اطباق رئيسية · اطباق رئيسية -اسماك وماكولات بحريه · اطباق رئيسية-باستا او المعكرونه

نودلز الربيان الفيتنامي بطريقه نايجلا لوسون



مممممممم لهالوصفه قصه… بيوم من الايام كنت طرت على بالي الغاليه ميلو وحسيت اني صج ولهت عليها وقعدت احوس ببلوقها  وبعدين سبحان الله كانوا حاطين بفتافيت حلقه نايجلا لوسون الشيف اللي اهي تحبها
سبحان الله ناس نعرفهم من ورا الشاشه شلون نحبهم ونعرف عنهم اشياء جنهم عايشين بينا
وقررت اسوي هالوصفه ولانها سهله وما يبيلها شي استانست عليها … زهبت الدريسنغ ورحت تمشيت وقبل الفطور بربع ساعه خلصتها وانا كنت بالمطبخ اسويها حسيت ان ميلو معاي بالمطبخ نسوي وصفات الشيف اللي تحبها مع بعض >>> لا تتطنزون هههه
للاسف لمن وصل دورها بالاكل كنت شبعانه فما ذقتها وماقدر احكم عليها بس شكلها حلو ومبين عليها خفيفه واحنا محتاجين هالوصفات بالصيف


الفرق بيت الوصفه وتطبيقي اني شلت مستنبت الصويا والفاصوليا الخضره والربيان استخدمت نوع اكبر وشويته .. الكميه بالباجي حطيتها على النظر
المقادير الاصليه هني


ملاحظة : عندي لكم موقع روعه روعه روعه … كل اللي يحب الطبخ او حاب يتعلمه انصحه وبشده انه يتجول فيه


المقادير :
ربيان
ملح وفلفل اسود وبهارات سمج ماركه ماجيك
بصل اخضر مفروم
اوراق كزبره
نودلز عيش .. تلقونه بالجمعيات لونه ابيض ما يحتاج طبخ 


مقادير الدريسنغ :
حبه كبيره لومي اخضر  ( عصير وقشر )
فصين ثوم مفرومين صغار
فلفل حار مفروم ( حبه واذا كنتو تحبون السبايسي حطو 2 )
قفشتين كبار زنجبيل مفروم
4 قفاش كبيره صلصه السمج
4 قفاش كبيره ماي
قفشه صغيره شكر
2 قفشه صغيره زيت فول سوداني او اي نوع مكسرات ( انا حطيت زيت كانولا ماعندي هالنوعيه من الزيوت )
فقشه صغيره زيت السمسم 

الطريقة:
نخلط مكونات الدريسنغ ونخليها فتره تتمازج 
نتبل الربيان المقشور بالملح والفلفل الاسود والبهار ونشويه بشوايه غير لاصقه

نحط كميه من الدريسنغ عليها عشان تتشربها الربيان على ما نجهز باجي الطبق
نحط كميه من النودلز في ماي ساخن لمده 10 دقايق ونشخلها نضيفها للربيان ونحط فوقهم البصل والفلفل الحار والكزبره ونقدمها ويمها شوي من الدريسنغ عشان نضيف حسب  الرغبه وبالعافية

Advertisements

2 thoughts on “نودلز الربيان الفيتنامي بطريقه نايجلا لوسون

  1. روووعه الطبخه بس ماعجبتني لاني مره استعملت النوع من النودلز هاذا كللللش ماعجبني ومشكوووره حبوبخ على الويب يعطييج العافيه

  2. مممم تصدقين ما جربته بس حبيت فكره انه بشوي ماي حار ويستوي مشكوره انج نبهتيني عن طعمه إذا عاجبج الوصفه أتوقع تقدرين تسوينها بنودلز عادي حياج الله حبيبتي 🙂 واللينك يننننن أنا كنت أتابعه من كان بشمواه بس ببلوقه أغلب وصفاته يديده

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s