مرق باميا

استغربت اني مو منزلة الوصفه للحين مع انها من اكثر الوصفات اللي اكررها بالبيت… مرق الباميا اذا تسوى عدل يكون دمار شامل وما يحتاج تبات لي ثاني يوم عشان تكون احلى :>

الباميا المستخدمه بهالوصفه الباميا الزيرو المصريه.. تقدرون تستخدمون المجففه اذا موجوده عندكم غسلوها من الرمل زين وبعدين نقعدوها بماي جم ساعه وحطوها ابجر بالمرق .. تقدرون تستخدمون الباميه الطويله كررو وصفات الباميه المنشفه بس زيدو كميه الماي .. تلقون وصفتين حق الباميه المنشفه هني

جربوها بأي طريقه  وصدقوني بتعجبكم ان شاء الله :>

بسم الله نبتدي …

المقادير : كلها حسب الرغبه .. بذكر كميه تقديريه وزيدو ونقصو على هواكم

تقريبا كيلو لحم بعظم

3 طماطات مفرومه بالخلاط

علبه معجون طماط

جيسين باميا مثلجه

حبتين بطاط

راس ثوم

ربع جيس صبار منقع  بماي حار

ملح

فلفل اسود

كزبره

كاري

بزار لحم( عباره عن كركم وبهار لحم )واستخدمت ماركه شمه اللي ذكرتها من قبل وتحصلونها بلولو ماركت واذا موجوده بدلوها بكركم وبهار عادي

بصله مفرومه

بصله مقطعه ارباع

ثوم مهروس

قفشه بهارات عدله للسلق  (فلفل اسود وبهار وكزبره وكمون وحبه حلوةوعصفر ودارسين وهيل ) وتقدرون تستخدمون بهارات المجبوس من سمراء عدن او اي بهارات حسب الذوق

ملح

فلفل علوب

وطبعا زيت

الطريقة:

نغسل اللحم ونسلقه بماي خالي لين يطلع الغفو ونشيله ونكت الماي عن الزفر واذا كنتو تستخدمون لحم عدل هالخطوة مالها داعي

نحمس ارباع البصل مع البهارات الكامله والبزار وجم حبه ثوم عدل ثواني عشان تتعزز نكهتهم وتالي نضيف اللحم ونحمسه شوي ونزيده ماي حار  ونتركه لين ينضج ثلاث ارباع النضج وعشان تسرعون هالخطوه ممكن تستخدمون جدر الضغط

نشخل اللحم ونحتفظ بماي السلق ونتخلص من البصل والثوم والبهارات

نحمس البصل المفروم لين يفتح لونه وتالي نضيف عليه بزار اللحم والفلفل الاسود والكزبره والثوم المهروس والثوم العادي ونحركهم لين تطلع ريحته وبعدين نضيف الطماط والمعجون ونحركه لين ينشف شوي ماي الطماط وبعدين نضيف البطاط واللحم والفلفل وشوي من ماي سلق اللحم والماي المغلي والملح ونتركه لين يستوي البطاط ويكمل نضج اللحم

باخر 10 دقايق نضيف الباميه المثلجه والصبار ونخليهم على نار واطيه وقدموها مع عيش مشخول وفرقاعه بصل وبالف الف عافيه

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s