basic 101 · فطور او ريوق · فطور رمضان و ريوق و سفرات كاملة · معجنات وفطاير · انواع الخبز والصمون · خطوة بخطوة

خبز الزعتر اللذيذ

هالوصفه من بنات افكاري فرح تشوفونها حصري هني لوووول حبيت انزلها للي حاب يجرب يخبز بالبيت وماعنده فرن البيتزا اللي استخدمه غالبا وتقدرون تستخدمون  فيه اي مقله او صاجه :>.الخبز وايد ترف ولذيذ ورح يكون بين الخبز العادي وخبز الصاج واذا تبونه بشكل الخبز العادي خلوها اسمك وطبقو خطوات الخبز العادي اللي ذكرتها بموضوع الخبز العربي… .. طبعا تقدرون تبدلون الزعتر والسمسم بحبه البركه او حبه حلوة او حبوب كمون او شبنت مجفف  :>

نكهه الزعتر مو طاغيه اذا تحبونها اكثر زيدوها انا اكتفيت بهالمقدار لاني مسويه معاه حمسه دياي

او تقدرون تسونها راب  حبن اولبنه او خضار مقليه او فلافل حق الريوق.الحلو فيها ان طعمها مرح يتغير  لي ثاني يوم اذا كانت محطوطه بمكان مسكر وتقدرون تجمدون الكميه بالفريزر وتسخنونها حزه اللزوم

صدقوني تستحق التجربه :>

في ملحوظه احب اذكرها قبل لا ابتدي… اذا بتقللون وقت التخمير زيدو مقدار الخميره نص قفشه وبتخمر بنص الوقت لان الجو حاليا حار بس انتبهو لا تخمر ازيد من الوقت اللازم مجرد ما يتضاعف حجمها كوروها ورقوها بسمك ضعيف

بسم الله نبتدي …

مقادير الخبز

المقادير : ( تعطينا 15 خبزة بالحجم العادي او 22 خبزة بالحجم المتوسط ) قللو المقدار او دبلوه حسب الرغبة

 ثلاث وربع ك طحين ( حطيت مزيج بين الطحين الابيض والاسمر للفايده ) + ربع كوب اضافي حسب الحاجة

قفشه كبيره خلطه زعتر المناقيش ( سمسم وزعتر وسماق )اللي تنباع بالحمعيات والمطاحن او شوفو هالموضوع اذا تحبون تحضرونه بالبيت

قفشه كبيره سمسم محمص

نص قفشه صغيره بابريكا

نص قفشه صغيره كمون

نص قفشه صغيره ملح

قفشه صغيره شكر

نص قفشه كبيره خميره فوريه

ثلاث قفاش كبار حليب بودر او علبه روب

كوب الى كوب وربع ماي دافي

ربع كوب زيت زيتون او اي زيت نباتي

الطريقة :

نخلط المقادير الجافه مع بعض ونخلط الزيت مع الماي ونضيفه الى العجينه بالتدريج لين نحصل على عجينه لينه وماسكه روحها بنفس الوقت واذا احتاجت نضيف باجي الطحين

نرد عجنها بيدنا 5 مرات  ونحطها بطاسه مدهونه بزيت زيتون ونغلفها بنايلون ونخليها تخمر تقريبا ساعه او ساعه الا ربع حسب حراره المطبخ

نقرص منها كور حسب الحجم اللي نبيه  ونفردها بسطح مرشوش بطحين بوفره عشان لا تلزق .. طبعا السمك نسويه حسب الرغبه وكل ما كانت اضعف بتاخذ وقت على النار  اقل

نحمي المقلا او الصاجه عدل .. نحط عليها الخبز وننطر الفقاعات نخليه يتحمر ويه واحد ونقلبه على الجهة الثانيه ورح ياخذ وقت اقل بالتحمير او تقدرون تقلبونه بكل ويه شويه لين ينضج من الاتجاهين (( انا حطيتها على اكبر عين وطيت على النار على اقل شي بعد ما سخنتها عدل ))… ريحه الخبز وهو على النار تيننن

نغطيه حتى وقت التقديم عشان لا ينشف ويحتفظ بطراوته وبالف عافيه

Advertisements

3 thoughts on “خبز الزعتر اللذيذ

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s