خبز الزيتون والاعشاب

هالخبز طعمه وريحته  اول ما يطلع من الفرن تحسسكم انكم قاعدين بمطعم ايطالي بس ناقصكم زيت الزيتون مع الفلفل او الثوم للتغميس… جربوه صج لذيذ
طبعا تقدرون تسونه كله لوف واحد او تقسمونه 2 نفسي.. الحلو فيه انه يتثلج ووقت اللي تبونه طلعوه وسخنوه ويطلع جنه يديد.. بالوصفه نص كوب زيتون انا حطيت كوب كامل عشان زياده النكهه  وبدلت البقدونس المجفف بالبقدونس الفرش… حتى لو بسويه بموسم الريحان كنت رح احط الفرش احلى برايي
بسم الله نبتدي

المقادير:

3-4 اكواب طحين ابيض العادي
كوب زيتون مفروم.. انا خلطت الاسباني الاخضر والاسود
ربع كوب زيت زيتون
بصله صغيره مفرومه ناعم
فصين ثوم مهروسين
قفشه كبيره ريحان ناشف
قفشه كبيره اوريغانو
قفشه كبيره خميره فوريه
قفشه صغيره ملح
قفشتين صغار سكر
نص قفشه صغيره بيكنغ بودر
رشه فلفل اسود
3 قفاش كبار بقدونس مفروم
كوب وثلث ماي دافي

الطريقه:
نسخن زيت الزيتون على نار هاديه ونضيف لها البصل والثوم ونحمسهم لين يتكرملون ويقلب لونهم ذهبي ونتركه يبرد شوي
نخلط 3 ونص كوب طحين مع الخميره والبيكنغ بودر والشكر والزيتون والملح والفلفل الاسود والاعشاب والبصل مع الثوم ونخلطه عدل وبعدين نضيف الماي بالتدريج ونعجنه ونضيف باجي الطحين بالتدريج ( انا احتجت بس ربع كوب زياده )
بتشوفون بعد جم دقيقه عجن بتصير كره مطاطيه نحطها بطاسه ممسوحه بالزيت ونخليها تخمر التخمير الاولي وانا خذت مني تقريبا 40 دقيقه

بعدين نشكلها حسب الرغبه او نسويها رول ونحطها بقالب التوست واذا تحبون بالسكين نحزها بالويه ونغطيها بفوطه ونخليها تخمر التخمير الثاني تقريبا نص ساعه وبعدين ندخلها الفرن حار مسخن بدرجه حراره 200 وندخلها الفرن لين تتحمر وتنضج .. اما تاكلونها على طول او تغطونها بفوطه عشان لا تيبس وتتركونها تبرد وبالف عافيه

الإعلان