فطور او ريوق · فطور رمضان و ريوق و سفرات كاملة · معجنات وفطاير · وصفات صحيه قليله السعرات او الدهون وتصلح للرجيم · انواع الخبز والصمون · خطوة بخطوة

صمون اسمر لذيذ وقليل الدهون (( تحديث ))

** التحديث باخر البوست :>

 




 

هالوصفه جدا لذيذه … طعمها خبز مو باجي عجينه الفطاير مكورينها ومسوينها صمون هههه… الحلو بهالوصفه انها قليله الدسم + مكوناتها موجوده بكل بيت + طعمها لذيذ ويحسسج بالانجاز
ولو بتقولون الصمون اشكال والوان بالسوق اقولكم طعم الصمون وهو طالع من الفرن غيير غير انج تتحكمين بالاضافات على كيفج … في بداياتي بالطبخ كنت اشوف المعجنات شي تعجيزي وصعب .. والحين قمه الوناسه لما اعجن بيدي واشوفها متخمره واشكلها و لما ينترس المطبخ ريحه الخبز وهو حار وصج احس بالفخر واستانس من خبزاتي هههه
 
هالوصفه اصلا كانت بالطحين الابيض بس طبعا خلطتها مع الاسمر عشان الفايد :>… لا تستخدمون الطحين الفاخر مع هالنوع من الخبز بس كان عندكم طحين خبز تقدرون تخلطونه معاه …. استخدمو الطحين العادي
هالوصفه اساسيه خلوها عندكم  وغيرو فيها وزيدو ونقصو مثل ما تحبون … يعني تقدرون تخلطون معاها شوفان او جنين القمح او نخاله او دخن او اي نوع من انواع الطحين :>
الزيت مو الا تستخدمون الكانولا تقدرون تستخدمون زيت الزيتون او زيت الرز او زيت الذره او اي نوع زيت 
وتقدرون تحطون معاها  بوسط العجن بذور حبوب مثل حب شمسي او حب قرع او حبوب البركه بالعجين او اعشاب مجففه او طماط مجفف او بصل مكرمل او انواع زيتون :>
تقدرون تشكلونها باي طريقه تحبون .. كور صمون طوال على عجايف اي شي وتقدرون تسوونه كله لوف واحد وبالسكين خلو حزوز بالورب من فوق عشان يطلع الهوا
 
المهم انا بعطيكم العجينه وانتو بدعو على هواكم… هالوصفه وايد منشوره بالنت ماعرفت وين مصدرها بس حطيت لكم اللينك اللي اخذت منها هالوصفه
انا شخصيا استخدمت الخميره الحبيبات لاني احبها بالعجن بس اذا بتستخدمون الخميره الفوريه خلطو الخميره والسوائل وعلى طول حطو الطحين :>
ونصيحه  سووها لان احلى شي بالبرد ريحه الخبز وهو بالفرن يم يم .. احشوها مثل ما تحبون او اكلوها ساخنه مع شوربه ثقيله وبالف عافيه :>
 
بسم الله نبتدي
المقادير تعطيكم 10-12 صمونه بحجم اصغر شوي من صمون البرغر مالت المطاحن
ووصفات الصمون الناحج معاي تحصلونه هني وهني وهني
 
المقادير:
قفشه كبيره خميره حبيبات ( او 3/4 خميره فوريه )
قفشتين كبار سكر
قفشتين كبار زيت كانولا او اي زيت نباتي
قفشه صغيره ملح
كوب ونص ماي دافي ( مو فاتر دافي )
4 اكواب طحين مخلوط اسمر وابيض بالنص او حسب الرغبه ( انا خلطت كوب طحين فاخر وكوب طحين خبز والباجي عادي )
 
 
الطريقة:
نخلط الماي مع الشكر والخميره بالعجانه ونتركه ربع ساعه لين يبقبق ههههه وبعدين نضيف الزيت
 
وبعدين نضيف الطحين بالتدريج نص كوب نص كوب لين ما تبتدي تتشكل  ومو الا تستخدمون كل الطحين… بالنسبه لي ما احتجت الربع الاخير هههه
 
يعني لما تصير بهالشكل وقفو و لا تكثرون الطحين اول ما تشيل روحها وقفو الطحين وخلوها تعجن .. بتلاحظون انها طريه وايد بس ما عليه بعد العجن بتمسك
 
 
 
خلوها تعجن 10 دقايق او ربع ساعه وكل ما عجنت اكثر كل ما كان احسن .. بالنسبه لي عجبنتها 10 دقايق على سرعه بطيئه والباجي على سرعه متوسطه  ولاحظو الفرق شوفو شكلها بعد العجن شلون صار
 
 ناخذها من العجانه ونعجنها بالايد شوي يعني قولو 4 مرات  بس عشان تمسك زياده … بنت اخوي حبيبتي كانت معاي والا تبيني اصور عجينتها معاي :>
 
 
نتركها تختمر بمكان دافي بطاسه مرشوشه بالسبراي او ممسوحه بشوي زيت… خذت مني تقريبا ساعه ا لا ربع
 
 شوفو شلون غطت على  عجينه بنت اخوي هههههه
 
 نشكلها على كور او اي شكل تحبونه ونخليها بصينه الفرن.. انا كنت اكورها على الرخام عشان يكون شكلها املس هههه وحطيتها على صينيه فرن مغطيتها ببيكنغ شيت او ورق خبز ممسوح بشوي زيت كانولا وغطيته هم بورق خبز ممسوح بالزيت عشان يتخمر التخمير الثاني هم خلوها تقريبا ساعه ( لان مطبخي بارد خذت مني ساعه وثلث )
 
