برتزل ينن وهش ولذيذ pretzels

 
 
 
 
 
 
 
جربت عجاين مختلفه اني اشكلها واسويها بس طعمها مو نفس اللي كنت اكله بره … ولمن بطلو انتي انز بالكويت استانست قلت باكل شي لذيذ بس للاسف ما عجبني طعمه كلش  يمكن لاني كنت طالبته توصيل ووصلني بارد… كنت اروح وارد على محل برتزلز اللي بلولوماركت باسواق القرين وبالنسبه لي هذا افضل مكان جربت فيه البرتلز بالكويت 
 
ليما طحت على هالوصفه … البرتزلز فيه لذييييذ لذييييذ وهش وطري و متفوخ و ريحته تهبل لدرجه اني قلت عمري مرح اشتري برتلز من بره … الوصفه وايد سهله خلال ساعه الا ربع بتكونين حصلتي على 8 حبات برتزلز هشه ولذيذه  كانت ريوقنا و يمها بيض سكرامبل وقهوه امريكيه  … جربوه وان شاء الله بيعجبكم انا متاكده :>
وجمعه مباركه عليكم كلكم يا رب  :**
انا سويتها صغيره ” عرضها تقريبا بحجم نص الكف ” ومتفوخه متعمده عشان شكلها يكون مثل الخبز وتشبع اكثر انتو اذا تحبونها بالحجم العادي  قسموها الى 4  او 5 وفردوها بسمك اضعف ورح تصير لكم اطول فلما تشكلونها تصير بالحجم العادي  ولانكم بتحصلون عدد اقل زيدو الوصفه على هواكم 
الوصفه من موقع كنغ ارثر فلور
 
طبعا تقدرون تحطون اي شي تحبون سواء ثوم بودر او سمسم او بهارات شوي او تيركي او هوت دوغ او هالبينو او دارسين وشكر  وتقدرون تقدمون يمها اي نوع من التغميسات مثل جبن قلاصات او صلصه بيتزا او هني مسترد او زبده مذوبه او كتشب مع شوي فلف اوقيمر وعسل انا جزء  رشيت عليه جبن مبشور وجزء رشيت عليه ملح كنت شاريته من بي كيو وهذا شكله  واذا مو متوفر استخدمو ملح خشن
 
 
بسم الله نبتدي …
 
المقادير :
كوبين ونص طحين عادي
نص م ص ملح ناعم
م ص سكر
2 وربع م ص خميره فوريه
كوبين ماي دافي 
قفشتين كبار بيكربونات الصوديوم
ملح   او جبن مبروش او سمسم او اي شي تحبون تحطونه على الويه
شويه زبده اهو مكتوب بالوصفه 3 قفاش  كبيره بس انا استخدمت تقريبا قفشه او قفشه ونص صغار
 
 
الطريقه :
نخلط الطحين مع الملح والشكر والخميره وكوب ماي دافي ونعجنهم مع بعض لين تتكون عجينه ملسه وطريه  تاخذ تقريبا 5 دقايق عجن وبعدين نحطها بجيس نايلون ونسكره نص ساعه عشان تختمر ( ما اتوقع الجيس ضروري بس لانه مكتوب بالوصفه قمت اسويه جذي  )
بعد ما تختمر نقطعها 8 قطع ونخليها ترتاح على ما نسوي سائل الغمس   …. ناخذ  كوب الماي الدافي والبيكربونات ونذوبهم  مع بعض ونحطهم بصينيه او صحن او بايركس او مقلاه المهم انه ما يكون غزير و حجمه يشيل البرتزل ( انا ذوبتهم على النار لاني لاحظت كل ما كان الماي ساخن تكون تشوي من داخل اكثر )
وناخذ صينيه الفرن ونحط عليها ورق الخبز ونشغل الفرن على درجه حراره 200 او 220 
نشكل البرتزل بشكله المعتاد وهذي الصور
 
 
بعد ما نشكله نغمسه بالماي والبيكربونات ونحطه بصينيه الخبز… ونتركه شوي  على ما نذوب الزبده ونبرش الجبن وبعدين نرشها بالملح او الجبن  وبالفرشه نمسح العجينه بالزبده  وندخلها الفرن  لين تتحمر ورح تاخذ اقل من 10 دقايق…طلعوها واكلوها وهي ساخنه وهني وعافيه 
20121227_185036
 IMG_20121227_185307
20121227_190857

16 thoughts on “برتزل ينن وهش ولذيذ pretzels

  1. يقول بيرفت كونتيسا:

    شنو انا مبدعة كنت شايفة تقريبا نفس هالوصفة ببلوق اجنبي بس اكيد شفتها وانا نايمهوسويتها بس بالبلوق شكلها يشوقوعندي ذايبه ومو مستوية ومالها معالم اصلامع العلم ان العجينة ضبطت معايبس شنو المشكلةاخيتج فاهمه ان نسلق العجينة بالماي والصوداواشتغلت عليها ليما ذابت بالمايوقطيتها بالزباله عزج اللهتسلم ايدينج وشكرا لانج صححتي معلوماتي الغلط

