خلطه جبن الفيتا

 
هالوصفه تعود حق امي الله يرحمها اعتقد انها من تاليفها واخراجها ههههه…. الفرق بس امي كانت تخلط الجبن  وتحمص الخبز بروحه وتقدمه كتغميسه

الأساسي الطماط وزيت الزيتون والجبن بعض الاحيان امي الله يرحمها ويغفر لها  تضيف له نعناع مجفف او زيتون اخضر او ليمون مصري ( المرقد ) او شرايح جزر يعني كل مره كانت تقدمها شكل 
وترا اهي مالحه فاذا  ما تحبون النكهه المالحه فتقدرون تستبدلون  الجبنه الفرنسيه بجبنه فيتا البقرات الثلاث او المراعي قليله الملح اللي بالعلبه والطعم مرح يفرق وايد :>

ممكن تحشونها كسندويشات نفس الصوره .. باجي الساندويشات شاورما وتحصلونها هني و بطاطا حره باللبنه ووصفات البطاطا الحره تلقونها هني وهني وهني  ووصفه اللبنه تحصلونها هني …وجربوها مع قلاص شاي حليب وعليكم بالعافيه


المقادير: 
شريحه بصل ابيض مفرومه ناعم
جبن فرنسي او جبن فيتا اللي بالعلبه من اي ماركه ولان الجبن الفرنسي كان عندي شوي فخلطت معاه  جبن فيتا من ماركه نادك بس اي ماركه تؤدي الغرض
طماطتين كبار مقطعين ناعم
قفشتين او ثلاث كبار زيت زيتون بالاضافه حق كميه لمسح الخبز
رشه نعناع يابس او اريجانو او زعتر 
رشه بابريكا
رشه فلفل حار احمر مطحون
خبز لبناني السميك


الطريقه 

نهرس الجبن والبصل والطماط بالشوكه وبعدين نضيف باجي المقادير وممكن نضيف لهم جوز بعد

ممكن نمسحهم فوق الخبزه ونرد ندخلهم الفرن شوي عشان يتم عمليه التحميص 
وبالعافيه

الإعلان