طبق اليوم من من اطباق حسون المفضله … اهو اللي غسل ونظف الباميا معاي .. وزوليتنا للحين تشكي من لطخه باميا انحاشت من اصابعه وهو ياكلها وسوت لنا بقعه فريده :>
هالباميه وايد لذيذه وسريعه انصحكم تاكلونها مع خبز ايراني مسمسم مع عصره ليمون يم يم
المقادير والطريقه كلها حسب الذوق:
نحمس البصل ونضيف له الثوم وفلفل اسود وكزبره بودر وبزار ولومي ناعم وبعدين نضيف الباميا ( تقدورن تقلونها او تضيفونها على عدالها ) ونقلبها معاهم
بالبلندر نحط طماط ومعجون ونحمسه معاهم لمن تطلع ريحته وبعدين نضيف شويه ومرق لحم ( بالفريزر يكون عندي فوح لحم ) او مرق خضار او ذوبو مكعب خلاصه مع ماي وضيفوه فوق الباميا واذا تحبونه حار حطو فلفل علوب وعدلو الملح وتركوه على نار خفيفه لين تثقل الصلصه وتنضج البامية وبالف عافيه
اذا تحبون الحموضه حطو لومي عدل مع الصلصه او صبار منقع بماي ومصفى
My Kitchen 
يوعتيني الله يهداج مو وقته xPيحفظلكم هالصغيرون ان شاء الله
الله يسلمك اخوياتمنى انك تسوي هالطبق ويعجبك .. عاد سهل تحضيره :>حياك الله دوم
لوووووول واسلم قلبه لا اله الا الله ماشاءالله تبارك الرحمن وطريقه الباميا عجييبه ان شاءالله جاري تطبيقها قريب
شوشو ****الله يسلمج ويخليلج كل من تحبين جربي الباميا وان شاء الله تكون على ذوقج :>
ضحكتيني على هوايات حسوني الله يحفظه ويعقله لكم :)هذا اول دخولي للمدونه مرره اعجبتني اسجل متابعتي لكـ عااد انا امووت بالطبخ علشان كذا المدونة دخلت راسي بقوه
الله يسلمج ويخلي لج كل من تحبين :>منوره المدونه بزيارتج الاولى ةواتمنى انها ما تنقطع :>حياج الله دوم