اول تجاربي مع سمج الحلوايوه

ابوي فديت قلبه وعمره والتراب اللي يوطي عليه يايب لي سمجه اول مره تدش مطبخي الا وهي الحلوايوه  خزيتها وخزتني وقررت ادق على 911  ( عمتي ) ترسيني على اصلها وفصلها بس للاسف معرفه عمتي فيها تشبه معرفتي بس
 قالت لي : شوفي شكلها
قلت لها : عمه هالسمجه جنها زبيديه مسويه تان هههههههه
قالت : ماكو يا مطبق يا مشوي …ولان حجمها ما يصلح حق مطبق فقلت اشويها

النهايه …. السمجه طلعت ترفه ترفه ترفه وتذوب بالحلج .. اكلت قطعه صغييييره بس  للحين اتنطع فيها صراحه مادري ليش تونا نتعرف عليها مع ان ابوي من عوايده يغير وينوع بالسمج

اذا كنتو من المستهلكين لهالنوع من السمج عطوني اقتراحات اخرى لان باذن الله لها يايات اكثر عندنا

المقادير كلها حسب الرغبه…  والحشوه تصلح حق اي نوع سمج مشوي.. و شوفو كميتها اذا حسيتوها وايد قللو المقدار…انصحكم تحطون فلفل علوب بالحشو انا ما قدرت احطها لان بنات اخوي صغار ما ياكلون حار بس اتوقع تعطي نكهه لذيذه

قدمتها مع عيش زعفران مخلوط مع حمسه بطاط

بسم الله نبتدي

المقادير :
بصله كبيره مفرومه ناعم
شده كزبره مفرومه ناعم ( واذا عندكم مجففه احسن )
نص شده شبنت مفروم ناعم ( هم المجفف احسن )
نص حبه فلفل اخضر مفروم ناعم
4 فصوص ثوم مفرومه ناعم
قفشتين كبار زرشك مغسول ( او اكثر اذا تحبونه )
بهارات نص قفشه صغيره مالت الاستكانه او اقل حسب الرغبه ( زنجبيل بودر وكزبره بودر و فلفل اسود و لومي ورشه بابريكا وفلفل احمر )
نص قفشه كبيره بهارات سمج ماركه مجدي
قفشتين كبار زيت عشان ينلم الحشو وزياده شوي عشان نمسح الصينيه
صبار منقع بماي حار ومصفى
ملح
وطبعا سمجه منظفه ننقعها بملح وليمون ربع ساعه وبعدين نغسلها

الطريقه:
نخلط البصل والخضار والفلفل الاخضر مع البهارات والملح ونفركهم عدل وبعدين نضيف الزيت وشوي من الصبار  والزرشك ونخليها

نمسح صينيه الفرن بشوي زيت وناخذ السمجه ونرشها من الجهتين بالملح ونحط الحشو ببطنها

نصب باجي الصبار على الويه عشان يعطيها لون حلو ونصب شوي ماي بقاع الصينيه عشان لا تلزق السمجه

نغطيها بقصدير وندخلها فرن حار الى متوسط وباخر عشر دقايق نشيل القصدير اللي بالويه عشان تتحمر واكلوها مع خبز مسمسم او عيش زعفران بالبطاط وهني وعافيه

5 thoughts on “اول تجاربي مع سمج الحلوايوه

  1. يقول شوشو:

    اهليييين بنوته من زمان عن بلوقاتجوهذي مو جنها فسكر ؟؟ ترى انا مو خبره بالسمج بس حسيتها تشبه الفسكر

  2. يقول bent el deera:

    شوشو****اهلين حبيبتي وحياج الله دوم :>ترا ممكن تكون فسكر هههههابوي قالي حلوايوه وكتبتها مثل ما سمعتها :> candy cotton **************حبيبتي مشكوووره وايد والله يسلمج من كل شر :**وحياج الله دوم

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s