هالحمسه احبها وايد ولذيذه مع كل شي .. انا افضلها مع خبز ايراني حار وحليب زنجبيل على الريوق .. تقدرون تضيفونها مع لبنه او ترشون جبن موتزريلا على الويه وتنطرونه يذوب قبل التقديم
وتقدرون تمسحونه بالشابوره وتقدرون تحشون فيه فطايرواذا ضفتو لها حبه بركه بتكون احلى بس لان خواتي ما يحبونها بالاكل فخليت اضافتها حسب الرغبه وتقدرون تضيفون بودره خلاصه الدياي من كنور اذا تحبون نكهه قويه مع السبانخ وتقدرون تضيفون لها ثوم مهروس اذا تحبون بس انا ما فضلت اضيفه
نصيحه دام السبانخ الفرش متوفر بالسوق جربوها وان شاء الله بتدعون لي :>
المقادير :
3 شدات سبانخ مفرومه
بصله متوسطه مقصصه مكعبات
طماطه كبيره مقصصه مكعبات
سماق وكمون حسب الرغبه وانا حطيت نص قفشه صغيره
رشه فلفل ابيض او فلفل اسود ودارسين
زيت زيتون للطبخ وحق الويه
الطريقه:
نحمس البصل بزيت الزيتون لين يذبل ويصير تقريبا شفاف نضيف له الفلفل ونضيف جزء من السبانخ وونخلطه ولما يذبل نضيف الباجي ونضيف الكمون ونخلطه لين يتكود كله بكتله وحده ههههه وبعدين نضيف الطماط والملح و نخليه على النار لين يطرا الطماط وبعدين نقدمه ونرشه بزيت الزيتون وحبه البركه وبالف عافيه
My Kitchen 
تسلم إيدنج و الله بودرة ماجي؟! أي بودرة؟!مع إني ما احب السبانخ لكن أكو طريقة وحدة آكلها اللي إهي سبانخ ملكي مالت مطعم فتوش اللي بكيفان… ما أدري إذا مجربتها و لا لأ بس فيها رب رمان و بصل و طماط و سماق لذييييييذة!
Danderma*********الله يسلمج يالغاليه :*ذكرتيني الله يذكرج بالشهاده كنت اقصد بودره كنور واهي نفسها مكعبات الدياي بس بودر ما يحتاج تذوبينها بماي :>وصراحه سبانخ فتوش ما جربته بس ان شاء الله عقب وصفج اجربها لان شكلها يمي يمي عيل تصدقين احب سبانخ بس بسرط يكون فرش ماحب المثلج جد جد شوقتيني عليها من الصبحمشكووووره يا حلوة على المعلومه المفيده :****