review : معجنات LUSCIOUS

كنت المفروض انزل هالموضوع ابجر من جذي

يمكن شفتو الفطاير اللي طلبتها بقريش اللي كان ببيتنا

في البدايه وقبل لا اذكر شطلبت بالضبط في كلمه حق بالنسبه حق صاحبه المحل نفسيتها تهبل ما شاء الله عليها

دخلنا المحل قبل لا يبطل وما رضت نطلع الا واحنا طالبين وكانت طول الوقت بشوشه بصراحه تهبل ما شاء الله عليها

فطاير حلزونيه مشكله محشيه زعتر ودياي وخضار

فطاير على اشكال حيوانات شكلهم كان يشوووق

معجنات على شكل الجنجر كوكيز وعلى شكل سمج  محشيين تيركي مع ذره وحلوم مع طماط وزعتر اعتقد

لولي المعجنات

المفن محشي جبن وخضار

لولي تشيز كيك

تشيز كيك على اشكال حيوانات

ونسيت اصور كور المعجنات مع الصلصه اللي تيي بالقطاره وصورتها موجوده بموضوع القريش :>

الحين بتكلم عن تجربتي … كل من كان موجود سالني من وين شاريتهم شكلهم كان مرتب وحلو ويفتح النفس بالنسبة لطعمهم في ناس شافوه يمكن عادي وفي ناس حبوه

الاشياء اللي ما حبيتها … ان  الموظفين الموجودين محد كان عنده علم بالاسعار فطلبت ويوم التسليم قالولي جم يبون مني بالضبط  بس يمكن لاني يايتهم مبجر قبل لا يكون الشخص المسئول موجود والشي الثاني ان الطلبيه وااااايد اشياء فيها غلط منها اشياء انا ركزت انها ما تكون موجوده حاطينها وبالاضافه انهم مخربطين بالكميات وهم مبدلين انواع معجنات بانواع ثانيه

الشي الاخير اللي ضيق خلقي ان لوليتشيز كيك  ولولي المعجنات اخترب شكلهم  فنقيت الصالح للاستخدام وحطيته عاد شكله كان يشوق

بس التجربه ككل كانت ناجحه و فوق كل هذا دقيت وشكرتهم لان ادري اني طلبته قبل بيوم وكان عندهم طلبات غيري

بالنسبه للاسعار صراحه مادري بجم كل صنف بس كل اللي طلبته بالاضافه الى صينتين وستاند ( ينباعون بروحهم ) طلع علي ب 95 دينار

راي بنت الديرة : ***

مكانهم : بشرق صوب دسمان قبال فلافل شرف تلقونه محل على الزاويه

رقم تلفونهم :22498913

الإعلان