كب كيك · حلويات

كب كيك فراوله

هالوصفه رح تعجب محبين الفراوله… الكيكه فيها فراوله والفروستنغ فيه فراوله والزينه بفراوله
الوصفه مالت مارثا ستيوارت تلقونها بموقعها
انا بس شفتها اول مره  بمنتدى شمواه من زمان وقلت بسويها
 امس  لمن شفت الفراوله بمركز سلطان مسوين عليها عرض العلبه ب 195 فلس جان اشتري 7 علب و حطيت ببالي اني بجربها
الحقيقه انا ومرت اخوي قضينا 3 ساعات بالمطبخ نخلط ونخبز ونزين بهالكب كيك  يعني مرح اقولكم ان هالوصفه سريعه … بس احب اقول حق مرت اخوي حبيبتي خوخه مشكوووره وتسلم ايدج  وكانت خوش قعده بالمطبخ وياج
الوصفه تعطيكم 34 كب كيك من الحجم المتوسط… ورح تحتاجون تقريبا 4-5 علب فراوله
الشغله اللي احب اذكرها قبل  لا نبتدي…. الفروستنغ اللي رح استخدمه اسمه سويس بتركريم .. طعمه مقارب للزبده وخفيف  (( تقريبا نفس طعم الفروستنغ اللي يستخدمونه نوفمبر كومبني في الكب كيك )) وشكلها مرح يكون ناعم نفس فروستنغ الكريم شيز اللي استخدمه بكب كيك جوزالهند … اذا ما تحبون هالنوعيه تقدرون تزينونها بكريمه عاديه
بسم الله نبتدي… كل المقادير لازم تكون بحراره الغرفه
المقادير :
كوبين فراوله مقطعه مكعبات صغيره
كوبين وثلاث ارباع طحين الفاخر
نص كوب طحين كيك ( كوب وثلاث ارباع طحين فاخر وربع كوب نشا  خلطوه واخذو منه نص كوب او خلو الكميه كلها طحين فاخر )
 م ص ملح
م ك بيكنغ بودر
200 غ زبده ( حبتين زبده )
كوب حليب
كوبين وربع سكر
3 بيضات
  بياض  بيضه وحده
1 ونص م ص فانيلا سائله
مقادير الفروستنغ ( سويس بتركريم )
4 بياض بيض
كوب وربع سكر 
300 غ زبده مقطعه مكعبات
عود ونص من حبوب الفانيلا ( اختياري)
ورح نحتاج كوب ونص فراوله مقطعه مكعبات صغيره او مهروسه كيفكم
ونقطتين لون احمر ( اختياري)
الطريقه:
اول شي نسوي الكيك… نشغل الفرن على حراره  180 درجه ونخلط الطحين والبيكنغ بودر والملح  ونتركه
نخلط الشكر مع الزبده والفانيلا لين تصير مثل الكريما وبعدين نضيف له البيض والبياض بالتدريج
وعلى سرعه منخفضه نضيف ثلث كميه الطحين ونص الحليب واذا اختلطو نعيد الكره مره ثانيه ونتنهي بالطحين
نسكره ونحط قطع الفراوله ونخلطهم كلهم ونصبهم في قوالب البليسيه في قاعده الكب كيك بحيث ما نترسها  الى الاخر
ندخلها الفرن 20 دقيقه لين تستوي ( ندخل عود خشب عشان نتاكد من النضج)
 
وعلى ما تبرد نسوي الفروستنغ
نسوي حمام مائي بحث ان الجدر الفوق ما يلامس الماي اللي تحت ونحط فيه الشكر والبياض ونحركه بالويسكر لين يصير لونه ابيض لماع ويصير شوي دافي
نشيله من النار ونكمل خلط ( استخدمو الخلاط الكهربائي) ونضيف الفانيلا وقطع الزبده بالتدريج يعني كل ما تختلط زبده نضيف غيرها واخر شي الفراوله واللون
اذا برد الكب كيك نضيف عليه الفروستنغ ونزينه بالفراوله واكلوه بالف عافيه :>

 

Advertisements

6 thoughts on “كب كيك فراوله

  1. Sn3a
    *****
    الله يسلمج حبيبتي :>لا تشوفين شكلي انا ومرت اخوي لما كنا بنذوقها جنا يايين من مجاعه ههههه
    لان شكلها صج يشوق
    الله يعافيج يا قمره ومشكووووره

    نوفا
    *****
    تسلم الايادي ويعله مداخيل العافيه
    قوليلي شلون طلع.. حبيتيه ؟ :>

  2. يعطيج العافيه وموقع فوق الرووووعه ويسعدني انج طبقتي شي من أطباقي (وجه مستحي ) لووووول وعوافي على قلبكم الكب كيك انتي ومرت اخوج

  3. ام يوسف ( القلوب اطفال )
    *************************
    حبيبتي نورتي وشرفتي بلوقي
    وايد وايد استانست بتعليقج
    الله يشهد اني شكثر استفدت من ملاحظاتج للكب كيك وما شاء الله شهادتي فيج مجروحه لانج فوق المبدعه هذا مو اول تطبيق طبقت بعد الكوكنت كب كيك لاينا غارتن :>نورتي بلوقي يالغاليه وحياج الله دوم :>

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s