وصفات رمضانيه · اطباق رئيسية · اطباق رئيسية- لحوم · خطوة بخطوة

خطوة بخطوة : الفريكه

الفريكه اكله ملوكيه والحمدالله رب العالمين اعرف اضبطها جربوها بطريقتي صدقوني لذيذه

 المكسرات بالوصفه مو بس للزينه تعطي طعم  فريد معاها

بالنسبه لتبهير النهائي للدياي تقدرون تبهرونه على مزاجكم… وجيس الفرن استخدامه مو ضروري تقدرون تحطون بصينيه الفرن شوي من ماي السلق والدياي وتغطونه بقصديروتشيلونه باخر ربع ساعه للتحمير :>

 افضل نوع فريكه استخدمته للحين  ماركة الاقصى لانه نظيف وحباتها كبار .. اذا ما حصلتوها اخذو الموجود بس تاكدومن نتنظيفها عدل لانها متروسه حصم صغار

المقادير تلقونها هني وهني

 …بسم الله نبتدي

المحتفى فيهم هههه ... طبعا ضبطو المقدار على هواكم
المحتفى فيهم هههه … الكميه اللي سويتها تكفي 6 انفار طبعا ضبطو المقدار على هواكم
نزهب البهارات .. تقريبت عودين دارسين وقفشه كبيره بهارات المجبوس و نص قفشة صغيره فلفل اسود و6 حبات مسمار و15 حبه هيل وو10 حبات ثوم وبصل واعواد بقدونس وزنجبيل ناشف وماجي ومستكه وورق غار وعصفر اذا عندكم

عشان النكهه اولا وعشان تخلفي البدايه نضيف ماي فاتر يغطي الدياي ونشب عليه النار ونشيل الزفر الظاهر على الويه وتالي نضيف البهارات.. من الافضل انكم تحطون ببطن الديايه  نص بصله وورقه غار

 بعد ما نشيل الزفر نضيف كل البهارات وعواد البقدونس ونخليه يطبخ ثلاث ارباع سوا ومن اول ما تحطونه بتلاحظون الريحه الحلوة :>

على ما يستوي الدياي نسوي الحشو.. قفشتين زيت ونضيف لهم تقريبا نص كوب بصل مفروم صغار
بعد ما يفتح لونه نحط كوب لحم مفروم ونحمسه لين ينزل مايه وينشف
نضيف البهارات حسب الرغبه… فلفل اسود ودارسين وبهار وهيل ناعم وكمون.. طبعا زيدو ونقصو على هواكم
نضيف مقدار كوب فريكه ناعمه اذا متوفره او من اي نوع
الفريكه تحتاج تفلفل عشان الحبات لا تلزق ببعض وعشان النكهه طبعا .. بعد ما نفلفلهاعدل نضيف الملح
ونضيف لها ماي حار يا دوب يغطيها لانا ما نبيها سوا كامل :>… هالكميه تكفي 4 ديايات احنا نحب الحشو عشان جذي كثرته… طريقة الطبخ في البدايه حراره متوسطه واول ماتنشف على نار هاديه ونتركها تبرد
وهذا شكلها بعد ما خلصت… لا تحركون الفريكه بعد ما تضيفون الماي عشان لا تعجن واذا استوت بالشوكه نحركها وبس
هذا شكل الدياي بعد ما خلص … نشخله ونحتفظ بماي السلق حق الفريكه وتقدرون تحتفظون بالباجي منه بالفريزر للمرات اليايخ او تسوون منه شوربه او فريكا او اي شي ثاني
نشيل البصل وورق الغار من بطن الدياي ونزهب جيس الفرن
نحشي الديايه بالخلطه… تقدرون تحشونها بالبدايه وبعدين تسلقونها بس بالنسبه لي جذي اسهل
نخلط روب ودارسين وبهار وملح وفلفل اسودونغطي فيه الديايه عشان تعطينا لون حلو بالتحمير
ونحطه بالجيس ونسكره ونكرر الخطوات بالديايه الثانيه
ندخله فرن متوسط الحراره لين يتحمر ويكمل نضجه
الحين دور الفريكه هم تقريبا قفشتين زيت نحمر فيها بصل
نحمر البصل يخف لونه ويصير تقيربا شفاف.. لمن يوصل لي هالمرحله نبهره ولا نحط البهار قبل عشان لا يحترق
نضيف الدارسين .. لان الدارسين جدا حلو مع الفريكا
والكمون
نضيف الفريكه ونفلفها عدل.. خلو النار هاديه عشان لا تحترق معاكم واخذو وقتكم بهالعمليه لين تحسون ان كل حبه فريكا تغلفت
هذا الشكل اللي نبيه
 نعدل ملح ماي السلق ونضيفه على الفريكه وهو حار
بعد ما ينشف نوطي عليه النار ونخليه يترسى
نحمص المكسرات او نقليها .. صنوبر وكاجو ولوز
وهذا شكل الفريكه بعد ما استوت..ِشوفو شحلاتها
وهذا شكل الديايه بعد التحمير
ابوي فديت مواطيه زينها بباجي الحشو والمكسرات .. بالف عافيه

7 thoughts on “خطوة بخطوة : الفريكه

    1. الفريكه من الحبوب اللذيذه .. تقدرين تسوين منها شوربه وتقدرين تسوينها بهالطريقه
      http://wp.me/p1L7TB-2U
      وتقدرين تسوينها نباتيه مع الحمص والخضار
      وسلطه مع الفلفل المشوي وجبن الفيتا
      او تخلطينها مع روب وثوم وتسوين منها سلطه تركيه

      مجال الابداع فيها وايد ما شاء الله :>

  1. مشاء الله فنانه وروعه كالعاده طباخج ، بس بنت عمي من وين شاريه الفريكه ؟ لان جمعيتنا الدايخه ماتيب كل شي ، وعساج على القوه

    1. شكرا شكرا جزيلا على هالحجي الذوق :>

      والفريكه اخذها من مطحنه سمراء عدن بشرق
      اواذا تعرفون ناس بسوريا او لبنان وصوهم ييبونها لكم تكون فرش اكثر :>
      وساعات مركز سلطان ييبون منها بعد

  2. يعطيج العافية
    اكلتي المفضلة دياي بالفريكه اذكر اول مره جربته من مطعم بستو بحولي على مااذكر وجربناها بالبيت بس مااظبطت مثل المطعم

    1. الله يعافيج حبيبتي :>
      عدل الفريكه من الاكلات اللذيذه وسرها بالحماس وان ما نحركها لين تترسى
      جربوها وان شاء الله تطلع على ذوقكم

      🙂

      حياج الله دوم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s