 
بتلاحظون تضاعف الحجم  .. سخنو الفرن على درجه 180 درجه قبل لا تدخلونها
 تقدرون تخبزونها جذي او تضيفون بيض او صفار بيض مع قهوه اذا تحبونها حمره او بياض بيض مع ماي او تبون قشره خفيفه ذهبيه او حليب .. يعني حسب هواكم.. انا زينتها بسمسم  واللي لي سويتها بحبه البركه وسمسم هههه
 
 
تدخل الفرن لمده ثلث ساعه  بس انتو شيكو عليها بعد ربع ساعه افضل :>
 
 
قسموها وغطوها بفوطه عشان لا تصير يابسه  او سوو نفسي واكلوها وهي ساخنه هههه … شوفو شلون من داخل متروسه ومستويه
جربوها  وقولولي رايكم فيها وان شاء الله بتعجبكم .. وعليكم بالف عافيه مقدما :>

ياني استفسار من عزيزتي شرف من البحرين حول الفرن ولان فرني كهربائي  فغالبا ابطله من الجهتين العلويه والسفليه بس بعد استفسارها حبيت اجربه بالفرن الغاز وهذا شكل الصمون بعد ما خليته يخبز بعد ما شغلت الحراره السفليه بس :> واستخدمت الشبنت بالعجينه وما دهنت ويها باي شي  :>

 

Advertisements

8 thoughts on “صمون اسمر لذيذ وقليل الدهون (( تحديث ))

  1. انتي ابداااااااااع كالعادة ماشاء الله عليجتسلم ايدج و كل عام و انتي بألف خير :*****

  2. روووعةأحب الخبز في البيت بس مو دايم انجح.. ويصيدني احباط قوي :(سؤال..الفرن بس من تحت يشتغل؟ لو يحتاج تحمير من فوق؟ساعات لما استخدم الي فوق يصير الي اخبزه يابس!!! :(شرف من البحرين

  3. شنو هالتعذيييبذكرتيني بسالي لما تاكل الصمون بالشتا احلى مشهد رومانسي;pتسلم اييييدج

  4. شرف******لا يحوشك احباط اخوي .. الفرن يمكن يكون حار قلل الحراره شوي او انك تحطه اكثر من اللازم ويصير يابسجرب بعد ما يطلع تغطيه بفوطه او ناييلون عشان البخار نفسه يطريه ويبطل ينشف ويكون يابساناعاده ابطل الحراره بالصوبين لان فرني كهربا بس بعد ما قريت تعليقك جربت اسويه بالفرن الغاز وحطيت النار بس من تحت وهم ضبط معاي والحين بحط لك الصوره تشوفها :>ان شاء الله تسويه ويضبط معاك :>Sn3a*****اييي هالصمون يعطيج هالاحساس خبز وحساء ههههالله يعافيج يا قمره واذا تبين ما عليج الا انج تاشرين واسويلج من عيوني :>

  5. عاد أنا بالبوست اللي طاف بغيت أسأل سؤال سخيف عن المقادير بس هونتشكرا لأنج حطيتي المقادير, بس سؤالي هو:هل ممكن استخدم هالعجينة لصنع الخبز العادي, يعني افرد العجينة لاقراص وأحطها بالشواية؟بايام الغزو الوالدة كانت تعجن وتسوي لنا خبز بالتنور, بس كنت آخذ آنا شوية عجين وأحطة بشواية سب وكان يطلع لي الخبز شكله حلو ولذيذوصج كلامج, ريحة الصمون أو الخبز مافي احلى منها وقت الخبزملاحظة: الوالدة كانت تحط حبة حلوة بالعجين عشان النكهة مع تمر عشان الخبز يطلع لين وما يتغير طعمه ولا ريحته حتى لو ظل لأيام … شغل حريم اول:)شكرا

  6. بنت الديرة تراني اختج p=يعني اذا شغلت عليه بس تحت بصير اوكي؟ما احتاج حق تحمير؟عندي مشكلة في الخَبز.. ويبيلي آخذ دروس تقوية.. مع ذلك أحب أجرب.. خصوصاً لما أشوف أشيا حلوة جذي:)شرف من البحرين

  7. حسون الملعون*************اخوي مقادير الزعتر تلقاها باللينك اللي حاطته بالبوست … كنت مستخدمه نفس عجينه هنوف ومره سويت فيها البيتزا :>مشكوووووووور وايد عل ىالاضافات القيمه وخبز التمر ينن انا اموت عليه اذا ما فيها كلافه ميخالف تييب لي الوصفه من الوالده.. انا عندي جم وصفه بس احب اللي يكون فيها حبه حلوة وبركه :>بالنسبه لوصفه الصمون ما جربت احطها بالسيب بس اكو وصفه عجين مخصوص حق هالنوع من الخبز ادورها عندي وانزلها ببوست بروحه ان شاء الله :>مشكور مره ثانيه وحياك الله عندي دوووم :>شرف*****انا اسفه جدا على الغلط وحياج الله اختي :>هالصمون سهل وانا حاطه الخطوات التفصيليه اذا واجهتي اي صعوبه تقدرين تساليني هني او طريق الايميل وبحاول ارد عليج باسرع بنفس الوقت :>الفرن اذا كان من تحت بيستوي واذا كان من فوق وتحت هم بيستوي بس مع اختلاف المده طبعا :>الحين احمل الصوره تشوفين شكل الصمون بعد ما سويته بالفرن من تحت بس :>

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s