الزعتر .. او دقه الزعتر بالزيت ( 3 وصفات منها الزعتر الحلبي والفلسطيني )

دقه زعتر
شلون نسوي الزعتر البيتي ؟؟؟
ما كنت متخيله ان الزعتر بيكون بهالسهوله… وطعم الزعتر البيتي لذيييذ بشكل مو طبيعي وريحته تشيل المطبخ كله وفوق هذا نظيييف وما في الاعواد والاشياء اللي تسبح بالزيت ومالها علاقه بالزعتر
انا احب الزعتر الفلسطيني .. اللي يكون مر شوي ونكهه الكراويه ظاهره فيه … كميه السماق والكزبره تعود على الرغبه وعلى حسب نوع الزعتر الاخضر نفسه انا بذكر كميه تقريبيه وانتو ذوقو وزيدو على هواكم …تقدرون تلغون الكروايه او تبدلونها بيانسون او تلغون اي شي ما تحبونه .. تقدرون تبدلون القمح بالنخي الصغار المحمص ( قضامه ) وفي ناس تحط ورق عنب مجفف مع الخلطه عشان الحموضه وفي ناس تحط ملح الليمون يعني بالاول والنهايه كله حسب الذوق
الزعتر الاخضر الحين مو موسمه بس الاحسن انكم تشترونه وتنظفونه وتجففونه بالبيت ريحته بتكون اقوى من المجفف الجاهز … الطريقه اخذتها من ام ناصر وعدلت عليها حسب هواي وطلع الزعتر يهبللللل غير شكل
بسم الله نبتدي: (( الكميه كبيره ))
  • ربع كيلو زعتر ناشف ومنظف … نطحنها بيدنا اول شي عشان نتاكد ان ما فيها اعواد صغيره وبعدين نطحنها بمالت البهارات ونخليها على جنب
  • ناخذ ربع- نصف كوب كزبره ناعمه ( الافضل انج تاخذين كزبره عدله وتحمصينها لين تطلع ريحتها وتحطنينها وتاخذين منها الكميه ) ونخلطه معاهم
  • نحمص كوب او كوب ونص قمح لين يتقلب لونه بني فاتح وبعدين نطحنه وناخذ منه مقدار  ( الطحين يثقل الزعتر ويخفف المروره اللي فيه ) ونخلطه معاهم … واذا بتستخدمون النخي الصغار حطو ربع كيلو نفس كميه الزعتر
  • نحط قفشتين كبار ملح
  • وبطرف القفشه ملح ليمون 
  • وقفشه كراويه مطحونه
  • ناخذ 200 غرام سمسم 
  • و200 غرام سماق ونخلطه معاهم

 

انتو هني ذوقو عشان تعرفون شنو تبون زياده

المروره .. زعتر
حامضه … ملح الليمون والسماق
ثقل … طحين  قمح او نخي ناعم
الكزبره والكراويه  وهم تقدرون تضيفون كمون عشان تعادل النكهات وتعطيها طعم مميز … خلطو المقادير من غيرها وذوقوها واذا عجبتكم لا تضيفونها بس انا احسها تعطي نكهه مميزه فاضيفها وتقدرون تخلطون مع الزعتر شوي ميرميه او مرقدوش هم تعطيها نكهه مميزه
اخر شي نزيده نص كوب زيت زيتون ونفركه بيدنا عشان لونه يصير اخضر زاهي مثل الصوره وحطوه بعلبه واستخدموه وقت اللي تحبون 🙂
زعتر حلبي وزعتر عادي
في طريقه ثانيه وهم وايد حلوة اخذتها من عالم حواء ….. زعتر اخضر
150 جم زعتر ورق ناشف(3 أكواب بعد الطحن)
ثلث كوب نخي مطحون
ثلث كوب قمح مطحون
ربع  كوب سماق
نصف كوب زيت زيتون
2 م ك او اكثر من الملح
وقفشه صغيره ملح ليمون
ونص كوب سمسم محمص
ونتبع نفس الخطوات وهالخلطه تلقون صورته موجوده يم الزعتر الحلبي الاحمر

بالنسبه للزعتر الحلبي فهو زعتر نكهته فاخرة جدا … وبسبب خلط انواع بهارات كبيره معاه لونه يميل الى اللون الاحمر… من اول ما ذقته حبيته … الوصفه اخذتها من موقع لقمه بس لغيت البطم لاني مادري شنو اهو وضفت بداله فستق حلبي مطحون

الطريقه :
200 غ سماق
100 غ قضامه او طحين قمح
100 غ زعتر اخضر ناشف
قفشه كبيره كزبره
قفشه كبيره ينسون
قفشه كبيره كمون
قفشه كبيره فستق حلبي
200-220 سمسم ( حمصيه بالبيت افضل )… انا ما كان عندي كميه سمسم فقللت المقدار بالوصفه
قفشه كبيره ملح
شويه ملح ليمون

الطريقه:
نحمص كل المقادير مع بعض عدا الفستق والسمسم والملح
بعدين نضيف له الفستق ونطحن الكل بمطحنه البهارات لين يصيبر ناعم بودره
نضيف ملح الليمون والملح العادي والسمسم ونخلطه وبالف عافيه

23 thoughts on “الزعتر .. او دقه الزعتر بالزيت ( 3 وصفات منها الزعتر الحلبي والفلسطيني )

  1. Hanan
    ******
    الله يعافيج حبيبتي
    :>اذا تحبين السماق تقدرين تكثرين منه حسب الرغبه :&

    gt;Um il sa3af wil leef
    *********************
    مبروك للكويت كلها ومشكوووره :>ويبيله افنتق شي ازرق بهالمناسبه هههه :&

    gt;Mrs. Purple
    ************
    حياج الله حبيبتي والمدونه مدونتج ومرورج فيها يشرفني :>

  2. يقول Nelly Aly:

    موضوع فين الرائع سعيده بالانضمام الكى وفين جددك عاوزين نشوف اكلاتك الجميله

  3. يقول Mohamm3d:

    ماشاءالله عليج مره سنعه مو مثل بنات هالوقت اللهم لاحسد وتسلمين وحلوه وصفاتج وخووش زعتر اول مره ادري انه ينسوي بهالطريقه تسلمين

  4. يقول bent el deera:

    Nelly Aly*********حياج الله عزيزتي والف اهلا ومرحباان شاء الله وصفاتي الجديده قادمه :>Mohamm3d *********اخوي محمد حياك الله :>ما قلت لي شلون طلع الروغان جوش ؟؟ :>وبنات الكويت ما شاء الله عليهم وحواليهم كل شي يعرفون ؛>

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s