  2. عفيسه
    ******
    الله يسلمج حبيبتي
    وصدقيني طعمه احلى :>
    شاكرتلج مرورج وتعليقج وحياج الله دووووم

    بيرفت كونتيسا
    **************
    حبيبتي المهم انج حاولتي جربتي
    كنت ممكن اطيح بنفس السالفه بس قريت تجربه وحده سوت جذي واختفت ملامح البرتزل :>انا اعتقد البيغل اللي لازم يغلونه اذا ماني غلطانه حبيبتي انتي المشكوره على مرورج وتعليقج عندي وحياج الله
    ومشكوره على دريسنغ السلطه .. يم يم لذيذ بس ما كان صالح للتصوير بالمره هههه

  3. يقول بيرفت كونتيسا:

    حمدالله الدريسنق اعجبج ادري شكله عجيب عشان جذي الدريسنغ الي في روب ما احب اخلطه مع السلطه الي يبي يحط لنفسة عشان ما تصير عفيسة

  4. يقول bent el deera:

    star
    ******
    حبيبتي مشكوووره… ايي انا متفخته عشان شكله بوجهه نظري احلى :>

    بيرفت كونتيسا
    **************
    بالعكس حبيبتي اهو كان وايد حلو بس انا خلطته وعفسته عشان جذي ما قدرت اصوره
    ان شاء الله اصوره المره اليايه لمن اسويه :>

  5. يقول tammyfav:

    ماشاءالله شكله يميييي ^^و ما توقعت انه ممكن نسوي البرتزلز فالبيت ! وايد متحمسه اني اجربه بس خاطري اجرب اللي عليك شكر وسينامون يم ^^!

  6. يقول bent el deera:

    tammyfav
    *********
    حبيبتي شاكرتلج تعليقج
    والبرتزلز ما ياخذ وقت بسرعه يستوي جربيه وان شاء الله يكون على ذوقج
    صدقيني هالوصفه تطلع الذ بريتزلز ذقته بحياتي

  7. يقول bent el deera:

    غير معرف
    *********
    الله يسلمج
    وطريقه الماي والبيكربونات سهله
    ذوبي البيكربونات بالماي الدافي وبعد ما تشكلين العجينه غمسيها بخليط الماي وحطيها بصينيه الفرن ونطري عليها شوي وبعدين مسحيها بالزبده وباي مكون تبينه ودخليها الفرن بحدود 10 دقايق لين تتحمر وعليج بالعافيه :>

  8. يقول gogo7227:

    جربت طريقتك وكانت رائعه
    بعد ما شكلتها وغمستها
    عملت خليط مكون من ملح وثوم بودره واوريجانوا وملح مبهر وجبن بارمزان ودخلتها الفرن وبعد ماتحمرت مسحتها بالزبده
    كانت واااااااااو والريحه شئ

    • يقول bent el deera:

      عليج بالف عافيه
      وفعلا هالوصفه من الوصفات المفضله عندي تعطيد برتزلز هش ولذيذ واضافاتج قيمه بجربها ان شاء الله

  9. يقول ام علي:

    صج شكرًا نيابةً عني وعن زوجي وعيالي …وايد حبوو البرتزلز ..شكرًا

    بس تدرين انا عندي مشكله صغيره وايد مع وصفاتج …لأني مؤ خبره وايد طبخ أوجه مشكله مع المقاييس اللي تستخدمينها اقعد ساعه اطالع قفشة القياس ..هل قصدج الوسط او اللي اصغر🙂

    الله يعفيج حطي صفحه توضحين فيها م ص جم غرام ٥ او اقل 

    او حتي لما تقولين ربع قفشه صغيره …ابجي ما عرف اي واحده :) 

    فاطبخ ع البركه 

    • يقول bent el deera:

      حبيبتي عليكم بالف الف عافيه يا رب

      واعتذر عن هالشي

      ببعض الوصفات اللي اكتب فيها المقادير بالضبط اكون مستخدمه القفشه العياريه … لمن اقول قفشه صغيره او قفشه شاي فانا اقصد الصغيره وهي القفشه اللي نسميها بالكويتي وسط

      الملاعق العياريه تتدرج من قفشه كبيره لي ربع قفشه صغيره

      بحاول المره اليايه اضبط العيارات اكثر واصور لج القفاش اللي استخدمها

      بالاطباق الرئيسيه والموالح زيدي وقللي على مزاجج وحسب ذوق البيت
      اعتذر مره ثانيه اذا كان شرحي مو واضح وان شاء الله بتفادى هالشي بالمستقبل :*

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s