قرص عقيلي

 

يمكن شكلها ما يشوق بس صدقوني هالوصفه لذيييييييييذه حيل  ومن جربتها قبل جم سنه ما فكر اغيرها… كل مكونات قرص العقيلي اللي فيها موجوده اهمها انها لذيذه وحلاتها مو زايده و هشه ومتفوخه وريحتها هيل وزعفران ومع الشاي او الحليب الحار يم الدوة  تصير مو صج

عاده اسويها بقالب واحد بس حبيت كتغيير احطها بقوالب صغار بس للاسف لزقت بالنص واذتني على ما طلعتها عشان جذي تشوفون شكلها بهالطريقه

انا سويتها هالمره بسكر تروبيكانا زيرو كالوري  وقللت كميه الزيت  عن المقدار المذكورو قدمتها ساده  بس تقدرون حزه التقديم ترشونها بشكر بودره  او تخلطون معاها الرهش الشبه سائل ( ينباع بالجمعيات بعلبه مثل الهرده )  او تغمسونها بككاو  او تصبون عليها توفي او صلصه زعفران ( شكر وزعفران وماي ورد ) او حلوى حاره مذوبه  او جبن كيري مخلوط مع توفي .. يعني اي شي تحبونه معاه ونفس الشي يمشي مع المقادير تقدرون تضيفون فستق ناعم وتقدرون تضيفون رهش مفتفت او  حلوى او تزيدون الهيل والزعفران او الشكر وتلغون الدارسين

الوصفه مو لي اخذتها من منتدى حوا من العضوه غرومه  … قللت كميه الشكر بالوصفه الاصليه لاني ماحب الحلو حالي وايد … جربوها الحين وقتها وصدقوني بتعجبكم ان شاء الله  لانها لذيذه وسريعه 

بسم الله نبتدي … المقادير تكفي قالب واحد او 6 قوالب صغار نفس الصوره … الوصفه الثانيه بالرابط

 

المقادير:

4 بيضات

قفشتين كبار بيكنغ بودر واذا كانت المكونات بحراره الغرفه قفشه كبيره كافي

ثلاث ارباع كوب زيت نباتي ( استخدمت زيت ذره )

نص كوب سكر او ثلات ارباع اذا تحبونه حالي

كوب روب كامل الدسم

كوبين طحين فاخر

قفشه كبيره فانيلا

قفشه كبيره متروسه هيل ناعم ( الافضل اذا مطحون فرش )

قفشه صغيره زعفران ناعم ( طحنوه اول وبعدين اخذو بمقدار قفشه صغيره )

قفشه صغيره دارسين ناعم ( اختياري )

رشه ملح

وسمسم

وزيت لدهن القوالب او سبراي نن ستك

 

الطريقه:

نشب الفرن على درجه حراره 150-160

ندهن قوالب الكيك ونرش عليها السمسم

نخلط الطحين مع البيكنغ بودر والملح وننخله وبعدين نخلطه مع الهيل والدارسين والزعفران

نخلط البيض والشكر والفانيلا لين يتمازجون عدل وبعدين نضيف الزيت والروب وخليط الطحين واول ما يختلطون عدل نوقف المكينه

نصبهم بالقوالب ونواسيهم ونرش شويه سمسم على الويه وندخلهم الفرن تقريبا نص ساعه لين يستوون ونطروه لين يبرد واكلوه بالف عافيه

 

الإعلان