدق صدق اسعدتييني ..واحرجتييني بكرمج هذا ..فديتج والله ..بجربه وبقولج باخر الاخبار والعلووم ..الله يعطيج العافيه خيتوو ..

  5. flaanh*******حبيبتي تستاهلني كل خير بالعكس انا احب افيد باللي اقدر عليه :>اتمنى نصايحي تفيدج وتسوين الذ ستيك تحبينه :>

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s